Шудо но, шудтэм но

Пичи шурмы но, аслэсьтыз батырлыксэ возьматыса, ярдуръёсысьтыз потыса, котыр вӧлске. Куашетӥсь тудву пересь топольёсын чупаськылэ, ненег бадьпуосты ӟыгыръя. Тапала уӵыос но, оло, мукет гуртъёсы сярысь, вазьгес лыкто. Льӧмпуос, улмопуос, чияпуос тӧдь буртчинэн шобырско.

Инкуазь вань чебереныз данъяськыса, кильтыръяськыса сылон дыре асьме калык дано нуналэз — Вормон праздникез — пусъе.

Школаын дышетскыкумы, та нуналэ ож сюресъёсты ортчем, дары зыно тылӝу пыр потэм адямиосты ӧтьыны тыршылӥм. Сыӵе пумиськонъёс арлы быдэ ке но вал, пӧлысьтызы нылкышноосты огпол но ӧй пумита. Ож мышкын тыршисьёслы, гудыри сюресэз ортчемъёслы кадь, сӥ-дан ӧзгес йӧтылы. Таиз ини асьмелэн берыктыны луонтэм янгышмы.

Анае пичи дырысьтыз эшез сярысь ӵемысь мадьылоз вал:

— Ож сюресэз со воргоронъёсын огкадь ортчиз. Шудо но, шудтэм но та Марья, — йылпумъялляз веранзэ, бычырам синкылиоссэ кимышкыныз ӵушылыса.

Йырвизьмам чилектылӥз: «Уть ай, шудтэм шуд луыса потэ ук! Малы меда эшсэ шудоен лыдъялляз? Ож тылӝуысь улэпен берытскемысьтыз, вылды. Нош малы шудтэмен? Соиз сярысь вератэк но валамон кадь. Кин-о со секыт ож аръёсы курадӟонэз, сютэм улонэз, секыт ужез ӧз адӟы?»

Огпол, анае егит дыр эшез сярысь мадьыку, юатэк ӧй чида:

— Анай, нош Марья апайлэн медальёсыз вань-а? (Мон соку медален муртэ одно героен лыдъялляй, Юрий Гагаринэн оградэ пуктылӥ).

— Вань, пие, вань. Одӥг гинэ ӧвӧл — трос. (Анае эшезлы сётэм юбилейной наградаоссэ но лыдэ басьтэм, луоз).

— Вот геро-ой!..

Гуртамы Мырей Кузьмалэн но семьяез, ваньмызлэн сямен ик, нылпиосын узыр вал: куинь пиос но кык нылъёс! Таза тысь, небыт музъеме шедьыса, выжызэ пыдло лэзе. Вылӥе ӝутскыны солы шундылэн небыт тылсиосыз но шуныт зор юртто. Будос ялан юнма, кужмоя. Тани-тани вӧлак усьтӥськозы сяськаян мульыосыз.

Та семьяын но озьыгес вал. Ужез гажась муртъёс кӧттыро улӥзы. Анай-атайзы колхозын ужаны сюлмоесь вал. Ӟеч, шуныт кыллы но шырытэсь. Собере пиналъёссы но юртъеразы юрттӥськыны вуизы ни. Талы-а уз шумпоты анай-атай сюлэм?

Но чебер гужеме пуромытэм война шудо малпанъёсты, жингырес кырӟанъёсты тури-пари тугаз. Юртлэсь кузёзэ, Кузьма агаез, мукет гуртооссэс сямен, пырак оже ӧз ыстэ. Бронь сётыса, ож тӥрлык поттӥсь заводэ ужаны келязы. Пелагей кенаклэн пельпум вылаз вормонтэм ныпъет усиз: юрт кутон, пудоосты утён, колхозын тыршон, вить нылпиоссэс будэтон. Бадӟым нылыз Марья гинэ юрттӥськыны вуэмын ай — солы дас тямыс арес. Кыкетӥ нылызлы, Наташалы, медучилищеын дышетсконзэ куспетӥ карытэк ӧйлась. Кызьы-о семьяедлы юрттӥськытэк? Арлыдыз вуытэк ке но, колхозын ужаны бертӥз. Нош пиос? Таосыз тэшкылиос вал на. Бадӟымезлы, Аркашлы, дас арес, Кимилы — ньыль, нош Миша вынзы атайзы кошкыку гинэ вордӥськыса кылиз.

Заводъёсын но, ож лудын кадь ик, шутэтскон сярысь малпаськыны ӧз дӥсьтылэ. Кӧттыр но сыӵегес вал. Нянез ожгарчиослы келяны тыршылӥзы угось. Сютэм улон, секыт уж таза воргоронэз но куасалтыны вормизы. 1943-тӥ арын, тифен висьыса, Тимофеев Кузьма югыт дуннеен люкиськиз. Озьы кышномуртэн вить пиналъёс яратоно карттэк но атайтэк кылизы.

