Татарстанысь удмуртъёслэн НКА-оссылэн тӧрооссы люкаськизы ( фото )

Котькуд аре толшор толэзе республикамылэн пӧртэм сэрегъёсысьтыз удмурт активистъёс, ёросъёсысь НКА-ослэн тӧрооссы но кивалтӥсьёс огазе люкасько. Соос ар ӵоже лэсьтэм ужъёссы но вуоно арлы пуктэм ужпумъёссы сярысь верасько, ог-огенызы кенешо.
Туэ Татарстанысь удмуртъёслэн паськытатэм заседанияз, арлы быдэ сямен, НКА-ослэн тӧрооссы сяна, ёросъёсысь удмурт активистъёс но куноос ӧтемын вал. Ужрадэ асьме ёросысь делегатъёс но пыриськизы. Заседаниын пӧртэм юанъёсъя выступлениос лэсьтӥзы кызьы тӧроос, озьы ик лыктэм кивалтӥсьёс но.
Ужрадлэн нырысетӥ люкетаз кыл сётӥзы ёросъёсысь НКА-ослэн тӧрооссылы. Соос ар ӵоже ёросазы ортчытэм ужрадъёс сярысь веразы, та арын быдэстыны чаклам ужъёссы сярысь но мадизы. Балтась удмуртъёслэн «Кенеш» НКА-зылэн кивалтӥсез Ольга Пчельникова асьме ёросамы ортчем ужрадъёс сярысь вераз. Солэн дасям докладысьтыз валаны луиз, ёросамы удмуртлыкез ӝутонэн герӟаськем трос ужрадъёс ортчытэмын вал шуыса. Со ужрадъёсын пыр-почгес тодматскомы.
Ёросамы дышетон но лулчеберет удысъёс артэ мыно но азинско. 2022 ар кутскиз 18 тулыспалэ «Удмурт Кенешлэн» 30 ар тырмонэзлы сӥзем ужрадэ пыриськонэн. Туж шумпотымонэз луэ соиз: аспалмес Ермаков Иван Васильевичез «Удмурт Кенешлэн» Данъян книгаяз пыртӥзы. Со туж трос кужымзэ но быгатонлыксэ сётӥз удмурт кылэз но лулчеберетэз утёнлы но азинтонлы.
26 куартолэзе, 10 шуркынмонэ азьветлӥсьёсмы пыриськизы «Пичи Кенешлэн» заседаниосаз, нош 7-тӥ толсуре — вань удмуртъёслэн XV-тӥ (азьвыл чакламтэ) Ӧтчамазы.
21-тӥ тулыспалэ пусйиське Анай кыллэн калыккуспо нуналэз. Та лыдпуслы сӥзьыса, ёросамы школаосын но нылпи садъёсын ортчытӥсько пӧртэм ужрадъёс, кытын нылпиос возьмато асьсэлэсь тодон-валанзэс но быгатонлыкъёссэс. Ӟеч сямлы пӧрмиз 27-тӥ шуркынмонэ Удмурт кыллэсь дунневыл нуналзэ пусъён но. Та нунал ӵоже школа коридоръёсын но удмурт кылъя но литературая урокъёс кутскон азьын удмурт кырӟанъёс чузъясько, пиналъёслы удмурт мультфильмъёсты но видеофильмъёсты возьмато, тодмо адямиосын пумиськонъёс ортчытъяло.
Асьмеос туж данъяськиськомы тодмо удмурт писатель Григорий Сергеевич Медведев Покчи Лӧзя гуртын вордскемын шуыса. Солэн вордскем нуналэзлы сӥзьыса, арлы быдэ ортчо пӧртэм ужрадъёс: произведениосызъя суредъёс лэсьтон, вольыт лыдӟиськонъя конкурс, ӵыжы-выжыосыныз пумиськон но мукет. Кылем арын кусып тупатӥмы Григорий Сергеевичлэн Санкт-Петербургын улӥсь правнучкаеныз Марина Варламоваен.
5 южтолэзе Наталия Львовна Антонова, Балтась ёросысь удмуртъёслэн «Кенеш» НКА-зылэн тӧроезлэн воштӥсез, пыриськиз «Арлэн кышномуртэз» Элькун вожвылъяськонэ. Вань тодэмзэ-быгатэмзэ возьматыса, со вормисе потӥз.
Дышетӥсьёслэн удмурт кылэз но лулчеберетэз дышетыны быгатыса ӝуткамзылы луыса, арысь аре пиналъёс но вань мылкыд карисьёс «Бадӟым удмурт диктант» ужрадэ мыло-кыдо пырисько. Со понна котькуд школаын кылдытэмын луо площадкаос. Нош кинъёс дорысьтызы потыны шугъясько, но удмурт кылын диктант гожтыны мылзы потэ, соос доры организаторъёс асьсэос мыно.
