Секыт ке но, ужезлы уг ӝожтӥськы

Туала улонын компьютер, телефон пушкы выем куд-ог нылпиос уг но тодо ни, дыр, кин со — почтальон. Нош азьло дыре почтальонэз «Инмар анай» интыын адӟиськом вал. Мамында газет-журналъёс пото вал, мамында гожтэтъёс берто вал пӧртэм сэрегъёсысь. Солдатлэсь-а, городэ кошкем нылпиослэсь-а, ӵыжы-выжыослэсь-а — иворъёсты гожтэт пыр гинэ тодӥськом вал. Со понна ик почтальон дуно, гажано адями вал. Капка выжые потыса почтальонэз витиськомы вал, кыӵе иворен шумпоттоз меда туннэ шуыса. Сомында газет-журналъёслы но гожтӥськиськомы вал со дыре.

Нош али дыре газет-журналъёслы гожтӥськись туж ӧжыт ини, озьы ке но почтальонлэн ужез ӧз кулэсмы, тросгес но луиз, дыр. Туннэ нуналэ соос коммунальной тыронъёсты но люкало, пенсия, субсидия уксёосты сётъяло, со сяна асьсэ почта магазинъёсысьтызы товаръёсты но вузало. Котькуд почтальонлы, гурт калык лыдзэ учкыса, план но пукто, лэся.

Мынам та статьяме сӥземе потэ одӥг почтальонкалы — Зайнуллина Екатерина Ивановналы. Со улэ Вуж Ципья гуртын. Ас ӧнерезъя ужа Ципьяысь нылпи садын медсестра луыса. Отын со 120 нылпилэн тазалыкез понна кылкутэ. Соосты ӵукна ваньзэсты пумита, нош ӝыт келя. Та ужын со 32 ар ужа ни. Со ужаз тыршемез сяна, Екатерина Ивановна почтальон но луэ али. Соиз паймымон: одӥг гуртын гинэ ӧвӧл, куинь гуртын (Ципьяын, Тагашурын, Вукогуртын) почтальонлэсь ужзэ быдэстыны вутске со.

Кызьы со ваньмаз вутске, кызьы со ваньзэ ужа? Та юанъёслы ответсэ тодэ, дыр, со ачиз гинэ. Садикын нышыракузы, обед куспын бызе почтае — вутскемзэ ужа, нош кылемез ӝытлы ужаны кыле. Ачиз руль сьӧрын ветлымтэ бере, туж секыт йӧтэ ини — Екатерина я велосипедэн ветлэ, я солы семьяез юрттэ, я кинэ ке газетэз нуыса кельтыны курыны но тупа. Гуртъёсыз но Ципьялы матэ интыяськемын шуыны уг луы. Тросаз учыре юрттэ Ципья почта ёзэтлэн кивалтӥсез Яковлева Альбина Вячеславовна но.

Екатерина Ивановна та ужын 25 ар ужа ини, ужзэ туж яратӥсько шуэ. Тросаз гуртъёсын коммунальной тыронъёсын гурт калык почтальонъёс доры ачиз ветлэ, нош Екатерина Ивановна ачиз коркаос кузя ветлэ. Азьвыл ик тодэ ини: гужем вуиз ке, гурт калыкез юртысьтыз уд шедьты. Адями я турын дася, я боры бича. Озьы бере, одӥг адями доры 2-3 пол но мыныны тупа. Сӥзьыл ке вуиз, адямиосты картофка бакчаосысьтызы утчаса ветлӥсько шуэ. Со сяна, сомында  товаръёсты но вуза али. Котькуд пенсионер доры пенсия сётыны мыныкуз товарзэ (туалетной бумага, консерва но мукетъёссэ) ӵектэ. Кияз сомында товар ӝутъяса, нуллыса, пуктэм планзэ тырмытыны тырше. Сыӵе секыт ке но, Екатерина ужезлы уг ӝожтӥськы.

Огпол мыным соин ӵош почтае мыныны тупаз. Мон соку солы туж пайми. Солэн вамышъёсыз сыӵе кузесь, сыӵе ӵемесь. Мон солэсь егитгес ке но, со сьӧры вамышъяны ӧй вутскы, ас поннам гинэ «ворттӥсь валъёс кадь кошкиз, ужез сыӵе бере, со дышемын ини» шуыса малпай.

Котькуд гуртын Екатеринаез гажало, ярато. Кинлэсь гинэ эн юа — пиналэзлэсь-а, мӧйыезлэсь-а — котькудӥз со сярысь шуныт кылъёссэ вералоз, ушъялоз. Июль толэзьлэн кыкетӥ воскресеньеяз пусъё почтальонлэсь нуналзэ. Соин валче Екатерина Ивановнаез ӧнер праздникеныз ӟечкыласа,  сӥзисько тазалык, шудбур, каньыл улон. Котьку но таӵе чырткем мед луоз. Быръем ужез аслыз шумпотон гинэ мед ваёз. Та ӟечкыланме вань кадь тодмо почтальонкаослы но сӥзисько.

Ассэ нимамтэ лыдӟисьлэсь

Фото: Семья архив.