Удмурт калык кемаласен верам-пусъем: «Йӧ кытӥ векчи, отӥ ик чиге». Та семьялэн но улон-вылонэз сыӵегес луиз. Анайзы, ошмес вулы васькыкуз, гылӟыса усиз но пыдзэ сӧсыртӥз. Эмъяськонниосы нуллӥзы ке но, пайдаез ӧз шӧдӥськы, йӧнатыны ӧз быгатэ. Мар ватонэз, усто эмчиос фронтэ келямын вал, фронт мышкын ӧжыт дышетскем сестраос тыршизы. Озьы Пелагей кенак боды вылэ пыкъяськыса ветлыны кылиз. Куамын ар — кулытозяз — «куинетӥ пыдыныз» ӧз люкиськылы ни.

…1944-тӥ ар. Асьме ожгарчиос, тушмонэз чигнатыса, данак каръёсты, гуртъёсты мозмытыса, азьлань мыно ке но, ожмаськон ыштонъёстэк уг луы. Бырем калык миллионъёсын лыдъяське ни.

…Вуж Турья гуртэ но дасоосын «сьӧд гожтэтъёс» курыт кирень кадь куректон иворъёсын вуизы. Будӥсь егитъёсты военкоматын чакласа гинэ уло. Котькыӵе усто ож тӥрлык вань ке но, ожгарчиостэк тушмонлы пумит нюръяськыны уг лу уго.

Огнуналэ кызь аресъем Тимофеева Машаез но Ципьяысь военкоматэ ӧтизы. Нылъёслэсь тазалыксэс эмчиос эскерем бере военком, ваньзэс огазе люкаса, котыръятэк шуиз:

— Фронтэ, нылъёс! Шаермылы юрттэт, выль кужым кулэ.

Чебер гужем. Гуртэ кылем калык тани-тани Шошмо шур вӧзысь возь вылэ турнаны васькоз. Кыӵе ӵыдонтэм та вадес гуртын — инкуазь чеберлык ласянь но, жингырась ужгур ласянь но.

Инвожо толэзьлэн тямысэтӥ нуналаз Тимофеева Машалы но ож сюресэз мытоно луиз. Келясьёс трос ӧй вал. Кытын ни ас ёзъёстэ люкан?! Пиос ожмасько, тросэз бырыны шедизы ни. Нылъёс ож тӥрлык поттон заводъёсы, чугун сюрес лэсьтонэ, окопъёс гудонэ, нюлэс коранэ келямын.

Сюрес вылын со бускель Сизнер гуртысь ачиз кадь ик егит удмурт нылашен Мырыкова Матрёнаен эшъяськиз. Та выль сюрессы нылъёсты Пор шаерысь ожгарчи лагере вуттӥз. Ма вите-возьма соосты азьпалан?

Суслонгер лагерь. Таиз сярысь рос-просгес гожтытэк уг лу. Малы ке шуоно отчы вуылэм фронтовикъёс, со сярысь тодазы уськытыку, одно синвуасько. Воргорон но, кышномурт но синкылизэс кутыны уг быгато. Малы?

Та ожгарчиослэн лагерьысьтызы начальникъёс лушкем ужало вылэм. Соос, пе, шаермылэсь-кунмылэсь кужымзэ лябӟытыны тыршизы кадь, татчы шедемъёсты мыскыл карылӥзы. Калыкез сюдон, пе, ньӧмыз понна гинэ радъямын вал. Шутэтскыны но дыр чик уг сёто, весь ужато, ужато. Нош кыӵе уж? Нуназеозь одӥг интыысь кирпичъёсты мукет азе нуллыто ке, сиськем нерге каремзы бере азьвыл интыяз ик тырыто. Татчы шедемъёс, пе, ож лудъёсы тазалыксы юн лябӟыса вуо ни вал. Ожмаськон ужлы но ньӧмыз понна гинэ дышетэмъясько. Кытчы ке вылӥе гожты вылэм, но гожтэттэ кызьы ыстод? Зэм, улыса-вылыса Москваысь лыктэмъёс со начальникъёслэсь кырсь ужъёссэс шараяллям но «война дыр законъя» кыл кутытӥллям.

Та сярысь ветеранъёслэсь огпол гинэ кылэме ӧвӧл. Озьы ке но, тодэме сярысь Тимофеевалы ӧй поттылы — юай:

— Та лагерьын тӥледыз оже мыныны дасязы-а, Мария Кузьминична?

