«Сю пӧртэм сюрес тӥледыз возьма на»

Туэ выпускникъёс понна одӥгез бадӟым шугъяськон ортчемын – кун экзаменъёс ӟечен сётэмын, баллъёс люкамын, аттестат басьтэмын, кылемын на азьланяз дышетскон но улон сюрес утчан. Нылпиослэн йыръёсазы туж трос малпанъёс, шугъяськонъёс, озьы ке но соослэн быгатонлыкъёссы одно ик шонер сюресэ вуттозы. Туала нылпиос визьмоесь, шаплыесь, пӧртэм ужрадъёсы пырисько, олокыӵе ӧнеръёсын но асьсэды возьматыны быгато. Дышетскон – бадӟым уж, арысь аре секыт но секыт луэ. Дышетскисьёс ваньзэ капчиен ортчо, мукет ужрадъёсы но вуттӥсько: спортын, лулчеберет удысын, политикаын, инкуазь шугъяськонъёсын, дуннеез эскерон ӧнерын, техника паласен юанъёсын...

Олег Николаевич Исаев нимо Шор Кушкет шоръёзо школаын туэ дышетскон ар понна 4 выпускникъёс. Малпалоды, малы нимысьтыз та нылпиос сярысь гожтӥсько? Валэктонэ вань: магистратураез йылпумъяса, мон вуи дышетскем школаям ик. Удмурт кылъя но литературая урокъёсты дышетыны сётӥзы 7-тӥ классын, туэ со классысь дышетскисьёс школаез йылпумъязы. Егит дышетӥсь понна котьку секытэн сётӥсько нырысетӥ урокъёс. Мон понна урокъёс каньылэн ортчизы. Пиос но нылъёс туж кескич но кышкась синъёсын учкизы пинал дышетӥсь шоры. Аслым пуктӥ сыӵе инъян: аслэсьтым кышканме возьматӥ ке, нылпиос но кышкалозы, соин ик соосын одӥг мылкыдын ужано.  Ас дышетскон аръёсысьтым историосты вераса, улонын кулэ луись дэмланъёсты сётыса, каллен-каллен ог-огмы борды дышыны быгатӥм. Собере сюресъёсмы люкиськизы: англи кылэн покчи классъёсты дышетыны кутски. Аръёс туж ӝог ортчизы… Шӧдтэк шорысь, куартолэзе син азям пуксизы веськрес, ӝужыт, визьмо нылпиос. Выпускникъёс шоры туж шумпотыса учкисько, соослэн ӝуась синъёссы уг кышкало пӧртэм пумо ужъёсты быдэстыны. Нош мынам бурдъяськем мылкыды соослэсь троссэ возьма: кыӵе удысын соос асьсэды шедьтозы, быгатозы-а асьсэлэсь луонлыкъёссэс бадӟым улонын кутыны. Та юанъёслы валэктонъёс сётыны быгатомы дыр ортчыса гинэ. Нош али каньыл, шудо мылкыдын ӟечкыласько нылпиосты тросэз пӧлысь одӥгзэ лёгетэз ортчеменызы. Оскисько: соос котькуд пумиськись секыт учыръёсысь капчиен потыны быгатозы шуыса.

7 ар куспын соос будӥзы. Классэн кивалтӥсьсы, Мария Викторовна Прокопьева, ачиз пинал луыса, соосын ӵош будӥз, нылпиосын ужан сюрессэ нуналысь нуналэ юнматӥз но умоятӥз. Та аръёс ӵоже Мария Викторовна нылпиосыныз вань шуг-секытъёсты ортчиз, шумпотонъёсты люкылӥз, котькыӵе ужрадъёсы рос-прос дасяськыса пыриськылӥз, аслаз ӟеч мылкыдыныз котькуд нылпизэ пичи ӟазегпиез сямен бурд улаз шунтыса возиз. Котькудӥзлы нимысьтыз кылъёс шедьтыса, бордаз кыскыны быгатӥз, озьыен, зэмос классэн кивалтӥсь луиз. Соин ик туннэ нуналлы солэн нылпиосыз но ачиз кадь котькытчы вутскисесь, шаплыесь но каньыл мылкыдоесь.

Вань ужрадъёс ортчем бере, нылпиослэсь азьпал сюрессы сярысь юаны ӧдъяй. Соослэн верамъёссы мон понна туж серьёзноесь, котькудӥз ассэ тырше кельшымон ӧнераз шедьтыны. Тӥледыз соосын но соослэн малпанъёсынызы тодматэме потэ.

Дина Михайлова: «Вылӥ дышетсконниын дышетсконлэсь быгатонлыкъёс но выль адямиосын тодматсконъёс возьмасько. Улонам ас быръён дыр вуиз, котькуд паласен будон. Мынам малпанъёсам кык пӧртэм ӧнеръёс: лулчеберет но юриспруденция. Кытчы вуттоз улон сюрес, уг на тодӥськы. Ас кужымъёсылы оскисько ке но, озьы ик монэ сюлэмшугъяськыто на мукет ужпумъёс но: тодмотэм интыын улон, ас вылам туж бадӟым кылкутон басьтон. Табере дыр вуиз азьланяз дышетскон инты бырйыны но вань малпанъёсты улонэ пыӵатыны».

