Татарстанысь удмуртъёс выль тӧро бырйизы

Берлозэ таӵе конференцие люкаськимы вал 22 ноябре 2012 арын. Соку Васильев К.Г. интые тӧрое бырйимы Казаньын улӥсь Сизьныр Починка пиез В.С. Романовез. Быръёнмы таӵегес ортчиз соку: та секыт ныпъетэз люкаськемъёс пӧлысь огмы но выламы басьтыны ӧм дӥсьтэ. Удмурт культурамес азинтыны шуыса кылдытэм, Кузьма Гавриловичлэсь Огазеяськонзэ ум таркалэ шуыса, та уже кыткиськиз В.С. Романов. Капчи ӧй вал, дыр, Валентин Серапионовичлы секыт ӟугез азьлань кыскыны. Шӧдӥськиз со лэсьтэм ужъёсыз сярысь делегатъёс азьын мадьыкуз но. Озьы ке но 80 арессэ люкась мӧйы муртлэн бурдъёсыз вуттылӥзы сое Бавлы, Балтась, Кукмор, Менделеевск ёросъёсысь удмуртъёс доры но, трос пол вуылӥз Ижкаре, пыриськиз Саранскын ортчем финн-угоръёслэн съездазы но. Россиысь наукаосъя академиысь физика-математикая наукаосъя кандидатлэсь (Ас удысаз Со али но ужа!) шӧдске, трос аръёс ӵоже йырзэ висьытэ вылэм Революция вакытысь удмурт Геройлэсь нимзэ удмуртъёслы но быдэс дуннелы шараян - тодытон уж. Тани Солэн архивъёсын бугыръяськыса шедьтэм Героез: Волков Иван Николаевич (18 - 1924) вордскемын Глаз уездысь Ново-Волково гуртын, анай-атаезъя удмурт. Революцилэн ӧраз пыриськыса, пумиськылыны тупам В.И. Ленинэн но. Граждан ож вакытэ Казаньысь дари поттон заводэз белогвардеецъёслэсь утьыны быгатэмез понна, солэсь нимзэ нуллэ городысь огез ульча. Валентин Серапионович аслаз уксёеныз Героймес данъясь сьӧд-чиль гранитлэсь данъян пул лэсьтытэм. Сое интыян понна кӧня кабинетъёсы йыгаськылэм ини, кӧняяз нош йыгаськыны тупалоз на…

Озьы В.С. Романовлэн аркаяз Эшъяськон юртын но Ассамблеяын удмуртъёслэн флагзы-данзы музэ ӧз усьы. Тау, Тӥледлы со понна, Валентин Серапионович!

Конференцилэн кыкетӥ ужпумез луиз Удмурт культурая Огазеяськонмылы тӧро быръён. Владимиров Н.М., Ассамблеялэн исполкоменыз кивалтӥсь, удмуртъёслы дурбасьтыса, кема ӵоже утчаса шедьтэм кандидатсэ делегатъёслы чектӥз: «Тани, пе, тӥледлы А.С. Герасимов. Удмуртъёсты ӝутыны мылкыдыз вань!» ӵектэм кандидатмы люкаськемъёсты тодматӥз ас улон сюресэныз. Делегатъёс сое огкылысь тӧрое бырйизы. Ойдолэ, тодматскоме гажано тӧроенымы. Андрей Сергеевич вордскемын 1969 арын Кез ёросысь Мысы гуртын. 1983 арын ужаны выже Татарие - Бавлы ёросысь «Бавлинский» совхозэ. 1986 арын йылпумъя Бугурусланысь лётной училищеез. 1987-89 аръёсы служить каре армиын. 1991 арын лётчик луыса, выже Казане ужаны. 1996 арын ужбергатӥсь луэ. 1998-2000 аръёсы «Базис» ООО-лэн генеральной директорез луэ. Али «Базис-Инвест-Холдинг» ООО-лэн директорез. 2000 арын йылпумъя Казаньысь финансово-экономической институтэз, 2011 арын Москваысь ВУЗэз (Институт бизнеса и делового администрирования. Российская академия народного хозяйства и государственной службы при Президенте РФ). Кышнояськемын, будэто кык нылпи.

Ӟучомемын, удмурт кылэз выльысь кутскыса дышетскыны мылкыдыз вань. Нырысь вамышсэ выль тӧро пӧртэм ёросъёсысь удмуртъёслэсь мылкыдъёссэс юалляськыса, быдэс арлы план лэсьтӥз. Планэзлэн пуштросэныз тодматон муген, Андрей Сергеевич, 15 апреле ӟаны шор ёзо школаын ортчоно «Кенеш» НКА -лэн Правлениезлэн заседанияз пыриськоз. Гажано лыдзисьёс, вань ке мылкыдды выль тӧроен тодматскыны, юанъёстэс-куронъёстэс солы вуттыны, ӧтиськомы та пумиськонэ пыриськыны. Заседание кутске 14:00 часэн.

15 апреле 14:00 часэн ӟаны шор ёзо школалэн актовой залаз «Кенеш» НКА-лэн Правлениез люкаське таӵе ужпумъёсъя:
1. Татарстанысь удмуртъёслэн НКА-лэн выль тӧроеныз пумиськон;
2. «Гырон быдтон»: азьланьтозы-а сое ӟаныос?;
3. Пӧртэм юанъёс.

Кенеше ӧтисько: Правлениелэн членъёсыз, «Дуслык», «Борнак», «Яна тормыш» ООО-ослэн директоръёссы, Средний Кушкет, Бурнак, Янгул гурт поселениослэн Главаоссы, Кукмор ёросысь удмуртъёслэн азьветлӥсьёссы. Заседание пыриськыны быгато мылкыд карисьёс но.
Сӥзёме выль тӧролы, соин валче вань удмуртъёслы удмуртлыкмес утёнын бадӟымесь азинсконъёс!

«Кенеш» НКА-лэн Правлениезлэн тӧроез: Леонид Сапожников.

11.04.2016 ар,
Балтась ёросысь удмуртъёслэн.