Пужмерам йырсиоссэ кышет улаз лач-лач октыса, Марья апай секытак лулскиз:

— Суслонгер туж сютэм улон инты вал. Нылкышноослы выл дӥсь но, пыдкутчанъёс но дасяллямтэ. Соин ик асьме дӥськутэн, кутъёсын ветлӥмы. Ӵукнаысен ожмаськыны дышето, собере олокыӵе но ужъёсты быдэсъяськом, отӥяз нош ик дышетскиськом. Азбармы изо-кӧльыё. Отӥ ветлыса, кутъёсмы ӝог бунӟизы-пӧсьтӥзы. Гольык пыд кылим. Со дырез тодам вайисько ке, али но быдэс мугоры юзыр-кезьыр луэ.

Мынэсьтым ватыны тыршысагес, Мария Кузьминична кышет пумыныз синкылиоссэ ӵуше. Та шимес нуналъёсты вунэтыны турттыса кадь, веран-мадёнзэ ӝоггес йылпумъяно кариське:

— Пыдъёсмы вирӟектэмын. Тросэз ветлыны, лёгаськыны уг быгато ни. Собере гинэ ныл солдат дӥськутъёс сётӥзы. Отӥяз ини та лагерьысь кошкон нуналмы но вуиз.

Эшелонзы Ладожской тылы матэ дугдӥз. Фронт кыдёке кошкемын ӧвӧл на. Инбамын кышкыт гуретэм кылӥськылэ, дырын-дырын зениткаос улӟыло. Нылъёс ожмаськонэ пыриськытэк но жадемын ни. «Эх, уськытскы но турын-куар пӧлын шутэтскы вылэм!» — малпаллязы соос.

Огпол строе султэм егит нылъёслэсь командирзы юаз:

— Кин вал кыткыны быгатэ?

Машалэн соку ик син азяз пуксиз Вуж Турья гуртысь вал гид, отысь валъёс. Воргоронъёс оже кошкем бере уго солы, вал кыткыса, пӧртэм ужъёсты быдэсъяно луиз ни вал. Синзэ кыньыса но валэз кыткыны-юскыны йӧндырысал, дыр. Соин ик Тимофеева куинь гурт нылъёсын ӵош одӥг вамыш азьпала потӥз.

Капитан, нылъёсты вӧзаз ӧтьыса, югдурез валэктӥз, приказ сётӥз:

— Вал кыткелэ но та сюрес кузя — азьлань. Только сюреслэсь палэнэ эн кожалэ: ортчем ож интыосысь минаос октэмын ӧвӧл на. Ужды сыӵе: та сюрес вылысь бырыны шедем ожгарчиослэсь шӧйёссэс октоно.

— Ӝокыт пӧсь гужем, — тодаз вае Мария Кузьминична. — Асьме боецъёслэн но, немец солдатъёслэн но шӧйёссы утялтэмын ӧвӧл. Тушмон сокем ӝог чигнам, лэся, — бырем эшъёссэс ватыны но вуиллямтэ. Ми, егит нылъёс, кулэм муртъёслэсь шӧмаськом-юрдӥськом но, амалтэк тыршиськом. Озьы быдэс толэзь пала быремъёсты сюе согылӥм, сӧсырмемъёсты ож лудысь санчасте-госпитале поттылӥм-нуллӥм на. Бератаз Капрал нимо валмылэсь мозмытскыны муг шедиз ик: госпитальын кыллись солдатъёслэсь дӥськутсэс, валес котыръёссэс миськыны косӥзы.

Отӥяз «шуныт азьын» пуконзы йылпумъяськиз. Ӝоген соосты Мурманск пала нуизы.

Мурманск дорысен нылъёс землянкаосы интыяськизы, ожгарчи ӧнерлы дышетскон борды басьтӥськизы. Озьы соос зенитчицаос луизы но ӝоген тушмон самолётъёсын ожмаськыны кутскизы. Мар веранэз, нырысь-валысь та ужзы туж кышкыт но, секыт но йӧтэ вал. Но адями, пе, ӟечезлы но, уродэзлы но дыше. Бератаз Тимофеева ефрейторен но озьыгес луиз. Вадьсазы шимес вузӥсь самолётъёслэсь но курдамысь дугдӥз кадь. Со куараез кылыса, нылъёс зенитказы доры бызё но ыбылыны ӧдъяло. Котыразы пуштылонъёслэсь но сюлэмзы сокем уг шымырскы ни, вӧзысьтызы сӧсырмем эшъёссылы но ӝегатскытэк юрттэт сётыны, утялтыны тыршо.

(Азьланьтонэз вань).

Николай Никифоров

(«Азьлане», 2005-тӥ ар, №37, №38)