Пинал но егит дыръёсы вунонтэм кылизы

Умоесь, гажано редакциын ужасьёс! Нырысь ик сӥзисько тӥледлы юн тазалык, шуд, ужады выль азинсконъёс. Улонысь басьтыса гожтэм статьяос лыдӟисьёслэн сюлмазы юн мед пыӵалозы, шумпотыса мед лыдӟозы «Азьлане» газетэз.

Куддыръя мон пукисько,

Ас поннам малпаськыса.

Син азям пуктӥсько кадь

Ортчем сюресме,

Пинал но егит дыръёсме.

Тани васькисько кадь

Туж тодмо ураметӥ.

Ноку вунонтэм,

Сюлмысь кошконтэм,

Мон понна туж дуно но матын

Яратоно Вукогуртэ!

Та пичигес гинэ кылбурен малпай аслэсьтым гожъянме азьланьтыны. Бызись ву кадь, чик дугдытэк, оло улӥ, оло вӧтай, ортчиз-кошкиз та улон аръёсы. Бамез кисыри басьтӥз, нош пинал но егит дыръёсы ноку вунонтэм кылизы сюлэмам. Соин ик, дыр, котькуд вамыштэм пытьы тодэ вайытэ яратоно Вукогуртме. Оло, соин но вунонтэм, туж юн пыӵамын сюлэмам.

Ми эшъёсынымы туж юн тупаса улӥмы. Ципья школае ветлыку но ог-огмес витьыса ӵошен ветлылӥм. Сюрес вылысен пӧртэм учыръёсты вераса-серекъяса бертылӥмы. Ципья школае ветлыны кутскем бере, улон шоры но мукетгес, кышкатэк учкыны кутским. Та улонын ваньмы школа пыр потӥськом. Соин но азьло дырын дышетӥсьёсты юн гажало вал. Кивалтӥсь пионервожатой, пение урокъёсты нуиз Галиев Фарт Галиевич. Али ас поннам малпасько но, озьы вераме потэ: Фарт Галиевич вань улонзэ сётӥз школа понна. Милемыз со ансамбле гожтӥз, кытын гуртысь нылъёсын удмурт эктонэз дышетӥз, «Ялыке» шуыса нимаське вал. Кыӵе гинэ ужрад уг ортчы, ми котьку удмурт кырӟанъёсты кырӟаллямы, озьы ик эктылӥмы. Трос фотоосы но уськытылӥзы.

Улон азьлань мынэ аслэсьтыз ӧрзэ басьтыса, мар карод, тросэз эшъёсы ӧвӧл ни. Гуртын одӥг эше гинэ кылемын на — Валентина Никитина. Вордскем палъёсам берлозэ бертылыку фотоосты учкылыса пукимы. Ӵем дыръя «мар со шуд?» шуиськом. Кызьы меда сое лэсьтоно, валано, быгатыса улоно? Та Валие сярысь кӧня ке гожтытэк сюлэм уг чида. Ӵошен будӥм, коркамы но одӥг корка гинэ кельтыса вал. Азьло дырын урамъёслэн нимъёссы ӧй вал, нош туннэ нуналын вань ини. Та улон огшоры гинэ уг сётскы: шӧгзэ но кузьытсэ, ческытсэ, отын ик чырссэ но веръятэ. Улон туж юн кыдатӥз эшме: анаез огназ, улонэз яратӥсь, улон шоры туж тодыса но валаса учкись кышномурт нылзэ визь-кенеш сётыса, пӧртэм ужлы дышетыса будэтӥз. Туннэ нуналэ Валентина Валентин кузпалэныз туж шудо улонэн улэ, туж чебер из юрт вуттӥзы. Вордэм нылпиоссы ӵем вуыло доразы, со ӧвӧл-а меда зэмос шуд, узырлык! Валие, Валентин! Ваньмыз понна туж бадӟым тау. Кыӵе бадӟым куно кариды вить ар талэсь азьло бертыкумы, ноку вунонтэм, сюлэмам юн кылиз.

Мария Александрова

(Кондӥ Мани)