«Пичи кизиослэн бадӟымесь вормонъёссы» (фото)

Соосты уг лу ӵошатыны 10, 20, 30 ар ортчем дышетскисьёсын, соослэн туж трос аспӧртэмлыко тодон-валанъёссы, соин ик быгатонлыкъёссы но трослы пӧртэмесь луо.

Туала нылпиос туж устоесь но активнойесь. Кыӵе гинэ ужъёсын соос асьсэды уг возьмато: дышетскон, лулчеберет, спорт, проектъёс, пӧртэм ужрадъёс… Нылпиослэсь быгатонлыкъёссэс шарая усьтӥд ке, соосты зэмос дано адями карыны луэ. Огшоры «зубрилкаос» тунсыко ӧвӧл ни, туала нылпиос понна дышетскон удысын тунсыкъяськон пыӵатыны пӧртэм выль технологиос но методикаос утчано. Соин ик дышетӥсь нуналысь нуналэ нылпиен огкылысь вамышъяны кулэ. Макем юн ӟырдыт дышетӥсь сётӥське аслаз ужезлы, сокем тросгес дышетэм нылпиосызлэн вормонъёсыз но быгатонлыкъёсыз.

Туннэ статьялэн пуштросэз мыноз Вуж Кушкет гуртысь начальной школаысь дышетскисьёс сярысь. Егит кизиослэн пичи аресысен ик кыдёке пиштэмзы бадӟымесь емышъёсын берытско.

Туннэ нуналлы Вуж Кушкет гуртын, начальной школаын, дышетско 11 кузя нылпиос. Соосты дышето трос аръем опытэн дышетӥсьёс – Светлана Михайловна Карабаева но Светлана Ивановна Щербакова (кыкназы ик вордӥськемын но будэмын Вуж Кушкет гуртын). Соослэсь дышетэм нылпиоссэс огъя люкад ке, быдэс ёросэз тырмытыны луоз. Туала нылпиосты туж шуг огазея люканы, котькудзылы тунсыко ужрад шедьтыны, нимысьтыз ик удмурт кыллы яратон пыӵатыны, но та дышетӥсьёслы таӵе ужпумъёс секыт уг пото. Котькуд нунал соос нылпиосты огазеяло но улонлы дасяло. Таӵе ужрадъёслэн пайдаез адӟиське: нылпиос олимпиадаосын но котькуд конкурсъёсын призовой интыос басьто. Нимаз тунсыко ужрад ортче пичи школаын: инсценировкаос пуктон. Нылпиослэн сюлмысь тыршемзы но быгатыса сцена вылын шудэмзы дунъяське ёрос но республика лёгетъёсын. Нылпиослэн талантсы нуналысь нуналэ шарая усьтӥське.

Статьяын мынӥсь инсценировкаос гожтэмын одӥг авторен – Римма Павловна Николаеваен. Зэмзэ но, солэн выжыкылъёсыз туж пайдаё, коткудӥз адямиез малпаськытонэ уськытэ, туала дыръёсысь юанъёслы тросэзлы валэктонъёс сётэ. Инкуазь явлениос, арбериос, писпуос, пӧйшуръёс пыр автор возьматэ адямиослэсь кусыпъёссэ, дышетэ матысь адямиосын гажаса но валаса улыны. Адямилы секыт улыны пушкысь лек малпанъёсыныз, соослэсь палэнтӥськыны юртто ӟеч мылкыд но зэмос яратӥсь сюлэм.

Нырысетӥ инсценировка «Инмысь шуд» выжыкылъя кылдытэмын вал. Валтӥсь малпанэз – макем зол адями оске ӟечезлы, сокем улоназ шудэз тросгес луэ. Татын вормо лякыт но яратӥсь сюлэмо, тыршись мылкыдо луон но ог-огедлы юрттыны тыршон. Удмурт кылын пуктэм сценка туж кельшымон луиз: школаысь инсценировкаос пӧлысь конкурсын басьтӥзы вормисе потӥзы, ёросын лулчеберет юртъёс пӧлысь конкурсын утӥзы 2-тӥ инты. Нылпиослы асьсэлы но туж зэмос пайдаё ужрад луиз. Соос дышетскизы асьсэды сцена вылын лэй-лэй возьыны, репликаосты вераны, интонациос пуктыны. Анай-атайёссы но туж паймемын вал, кызьы соослэн нылпиоссы быгато пӧртэм рольёсты шудыны, персонажъёссэс яркыт возьматыны.

Кыкетӥез бадӟым уж луиз «Паймытӥсь сяртчы» выжыкыл. Котькуд адямилы тодмо ӟуч «Репка» выжыкылэз Римма Павловна туала вакытлы матын карыса гожтӥз. Нылпиос тунсыко но серемес мылкыд пыр возьматыны быгатӥзы. Туала дырлы матэктэм дано выжыкыл кельшымон луиз бадӟымезлы но, туж пичиезлы но. Пайдалыкез но  бадӟым: пичиос удмурт кылэз данъяны кутскизы, валантэм кылъёслэсь пуштроссэ валаны тыршизы, вераськоназы но удмурт кыллэн будэмез трослы адскымон луиз. Менделеевскысь удмурт культурая межрегиональной «Кылбугор» фестиваль-конкурсын I-тӥ степенё дипломен пусъмын вал. Малмыжын ортчем «Театральная весна» конкурсын озьы ик, призовой инты басьтӥзы.