Котькуд аре Элькунамы ортче анай кылъёсъя дышетӥсьёслэн вожвылъяськонзы. Кылем арын отчы Ольга Мироновна Пчельникова ачиз пыриськиз. Туэ та ёрос вожвылъяськонэ пыриськиз Шор Кушкет шоръёзо школаысь дышетӥсь Яковлева Олеся Васильевна.
Ижкарысь 60 номеро школа дистанционной амалэн нылпиослы олимпиада ортчытӥз вал. Отчы пыриськыса, асьсэлэсь тодонлыксэс возьматыса, ёросысьтымы нылпиос вормисьёс луизы. Ветлӥзы ӟечкылан ужрадэ, озьы ик соос понна радъямын вал Ижкарысь зоопарке экскурсия но.
Покчи Лӧзя шоръёзо школаын инвожо толэзе 9-тӥ классын дышетскисьёс понна «Будудмурт» проект ужаз. Та проект юрттэ нылпиослы творчествоен вырыкузы но ваньмон дырзэс пайдаё ортчытон понна туала технологиосты пыртыса ужаны. Пиналъёс тодматскизы удмурт сиён-юонэн но дышетскизы сое дасяны. Ужлэн кыкетӥ нуналэз сӥземын вал этноблогинглы. Нылпиос тодматскизы шошма удмуртъёслэн кырӟанъёсынызы но эктонъёсынызы. Куинетӥ нуналаз калык шудонъёсты дышетӥзы но ортчытӥзы нылпиос понна «Гырон быдтон» праздник. «Будудмурт» проектэз быгатыса улонэ пыӵатӥз Татарстан Элькунысь Эшъяськон юртысь Анна Самсонова.
Пӧсьтолэзе ёросамы ортчиз Гырон быдтон праздникмы. Лыктэм куноосты ческыт ӝукен утялтӥзы, пӧртэм шудонъёс но ӵошатсконъёс радъямын вал. Пыриськизы та ужрадэ аспалъёсмы Пётр Данилов но Геннадий Кузнецов. Ёросысьтымы «Шулдыр ӝыт» но «Вуюись» ансамбльёс пыриськизы Бавлы ёросын ортчем удмуртъёслэн элькун праздниказы — «Гырон быдтонэ». «Чеберина но Батыр» конкурсын Кушаев Родион кыкетӥ, нош Анисимова Алёна куинетӥ интыен пусъемын.
Удмурт кыллы но литературалы дышетонлэсь ӟечлыксэ возьмато олимпиадаос. Арлы быдэ ёросысьтымы пиналъёсмы элькун олимпиадаын вормисьёс но призёръёс пӧлы шедьыло.
Гудырикошконэ ёросамы вуизы Ижкарысь научно-исследовательской институтысь ӧнерчиос. Соос быдэс арня ӵоже ёросысьтымы удмурт гуртъёсысь калык сямъёсты, йылолъёсты эскеризы но тодматскизы.
Таяз аре тодон-валанлы сӥзем ужрадэ пыриськизы Андрей Сергеевич Герасимов но Ольга Владиславовна Чайникова. Соос ӟечкылазы праздникен, нырысетӥ классэ лыктэм пиналъёслы кузьмазы удмурт кылын книгаос. Нялтас вераса пусйыны кулэ, Андрей Сергеевич Вылын Ушма покчиёзо школаез борӟанлэсь утьыны быгатӥз. Со понна солы туж бадӟым тау.
Арлы быдэ ёросысьтымы «Шулдыр ӝыт», «Вуюись» удмурт ансамбльёс но солистъёсыз мылысь-кыдысь пырисько удмурт эктонъя улоскуспо «Эктон дыр» конкурсэ, кудӥз ортче Кукмор ёросысь Сутэр Починка гуртысь лулчеберетъя юртын. Туэ но «Шулдыр ӝыт» нырысетӥ степенё лауреат нимен пусъемын.
28 пӧсьтолэзе «Шулдыр ӝыт» ансамбльлы шуд усиз Казаньын радъям культурно-просветительской «Древо жизни» проектэ пыриськыны. Та проектлы дасямын вал фольклор выступление, такмакъёс но эктон.
Озьы ик арлы быдэ «Шулдыр ӝыт» коллектив пыриське Набережной Челныын ортчись финн-угор калыкъёслэн «Мы ветви древа одного» элькун фестивалязы. Пусъемын лауреатлэн дипломеныз.
«Шулдыр ӝыт» удмурт калык ансамбль но солист Михайлова Дина пыриськизы калыккуспо «Этномириада» вожвылъяськонэ. Дина пусъемын 2 степенё лауреат нимын, нош «Шулдыр ӝыт» ансамбль 1 степенё лауреат луиз но пыриськиз Казаньын ортчем гала-концертэ.
30 шуркынмонэ Покчи Лӧзя шоръёзо школаын ортчиз бадӟым ужрад, кудӥз сӥземын вал удмурт кыллэн но лулчеберетлэн нуналъёсызлы. Вуизы трос куноос Удмурт Элькунысь но Элькунысьтымы дышетӥсьёс, визьнодасьёс, лулчеберет удысын ужасьёс но нылпиос.
