Шуныт пумиськонъёс

8 март — со туж паймымон но туж ненег тулыс праздник. Со аспӧртэмлыко нунал, шуныт шунды сиосын, нылкышно пальпотонэн, трос чебересь сяськаосын пачылмем нунал.

Нылкышноослэн калыккуспо нуналзылы сӥзьыса, Ярак-Чурма гурт клубын 4 южтолэзе туж чебер концерт возьматӥзы. Туэез ар асьме элькунамы йӧскалык лулчеберетъёслэн но сям-йылолъёслэн арзы луэ бере, удмурт но ӟуч кырӟанъёсты кырӟазы, удмурт, ӟуч но бигер эктонъёсты эктӥзы концерт возьматӥсь нылъёс но пиос.

7 южтолэзе Ярак-Чурма покчиёзо школаын дышетскись пиналъёс, нылпи садэ ветлӥсь воспитанникъёс но туж шулдыр концерт возьматӥзы. Таиз сӥземын вал 23 февральлы но 8 март праздниклы. Нылпиос озьы ик эктӥзы но кырӟазы, трос чебересь кылбуръёс мадизы, тунсыко сценка но пуктӥзы.

7 южтолэзе ик ӝыт библиотекаын нылкышноос понна «Нота вдохновения» ним улсын интеллектульной шудон ортчиз.  Отчы пыриськизы 3 пӧртэм поколениысь нылкышноос но нылъёс. Шудон сӥземын вал крезьгурлы. Таиз ужрадмы но туж шуныт пумиськонлы пӧрмиз.

Мария Матвеева, Ярак-Чурма гуртысь библиотекаен кивалтӥсь