Туэ дышетскон ар понна пуктэмын «Кызьы зэмос эшъёс бадярез быронлэсь утизы» выжыкыл-пьесая сценка. Пуштросэз но туж пайдаё но тунсыко: пӧртэм аръем писпуос пыр адямиослэн кусыпъёссы возьматэмын. Бадӟым дуннеын адями огназ улыны уг быгаты, солы зэмос эшъёс кулэ, кудъёсыныз ӵошен котькуд ужпумъёсты лэсьтыны юрттозы, ӝожмыт нуналъёссэ шундыё но пальпотӥсь карыны. Выжыкыл-пьесалэн пумаз туж шонер вывод лэсьтэмын «…одӥг писпу – нюлэс ӧвӧл. Ог-огедлы юрттыса гинэ вань шуг-секытъёсты вормыны быгатод». Адями калык пӧлын улыны кулэ, тышкаськытэк, лек мылкыдъёссэ шуныт но капчи малпанъёсын воштыса. Нылъёслэн-пиослэн тыршемзы адӟымон луиз - ёрос этаплэн нылпи театръёслэн республиканской фестиваляз, 12 школаос пӧлын, Вуж Кушкет гуртысь начальной школалэн коллективез вормисе потӥз.

Котькуд сценка пыр нылпилэн быгатонлыкъёсыз йыло, осконъёсыз кужмояло, асьсэлэн персонажъёссы пыр соос дышетско бадӟым улонын адямиосын кусыпъёс возьыны. Кин тодэ, оло нылпилэн мылкыдыз луоз улонзэ театрен герӟаны, оло шуг-секытъёссэ лыдӟем произведениос пыр капчиен ортчыны быгатоз. Нимысьтыз ик котькуд нылпилэн учкытэк веранъёсыз чебергес но каньылгес луо, улон шоры учконъёсыз вошъясько, удмурт кыллы тунсыкъяськонъёсыз будо, анай кыллэн чебер чузъяськемезлы синмаськыны кутско. Котькуд паласен учкид ке но, сцена вылын астэ возьыны быгатон туж  кулэ луонлык, кудӥз юрттэ адямилы азьпал улонын.

Пичи гуртысь «Ӝужась кизилиос» нуналлы быдэ яркытгес но яркытгес пишто. Асьсэлэсь быгатонлыкъёссэс соос возьмато дышетскон, театр, лулчеберет, спорт пыр. Котькудзы пӧртэм, улон шоры учконъёссы но, валанъёссы но соослэн аспӧртэмлыко. Соин ик луонлыкъёссы но туж трос, соосыз уже кутыса, пичиос али ик асьсэлы азьланяз сюрес бырйыны быгато ини. Валтӥсез – тыршонлыксы, сюлмысь уже пыриськонзы но котькуд ужзылэсь пайдазэ адӟонзы. Шонерзэ вераса, али пиналъёс ваньзэ уг на адӟо, соин ик соослэн юн сылӥсь юрттӥсьёссы вань: анай-атайёссы но дышетӥсьёссы.

Нимаз ик, бадӟым уж вылазы басьтӥзы анай-атайёс, соос асьсэос дасязы нылпиоссылы костюмъёс. Анай-атайёс зэмзэ ик бадӟым юрттэт сёто нылпиоссылы бадӟым улонэ выштыны. Соос котьку дась котькуд юанлы валэктон сётыны, кылчинъёс кадь утё соосыз пӧртэм шуг-секытъёслэсь. Котькуд анай-атайлэн валтӥсь малпанэз – нылпиезлэн шудо улонэз. Соин ик ноку но нылпилэн малпанэз пумит мыноно ӧвӧл, мед со янгышалоз, мед ас вылаз шӧдоз кыӵе шугъяськонъёс пыр ортчо солэн матысь адямиосыз. Янгышъёс – со улонлэн сыӵе ик яркыт виштыосыз шумпотонъёс кадь.

«Ӝужась кизиослы» сӥзисько азьланяз но бадӟымесь ужъёсты пумаз-йылаз вуттыны, матысь адямиоссылы котьку юрттэт сётыны. Соослэн зэмос малпанъёссы котьку мед быдэсмозы, юн малпанъёссы шонер сюресъёс пыр гинэ мед ортчозы. Оскиськом, быгатонлыкъёссэс азинтыса, соос асьсэды умой паласен гинэ возьматыны быгатозы. Нош дышетӥсьёслы сӥзисько шудбуро улон, озьы ик дышетскисьёсын огкылысь азьланяз ужаны, асьсэлэсь яратонзэс но шунытсэс сётыса, тодон-валанъёссэс будэтыны. Пичи классъёсын ужась дышетӥсьёс – нимысьтыз дуннеысь адямиос. Соос юртто нылпилы нырысь вамышъёс лэсьтыны, синтэм коӵышпиос сямен, нылпиос лыкто бадӟым дуннее, кытын соосты возьма зэмзэ но яратӥсь но сюлмо адями – нырысь дышетӥсь. Солэн ужез лыдъянтэм, быдэс дуннеын шедьтыны уз лу адямиез, кудӥз нылпиез ньыль ар кузя дышетэ улонын инты шедьтыны. Яратэ но жаля нылпиез, кыӵе гинэ уродзэ ӧз лэсьты, ноку но лек малпанъёсын дышетскисезлы уз вазьы. Соин ик зэмос бадӟым яратӥсь сюлэмо дышетӥсьлэн нылпиосыз но азьланяз трос ӟечсэ улонын лэсьто, асьсэлэсь дано кутскон сюрессэс шумпотыса тодазы вайё.

Нылпиос котьку шудо улонэн мед улозы, нош доразы котьку юрттӥсь но дэмлась адями мед луоз!

Юлия Щербакова