Перемечев Гурьян Михайлович

Соос огшорыесь, тросаз учыре гумырзы ӵоже колхозын ужаса пенсие потэмъёс луо. Соос жугиськон но жугиськон бере дыръёслэсь вань шуг-секытъёссэ ас вылазы шӧдӥллям (матысь адямиоссэс ыштӥллям, сютэм улонэз чидаллям). Но улонлэн секыт эскеронъёсызлы соос сётскиллямтэ, али но, арессы шоры учкытэк, уг сётско. Ужало, гуртсы понна сюлмасько, нылпиоссы но внукъёссы понна уло.

Тӥ но, лыдӟисьёсмы, тужгес яратӥськоды, куке газет бамъёсын огшоры адямиос сярысь статьяос пото. Куке ми гожъяськомы соослэн улон но ужан сюресъёссы, улонысьтызы тунсыко учыръёссы сярысь. Соин таяз статьяям тӥледыз Вукогуртысь Перемечев Гурьянэн но Сизнерысь Анна Троковаен тодматэме потэ.

Перемечев Гурьян Михайлович

Гурьян Михайлович 1940-тӥ арын 22 коньывуонэ Вукогуртын вордске. Сое Вукогуртын но, Ципьяын но, матысь гуртъёсын но тодӥсьтэмез ӧвӧл, дыр. Кема аръёс ӵоже воргорон «Труд» обществоын» тыршем.

Ципья школаын 10 классэз йылпумъяса, Гурьян Михайлович, Савалиысь сельхозтехникумын дышетскыса, зоотехниклэсь ӧнерзэ басьтэ (1957-1960-тӥ аръёс). Улонзэ гуртын азьланьтыны малпам егит пи вордскем палъёсаз бертэ но «Труд» обществое ужаны интыяське. 25 ар ӵоже зоотехник луыса ужа. Вераны гинэ капчи, нош 25 ар — макем бадӟым лыдпус со. Кӧня удалтэм но удалтымтэ нуналъёс ватскемын меда та лыдпус сьӧры. «Ужаны кутскыкум, туж секыт вал. Аръёсыз сыӵе луизы. Но кӧня ке ар ортчыса, капчигес луиз. Кельшем уже интыяськем бере, кошкыны малпанъёсы но ӧз луэ, секытгес вал ке но», — тодаз вае нырысетӥ ужам аръёссэ Гурьян Михайлович. Нялтас вераса, та ужын ужакуз, Казаньысь ветеринарной институтын дышетскыса, вылӥ тодон-валан но басьтэ. 1985-тӥ арысен Гурьян Михайлович «Труд» обществоын ик пудо сиён дасянъя начальник луыса ужаны кутске. 1998-тӥ арын пенсие потэ (ужакуз сӧсырмон басьтыса, дано шутэтсконэ кык арлы вазьгес потоно луэ), но 2012-тӥ арозь али ревизионной комиссилэн председателез луыса ужа. «Сизьымдон кык аресэн гинэ шутэтсконэ потӥ. Огъя ужам стаже — 52 ар. Самой бадӟымез мынам стаже, дыр, — шуэ Гурьян Михайлович. — Сизьым председателен ужаны вутски — Даминовен, Гильфановен, Хакимовен, Халиловен, Закиевен, Черновен, Хадиевен. Ужме туж яратӥ, тунсыко ведь гуртын улыны но, ужаны но. Мукет нокытчы ӧй но ветлы, весь гуртын, весь татын. Ма мынӥд ке но — котькытын со ик вал, кытчы мынӥд ке но...». Зэмзэ но, Гурьян Михайлович — гуртлэн зэмос патриотэз. Вукогуртын дас куать ар ӵоже староста но луэ со. Гуртэзлэн чылкытлыкез понна сюлмаськись воргоронлэн тыршеменыз Вукогуртын чорыг ты лэсьтӥськиз, асфальт дырезлэсь вазьгес вӧлдӥськиз. Ачиз Гурьян агай шуэ: «Куддыръя верам кылъёсы ваньзылы уг кельшо. Ма, соиз валамон но — ваньзылы яраны уг луы. Но мон гуртмы чебергес мед луоз, каньыллыкъёс мед луозы шуыса тыршисько. Али но ветлӥсько гурт понна. Тани туннэ но сельсоветэ мыныны кулэ али...». Кызьы луиз ке но, Гурьян Михайловичез ужакуз но гажаллям, туннэ но гажало. Коллективеныз но со тупаса, огъя кыл шедьтыса ужам. «Гурьян дыръя умой вал шуисьёс али но вань. Сыӵе кылъёсты веракузы, шумпотӥсько. Юнме гинэ ужаськымтэ вылэм, йӧно кылын тодэ уськытӥсьёс вань бере», — пальпотэмзэ ватытэк вера Гурьян агай.

Куддыръя визь-кенеш юаса но вазисько вылэм али Гурьян Михайловичлы. Кемалась ӧвӧл юбилейзэ пусйыкуз «Труд» обществоысен кузьым но лэзиллям — одеял. Солы пумтэм тау каре воргорон. Шумпотымон пе, куке тонэ гажало но вордскем нуналэныд ӟечкыланы уг вунэто.

— Веранэз ӧвӧл, ӟечкыламзылы туж шумпотӥ. Ӧжыт ке но саклык висъязы ке, мар кулэ на мукет? — шуэ Гурьян Михайлович.

Кузпылызлэн, Галиналэн, кулэмез дырысен дас ар луэ вылэм ини. Перемечевъёс вить нылпиосты будэто — куинь пиосты но кык нылъёсты (жаляса верано, одӥг пизы кулэмын ини). Туннэ нуналэ нылпиоссы ас семьяосынызы уло ини. Покчи пиез Александр Марина кузпалэныз но Артём пиеныз атаез вӧзын улэ. Тямыс внукезлы но кык правнукезлы шумпотыса улэ Гурьян Михайлович. Али, пе, соос понна тыршыса улоно. «Инмар кӧня улыны сётоз, сомында уломы ини», — шуэ серекъяса воргорон. Али, син медаз усьы, чырткем со. Бакча ужъёсын вырыны яратэ, чипы-курегъёссэ ачиз уте, чорыганы ветлэ. «Висёнъёслы но шуг-секытъёслы сётсконо ӧвӧл» — таӵе девизэн улэ Гурьян Михайлович.