Ож вакытысь десантник

Ӵыжы-выжыосты, тодмоосты пӧлын но та войскоосын служить каремъёс вань, дыр. Десантникъёс туж сложной, кышкыт операциосы пырисько, азязы пуктэм ужпумзэс данэн быдэсъяло.

Десантной войскоос ку кылдӥллям бен? Сое тодон понна ӧжытак историез тодэ ваёме. 1930-тӥ арысен кутскыса, Горд Армиын бадӟымесь воштӥськонъёс кутско. Быдэс вооружённой кужымъёсты азинтэмен ӵош, десантной войскоосты кылдытонлы но бадӟым саклык висъяське. 1931-тӥ арын Военной ревсоветлэн председателез, тодмо военной теоретик, та пӧртэм войскоосты азинтонэ бадӟым люкет пыртэм Михаил Тухачевский воздушно-десантной войскоослы саклык висъян военно-морской флотлы сямен ик луыны кулэ, шуыса вера. 1934-тӥ арын ортчем военной манёвръёсы 600 парашютист пыриське. Нош 1935-тӥ арын Киевской но Белорусской военной округъёсын луэм учениосы 3000 парашютистъёс пырисько, омырысен 8200 адямилэсь сылӥсь десант но техника ваське.

Зэмзэ ке верано, кема аръёс ӵоже районамы Быдӟым оже пыриськыса улэп кылем ветеран десантникъёслэн луэмзы-луымтэзы сярысь ачим но ӧй тоды. Бадӟым военной стажез луэм, трос аръёс ӵоже военкоматын ужам Марат Гаязович Сулейманов Балтасьын улӥсь ожысь но ужысь ветеранлэн Фарзи Гимадиевлэн жугиськон дыръя десантной войскоосын служить каремез сярысь вераз.

Янгул школаысь математикаен дышетӥсьлы Фарзи Гимадиевичлы жугиськон кутскыку 21 арес луэ. Жугиськон кемалы уз кыстӥськы шуыса, странаен кивалтӥсьёс пиосмурт дышетӥсьёсты фронтэ басьтытэк уло.

Кыӵе совестен мон жугиськонэ мынытэк кылё шуыса, со кӧня ке пол военной комиссариатэ вазиське, райкоме пыре. Районъя 25 сыӵе куриськонэн вазиськем доброволецъёс пӧлын Фарзи Гимадиев но луэ, сое нырысетӥосын фронтэ келяло. Соос пӧлын озьы ик Аланысь Аглям Камалов, Шубанысь Габдулхай Шагиев но луо. Соос одӥг арлы матэ одӥг частьын служить каро, ожъёсы пырисько. Г. Шагиев батыръёс сямен бырыны шеде.

1942-тӥ арын октябрь толэзе доброволецъёсты (комсомолецъёс но коммунистъёс) 16-тӥ воздушно-десантной бригадае люкало. Соосты Москвае дышетскыны лэзё. Тушмонэн пыӵалтэк яке пуртэн жугиськыны дышето, самолётысен пӧртэм ӝуждалаысен ӝуась гуртъёс, нюлэсъёс вылэ парашютэн куяло.

Фарзи Гимадиев соку гинэ но 5 пол парашютэн тэтче. Одӥг полаз кык парашютсэ но ӵош усьтэ, парашютъёс тугасько, со мырдэм гинэ музъем вылэ васькыса вуэ. А. Камаловен Г. Шагиев но та бригадаын луо.

Соосты тушмонэн басьтэм интыосын ожмаськыны дасяло. Отын партизанской отрядъёсын ужанэз, совето власть кылдытонэз ужпум карыса пукто. Нош командование та ужпумез быдэстонын соосын пайдаяськыны уг вутскы, малы ке шуоно фронтын югдур секытоме, тушмон Волга шур, Сталинград доры матынъяське. Август толэзе соосты 34-тӥ стрелковой дивизилэн составаз Астраханез возьманы лэзё.

Фашистъёс Калмыкилэсь столицазэ Элиста городэз басьтэмзы бере, военной стратегия ласянь туж важной луэм Астраханез киултыны малпало. Астраханез 34 час куспын басьтон понна «Фишрайхер» («Серая цапля») шуэм план дасяло. Городэз басьтонэз 16-тӥ мотострелковой дивизилы но 6-тӥ румынской корпуслы оско.

Асьмелэнъёс но юн дасясько. Военной кивалтӥсьёс тушмонлы пумит воздушно-десантной войскоослэсь сылӥсь дивизиез лэзё.

Калмыкиысь Улан Эрге шуэм пунктэз фашистъёс киулысь мозмытэмзы бере, десантникъёс одӥг район центр котырын оборонае выжо. Фарзи Гимадиев служить карем рота школалэн территорияз интыяське. Татын луэм подвалъёс оскымон огневой точкаослы пӧрмо, соос солдатъёсты тушмон снарядъёслэсь но утё.

... Грузовой машинаосы пуксьыса лыктэм немецъёс пазясько, радэн-радэн султыса, атакае выжо. Соос матынъяськыны кутскем бере, асьмелэнъёс луэм вань кадь пыӵал тӥрлыкъёсысен ыбылыны кутско. Фарзи Гимадиев киын луэм станокен пулемёт фашистъёсыз жалятэк «турна». Немецъёс олокӧня пол атакае выжылӥзы ке но, асьмелэнъёслэсь обороназэс тӥяны, азьлань мыныны ӧз быгатэ.

Огневой позициез юнматон вылысь, роталэн командирез окопъёс гудӟыны приказ сётэ. Чигнано ӧвӧл, берпуметӥ патронозь ожмаськоно — нош позициез немецъёслы сётоно ӧвӧл! Соос чигназы ке, тушмон Астраханез басьтоз.

Та ожын Фарзи Гимадиевлэн расчётэз 200-лы матэ немецъёсты быдтэ. Роталэн парторгез Ф. Гимадиев ачиз но секыт сӧсырме, 3 нунал ӵоже йырсазяз лыктыны уг быгаты. Снарядлэн осколокез солэсь куинь урдлызэ пыргытыса, пушказ пыре. 1943-тӥ  арын март толэзе гинэ со пыд йылаз султэ. Немецъёсын ваче син луон ожын роталэн командирез Алексей Антонович Иванов бырыны шеде. Командирлэн пуляен пасям комсомольской билетысьтыз гожтэт шедьто. Отын таӵе кылъёс гожтэмын луэ: «Дуно эше, та гожтэтэз ачид лыдӟы но мукет муртлы сёты. Мон Атай музъеммы, вордскем шаере понна ожмаськыса кулӥсько. Мон тодӥсько, асьмеос одно ик вормомы. Нош мынам туж адӟеме потэ вал асьме музъемын берпуметӥ фашистлэсь кулэмзэ. Гвардиысь лейтенант А.А.».

Фарзи Гимадиев госпитальысь потэмез бере 16-тӥ гвардейской воздушно-десантной бригадаез кӧня утчаз ке но, шедьтыны ӧз быгаты. Берло танковой войскоосы шеде, нош ик кык пол сӧсырме.

Рамазан Фарзиев

ВДВ-ысь ветеран