Дина вордӥськиз Ӟаны гуртын, со туж тыршись егит нылаш. Мынам малпамея, туэ дышетскон ар со понна туж тунсыко, пайдаё ортчиз. Ортчем Кукмор ёросысь Элькун «Гырон быдтонын» «Чеберина-2023» конкурсын 1-тӥ луиз. Зэмос удмурт нылаш: спортын, дышетсконын но лулчеберетын ассэ пӧртэм сямен возьматӥз. Вань тыршемъёсыз вылӥ дунъямын вал – нылаш зарни медален пусъемын. Ёросмы понна туж яркыт ӝуась кизили вордӥськиз.

Оскисько, Диналэн вань малпанъёсыз быдэсмозы. Азьланяз но улоназ бадӟым вормонъёсыз луозы, солы оскем ужъёсты каньылэн быдэстыны быгатоз.

Яна Гришкина: «Азьпал улонме эмъян удысэн герӟаны малпасько. Вуоно дышетскон интые пыронлэсь теория но практика ласянь быгатонлыкъёсме юнматыны но будэтыны ӧдъясько».

Яна вордӥськемын но будэмын Пор-Кутеш гуртын, котькуд ласянь быгатӥсь нылаш, дышетскон дырзэ пайдатэк ортчытэмзэ адӟеме ӧвӧл. Спорт удысын но, дышетсконын но ассэ умой возьматӥз.

Татьяна Иванова: «Туннэ нуналлы шуг на пумаз вуттэм валэктон сётыны. Вылӥ дышетсконние пырыны дыр ӧжыт сётэмын, гужем шутэтскон вакыт вал котькуд каникулэ. Малпасько, ваньмылэн ваньмыз умой луоз, котькудмы шонер быръем вылӥ дышетсконниямы пырыны быгатомы. Мон понна валтӥсез – ӵош дышетскем эшъёсыным кусыпъёсты возён».

Таня бускель Вылӥ Субаш гуртысь нылаш. 9 классэ йылпумъяса, 10 классэ Шор Кушкет шоръёзо школаын азьланьтыны малпаз. Пыриськыны классэн кивалтӥсез но ӵош дышетскись эшъёсыз юрттӥзы. 2 ар куспын нылаш ассэ спорт паласен усто возьматӥз. Тыршемъёсыз пусъемын вал ёрос масштабен – «Арлэн спортсменэз» нимын. 

Василий Терентьев: «Экзаменъёсты умойгес сётыны малпасько вал. Котькуд экзамен ортчем бере, аслэсьтым кужымме ачим дунъяны быгатӥ. Малпанъёсы герӟаськемын вылӥ дышетсконниосысь физико-математической ӧрен. Валасько, умой дышетскон понна туж сак луоно, дыраз лэсьтоно вань куронъёсты, пӧртэм удысъёсын возьматыны тыршоно. Школаын дышетсконэн ӵошатыса, табере воксё мукет улон кутске – дышетӥсь сьӧрамы уз ни ветлы, ӧд ке лэсьты дыраз – тынад шугъяськонъёсыд. Тау карыса тодамы ваёмы на школаысь дышетӥсьёсты, эшъёсты, ми понна соос улонысь нырысь кутскон сюрес».

Вася Ӟаны гуртысь. Бадӟым семьяысь 5-тӥез покчи нылпи. Классаз одӥг гинэ пияш, кудӥз котькуд дышетӥсьлэсь верамзэ йыраз возиз, куронъёссэ дыраз лэсьтылӥз. Сямызъя но Вася туж умой пияш, каньыл вераськись, пальпотӥсь, аслэсьтыз урод мылкыдзэ мукетыз вылэ ноку но уз выжты. Пияш понна валтӥсез – кылкутонэз ас вылаз басьтыны уг кышка. Мон понна, Васялэн зэмос егит пиш луэмез азьланяз но солы юрттоз. 

Гажано егитъёс! Самой бадӟым ужды лэсьтэмын. Тӥ – самой устоесь но дӥсьтӥсесь. Азяды усьтӥсько пӧртэм сюресъёс, соос олокытчы но вуттозы. Асьтэлэсь быгатонлыкъёстэс но дӥсьтонлыкъёстэс котьку уже басьтыны тырше. Эн кышкалэ янгышъёс лэсьтыны: соос тӥледлы шонер сюрес возьматозы. Туннэ тӥляд йырады трос малпанъёс, котькуд адями тӥледлы вералоз вылӥ дышетскон инты сярысь, ужаны пырон сярысь. Но тӥляд ӵыдонтэм кужымды тӥледыз бадӟым сюресэ вуттоз. Оске ас кужымдылы, сюлэмдэс кылзэ но азьлань сюрестэс шонер ортче. Луозы пӧртэм дыръёсты но, котькуд адямилэн соос вань, валтӥсез – шонерзэ быръён. Азинсконъёс тӥледлы котькуд быръем удысады!

Юлия Щербакова