«Шукыё» шудо нунал

Нылпиос понна трос пӧртэм тунсыко ужрадъёс ортчизы. Ӟаны лулчеберетъя юртын но аспӧртэмлыко шутэтскон нунал радъязы.

Гужемлэн нырысетӥ нуналэз туж чебер, пӧсь куазь кузьмаз. Зэмос гужемлэн тусбуез но пальпотонэз котырак шумпотон мылкыд пыӵатӥз но улосэз улӟытӥз. Улонлэн кышкыт вакытэз омырын шӧдӥське ке но, нылпиослэн пичи дырзы каньыл ортчыны кулэ, со понна ик ожмасько асьмелэн воргоронъёсмы, лэсьтӥсько сюресъёс, пӧртэм юртъёс, выль технологиос вордӥсько, удысъёс азинско, азьпал улон радъяське.

Сыӵе ик мылкыдын Ӟаны гуртысь анайёс но малпазы нылпиослы шумпотон нунал кузьманы. Гуртысь дышетӥсьёс-анайёс — Анна Григорьева но Олеся Яковлева — лулчеберетъя юртэн кивалтӥсьлы сыӵе аспӧртэмлыко ӵектонэн вазиськиллям, нош Алефтина Иванова ини аниматоръёсын герӟаськыса, вераськыса ваньзэ радъям. 

Ужрад туж тунсыко, жингрес куараё ортчиз. Шулдыр вал нылпиослы но, анайёслы но. Соос ваньзы огазе шулдыръяськизы, эктӥзы, шудӥзы. Карамелька но Компот (сыӵе вал аниматоръёслэн нимъёссы) нылпиосын одӥг «тулкымын» уязы кадь. Нылпиослэн шумпотӥсь ымныръёссы но серекъямзы котыр улосэ капчи мылкыд вӧлмытӥзы. Бурдъяськем эмоциос нокинлы интыяз пукыны ӧз сётэ, ялан тэтчаны, маскаръяськыны ӧтизы. 

Нимысьтыз шумпотон вайиз «шукыё» позыръяськон. Татын ини нылпиослы сюбегатонъёс но могӟетъёс ӧз кылдэ. Пичиез но, шоро-куспоез но, али гинэ ветлыны дышетскисез но ваньзы огкылысь «визьтэмъяськизы». 

Ужрад сярысь анайёслэсь но юалляськыны луонлык кылдӥз. Соос но пичиос кадь туж шумпотӥзы таӵе аспӧртэмлыко ужрадлы. 

— Туж умой ваньмыз ортчиз, тунсыко. Нимысьтыз вань нылпиос ужрадлэсь «шукыё» люкетсэ возьмазы. Мынам кык аресъем нылы но куанӥз. Бадӟымъёс но, нылпиос но мыло-кыдо пыриськизы, шулдыръяськизы. Туж шулдыр нунал ортчиз, — шуэ кык нылпиё егит анай Анастасия Мамыкова.

— Ужрад туж синмаськымон но тунсыко ортчиз! Аниматоръёс но сыӵе чырткемесь но быгатӥсесь вал. Нош шукы лэзем бере нылпиослы эшшо но шулдыр луиз. Дорамы туж жадьыса, но тыр мылкыдо бертӥм, — малпанъёсыныз люкиськиз трос нылпиё анай Наталья Терентьева. 

Будӥсь поколение — самой юн инъет кылдытӥсь «удыс». Азьпалан соос кунмылэн оскымон адямиосыз мед будозы шуыса, пичи дырысен ик соослы шонересь малпанъёс верано, пыӵатоно. Со дыре ик нылпиос понна вунонтэм «визьтэмъяськон» дыр кузьмано, кудаз соослэн трос шумпотонъёссы но. 
Нылпиослэн серекъямзы но шудо улонзы котыр мед вӧлмоз. Соослэн каньыл азьпал улонзы но азинскемзы — туннэ нуналэ самой бадӟым ужпум. Котькуд нылпи шудо, таза но тыр семьяын мед улоз! Вань кышкытъёс но шуг-секытъёс пыр потоно медаз луэ! Яркыт шунды но чагыр инбам мед вӧлмоз йыр вадьсамы!