Та нунал календарьын гордэн пусйымтэ

Та нунал календарьын гордэн тодмостымтэ ке но, пусйиське со быдэс Россиын. Со — Берпуметӥ гырлылэн праздникез, кудӥз туэ православной праздникен но тупаз — Николай Чудотворецлэн нуналэныз, сое Инмарлэн яратоно муртэз луыса гажало. Данъямон со луиз ас адямиез жалян сямыныз.

Россиысь Геройлэсь Олег Николаевич Исаевлэсь нимзэ нуллӥсь Балтась муниципал ёросысь Шор Кушкет школалэн актовой залаз люкаськиз быдэс школа. Укно сьӧрын кема витем, ӟечсэ сӥзись зорлэн куараез кылӥське. Фанфара куараос улсын сцена вылэ пото ведущийёс. Праздниклы сӥзем линейкае ӧтисько 11 классын дышетскисьёс (классэн кивалтӥсьсы Исаева Н.Ю.) но 9 классын дышетскисьёс (классэн кивалтӥсьсы Прокопьева М.В.).

Чузъяське гимн. «Берпуметӥ гырлы» праздниклы сӥзем линейка усьтэмен лыдъяське. Кыл сётӥське школалэн директорезлы Грахов Константин Викторовичлы.

Туннэ праздникын уно куноос. Соос пӧлын — ТР-ысь Кун Кенешысь бюджетъя, вытъя но финансъя Комитетлэн председателезлэн воштӥсез Камиль Асгатович Нугаев. Со ӟечъяське вань люкаськемъёсын, школаез йылпумъясьёсты улонысьтызы выль вакытлэн кутскеменыз ӟечкыла но ваньзылы азинскон сӥзе.

Ӟечкылан кылзэ вера Балтась ёросысь исполнительной комитетлэн дышетонъя управлениезлэн кивалтӥсез Алия Юнусовна Шагаева.
Собере кыл сётӥське Шор Кушкет гурт поселенилэн главаезлы Юрий Михайлович Перфиловлы но «Дуслык» возёсысь представительлы Сергей Геннадьевич Чириковлы.

Сцена вылэ ӧтисько дышетсконын но творческой улонын асьсэды мыло-кыдо возьматэм, вордскем школазэс азинтонэ бадӟым люкетсэс пыртэм, ас тыршеменызы нимысьтыз ушъянэн пусйымон дышетскисьёс. Со — дышетсконысь отличникъёс, олимпиадаослэн муниципал но республика этапъёсазы вормемъёс но призёръёс, «Арлэн дышетскисез» (Евдокимов Виталий), «Арлэн активистэз» (Михайлова Дина), «Арлэн спортсменэз» (Михайлов Алексей) луэм нылпиос.

Собере выступать каро нырысетӥ классын дышетскисьёс, соос выпускникъёсты школаез йылпумъяменызы ӟечкылало, синпель кузьымъёсты сёто.

Школаез йылпумъясь нылпиос ортчизы Улон нимо бадӟым сюреслэсь нырысетӥ этапсэ.

Татчы лыктэм котькуд мурт понна та праздник туж дуно. Дуно анай-атайёслы, дуно дышетӥсьёслы. Та праздниклэн геройёсыз понна но со одно ик туж дуно.

Нош тани дышетӥсьёслэн коллективзылэн сюрприззы: Айсылу Асадуллина (ёросысь кырӟанъя но эктонъя «Балкыш» ансамбльлэн хормейстерез) «Последний звонок» кырӟанэныз.

Тани вуиз пельтон шаръёсты лэзён дыр. Пельтон шаръёс — пичи дырен люкиськонлэн, эрике, бадӟым улонэ дыртӥсь дышетскисьёслэн символзы. Котькуд мурт та яркыт, паймымон шарез, аслэсьтыз сӥзёнзэ малпаса, киысьтыз лэзе, вылӥе, пилемъёс доры, шудбур пумитэ. Лобо ваньзы ӵошен, люкиськыны ӵыдытэк выллем.

Выпускникъёсын люкиськыкумы ми мӧзмон но шӧдӥськом, но со дыре ик котькудӥныз данъяськиськом но. Нылпиосмылэн быръем сюрессы мед вуттоз шудбур доры. Сӥзиськом соослы пуктэм ужпумъёсазы вутскыны, яратыны улонэз, тодазы возьыны дышетӥсьёссэс, ӵыжы-выжыоссэс, эшъёссэс, асьсэлэсь покчи дорзэс. Котьку зэмлыко но данъяськымон луыны, соку одно ик удалтоз. Ваньмыз, мар пумиськоз азьпал сюрес вылын, со луоз ӵуказе, нош туннэ – праздник, егит дырлэн, чеберлэн, эшъяськонлэн но оскымон луонлэн торжествоез!

… Нош укно сьӧрын вуоно нуналлы оскон вайыса зор ӵашетэ.

С. А. Николаева,
Шор Кушкет шоръёзо школаысь

ӟуч кылъя но литературая дышетӥсь

Фото: автор