Пӧртэм калыкысь дышетскись пиналъёслэн слётсы (фото)

Та выллем слётэз берло аръёсы Татарстан Элькунмы, сяме пыӵатыса, арысь аре ортчытъяны кутскиз. Пумиськонлэн кулэлыкез но туж бадӟым шуыса валай, малы ке шуоно та ужрад, нылпиосыз сяна, матэ каре анай кылэз нуись дышетӥсьёсты но. Туэ, Балтаси ёросысь удмуртъёсын тодматыса, та слётэ кык нылъёсмы пыриськизы: Покчи Лӧзя школаысь 9 классын дышетскись Фомина Аделина но Шор Кушкет школаысь 10 классын дышетскись Петрова Алина. Пусъеме потэ, та нылашъёслэн татчыозь асьсэлэн но куспазы вераськемзы ӧй на вал. Татын соос ог-огенызы тодматскем сяна, мукет удмурт эшъёс но шедьтыны вуизы, телевидениысь корреспондентъёслы интервью сётыса, данэ но потӥзы.

Та 3 нунал лыктэмъёсты зэмзэ но эшъяськытӥз, пумиськонэз вунонтэм кариз шуыны луэ. Вераны кулэ, слётлэн программаез туж быгатыса но тунсыко радъямын вал шуыса.

21-аз, ӝытпал вуыса, милемды бадӟым куноосты музэн шуныт пумитаса, вань каньыллыкъёсыз луэм номеръёсы интыязы, ческыт сюдӥзы. Со нуналэ ик пиналъёслы тодматскон ӝыт радъямын вал. Татын соос асьсэ сярысь кӧня ке веразы, концертной номерзэс ӵектыса, пичияк репетиция ортчытӥзы. Тодматскемзы бере самой вунонтэмез вал, дыр, этнодискотека, кудаз пиналъёсмы уйинозь эктӥзы-позыръяськизы. Сыӵе но кельшиз со соослы, эсьмаса быдэс лагерь мушбакча кадь гужлаз.

Мукет нуналаз ӵукна слётлэн торжественной усьтӥськонэз луиз. Дышетскисьёсмы туж шулдыр, яркыт калык дӥсьёсын дӥсяськыса, концерт возьматӥзы. Ужрадэз ортчытӥсьёслэн верамзыя, «куддыръя дасяськыса но таӵе концерт ортчытыны уг луы». Отӥяз пиналъёсты нимаз, дышетӥсьёсты нимаз группаосы люкизы. Етӥз студентъёс - ужрадэз нуисьёс пиналъёсынымы шудӥзы, серекъятӥзы соосты, визьзэс но сынаны вуизы. Нош соосын огдыре дышетӥсьёслы Татарстан Элькунысьтымы Дышетонъя министерствоысь йӧскалык ужпумъёсъя ужасьёс Котырес ӝӧк сьӧрын пумиськон ортчытӥзы. Татын луонлык сётӥзы котькуд дышетӥсьлы ас малпанзэ вераны, нош асьсэос тыршизы анай кылэз дышетӥсьёслэн сюлэмшугъяськытӥсь юанъёссылы ответ сётыны. ӝыт вань лыктэмъёслы Казаньысь ТЮЗ театре экскурсия радъязы. Учкимы гуртысь туала егитъёслэсь улонзэс возьматӥсь «Очень простая» нимо комедиез.

23-тӥ коньывуонэ ӵукна слётлы йылпумъянъёс лэсьтӥзы, ваньзы татын пайдаё пумиськон ортчытӥсьёслы ӟеч кылъёссэс веразы.

Таӵе шуныт но вунонтэм пумиськонэз кемалась адӟеме ӧй вал ни. Лагерьлэн кивалтӥсез гинэ но М.Э. Хухунашвилли (национальностезъя грузинка) ми сьӧрын анай музэн ветлӥз: ваньзэсты чаклаз, экскурсиысен автобусъёсы интыяськыкумы но лыдъяса-чотаса гинэ улӥз... Сиён пӧрасьёс, утялскисьёс но милемды матысь муртсэс сямен адӟизы, котьку мыло-кыдо вераськизы. Таӵе матысь кусыпъёс туж шумпоттӥзы милемыз.

Пор но удмурт, чуваш но мордва - ваньзы татын, одӥг липет улын, бадӟым семья кадь улӥзы. Ас калыкеныд но солэн лулчеберетэныз данъяськон та ужрадын туж вылӥе пуктэмын вал. Мынам малпамея, ас калыктэ но лулчебереттэ гажан анай-атаез яратон бордысь потэ...

Наталия АНТОНОВА
ёросысь удмурт кылъя дышетӥсьёслэн

огазеяськонзылэн кивалтӥсез