Ожысь ветеранлэн юбилеез (фото)

- 17 аресэн Быдӟым Отечественной войнае кошки. Мыным Балтикаысь нырысетӥ фронтлэн танк полказ ожмаськыны тупаз. Со палъёсын мон атайме пумитай, соин ӵош одӥг полкын луимы. Но ожысь пӧртэм дыре берытскимы. Ож йылпумъяськем бере, вордскем юртам ваньзэ ӧвӧлзэ куинь толэзьлы, отпусклы гинэ бертоно луиз. Собере выльысь вить ар служить кари. Мон армиын 1943-тӥ арлэн декабрь толэзьысеныз 1950-тӥ арозь, октябрёзь луи. Нош бертыса, Ленин нимо колхозын ужай, - вераз ас улон сюрессэ ветеран.

Анатолий Медведев Быдӟым Отечественной ожын кышкасьтэм луэмез понна «За отвагу», «За победу над Германией в Великой Отечественной войне 1941-1945гг.» но трос юбилейной медальёсын пусйиськемын. Вордскем гуртаз бертыса, со Анна Андреевнаен семья кылдытӥз, соин ӵош 4 пи но 1 ныл будэтӥз. Бадӟымез Евгений пизы - Казаньын, Николай но Лев пиоссы - гуртын, нош Александр пиез Ижевскын улэ. Юбиляр «Быдӟым Отечественной войнаысь ветеранъёслэсь улон условиоссэс умоятон» программая лэсьтэм выль коркан Анна Андреевна кузпалэныз но Валентина нылыныз улэ. Анна Андреевнаен соос 65 ар ӵоже ӵош ини. Анатолий Кузьмич 12 внуклы но 13 правнуклы гажано песятай луэ. Районамы но Медведевъёс гажано адямиос.

Сӥё-дано карыса, юбилярлы сётӥзы РФ-лэн Президентэзлэсь Владимир Путинлэсь Ѓечкылан гожтэтсэ, район главалэн нимыныз ӟечкыланъёс но кузьымъёс вуттӥзы. Озьы ик Анатолий Кузьмичез ӟечкылазы район исполкомлэн кивалтӥсезлэн нырысетӥ воштӥсез Ильшат Галимуллин, районысь ветеранъёслэн Советсылэн кивалтӥсез Рифат Абдуллин, районысь социальной дурбасьтонъя отделлэн кивалтӥсез Алсу Гатиятуллина, адями доры мыныса юрттэт сётонъя отделлэн кивалтӥсез Аниса Хайруллина, районлэн военной комиссариатысьтыз ужась Лилия Валиева но ветеранъёсын ужась Андрей Петрович Павлов, Покчи Лӧзя гурт поселенилэн кивалтӥсез Сергей Мухин но «Сурнай» обществоысь валтӥсь экономист Анас Калимуллин. Соос гажано юбилярез ӟечкылазы но сюлмысь шудбур сӥзизы.

Ясмина
ШАМСЕТДИНОВА