2-тӥ толсуре Ижкарын Чеберлыко киужъёсъя йӧскалык центрын Балтась удмуртъёслэн декоративно-прикладной устолыксылы но ӧнерзылы сӥзем «Тупал удмуртъёс» улоскуспо адӟытон усьтӥськиз. Адӟытонэз усьтон ужрадэ куно луыса пыриськизы Ӟаны шоръёзо школаысь дышетӥсьёс но.
26-тӥ коньывуонэ Покчи Лӧзя шоръёзо школаын ортчиз внеурочной ужпӧр «Эшъяськонын — калыклэн кужымез» («В дружбе народов — единство России»), кудӥз сӥземын Калык огазеяськонлэн нуналэзлы. Та ужрадэ пыриськиз Кун Кенешысь депутат Камиль Нугаев но Балтась ёрослэн кивалтӥсезлэн воштӥсез Наиль Сабирзянов. Ужрадын нылпиос тодматскизы правовой нормаосын.
Нылпи садэ ветлӥсь но покчи классъёсын дышетскись пиналъёс понна арлы быдэ ортчытӥське «Мудорвай» вожвылъяськон. Котькуд аре трос гинэ нылпиос пырисько. Туэ очной этапаз 157 нылпи пыриськиз, 46 нылпиос келязы суредъёссэс. Вожвылъяськонэ удмурт нылпиос гинэ ӧвӧл, мукет йӧскалыкысь нылпиос но пырисько. 23-тӥ толсуре Казаньысь Калыкъёслэн эшъяськон юртазы ортчем гала-концертэ но пыриськиз.
Вератэк кельтыны уг луы созэ но: нырысь ик ёросамы, собере ини Элькунын ортче «Коррупцилы пумит» сочинениосъя вожвылъяськон. Ӟаны шоръёзо школаысь Кира Чирикова, 5-тӥ классын дышетскись, вормись луиз, Покчи Лӧзя шоръёзо школаысь 10-тӥ классын дышетскись Артемьева Дарья призёр луиз.
Котькуд школаын ортче удмурт арня. Озьы ик ёрос ужрадъёс но трос гинэ ортчытӥсько. Арысь аре сяме пыӵаз «Кылысь буёлэ» суредъёсъя конкурсэз ортчытон. Шор Кушкет шоръёзо школаын ортчиз «Никифоровлы сӥзем лыдӟонъёс», кытчы пыриськизы Татарстан Элькунысь сяна Удмуртия но Марий Эл Элькунъёсысь нылпиос но.
16-тӥ толсуре ёросамы удмурт лулчеберетъя юртъёс куспын ортчиз «Вордскем пал крезьгуръёс» («Родные мотивы») вожвылъяськон. Пыриськизы удмурт гуртъёсысь самодеятельной ансамбльёс но артистъёс.
Кызьы адӟиськомы, ёросамы туж трос ужрадъёс ортчытэмын. Тае заседание пыриськемъёс но пусйизы.
Ужрадлэн кыкетӥ люкетаз вераськизы Ольга Чайникова, ТР-ысь удмуртъёслэн НКА-зылэн тӧроезлэн юрттӥсез (со НКА-лэн ар ӵоже ужам ужъёсыныз тодматӥз но вуоноезлы малпанъёссы сярысь мадиз), Кукмор ёросысь исполкомлэн социальной ужъёсъя кивалтӥсез А. Ахметшина (2023 арын Кукмор ёросын «Гырон быдтонэз» но «БиГерд» форумез ортчытон сярысь вераз), А. Арзамасов, кылосбур тодосъёсъя доктор, профессор, Россиысь Тодосъёсъя академилэн Казанской научной центрысьтыз трос факторъем гуманитарной анализъя но когнитивной филологияя лабораторилэн кивалтӥсез (Татарстанын удмурт кылэз дышетонъя перспективаос сярысь мадиз), Е. Гущина, исторической наукаосъя кандидат, КФУ-ысь калыккуспо кусыпъёсъя институтысь антропологияя но этнографияя кафедраысь заведующейлэсь ужъёссэ быдэсъясь («Народный костюм: традиция vs современность» темая доклад лэсьтӥз), Мамадыш ёросысь удмуртъёслэн НКА-зылэн кивалтӥсез С. Никитин (нимысьтыз военной операциез ортчытонлэн рамкаосаз мобилизовать карем воргоронъёслы юрттон сярысь вераз), В. Билык, Набережной Челны городысь удмуртъёслэн НКА-зылэн тӧроез, «Внеурочная программа для учеников старших классов «В гости к удмуртам» как средство знакомства с удмуртским языком, историей, культурой и их популяризация» темая доклад лэсьтӥз.
Люкаськон тунсыко гинэ ӧвӧл, пайдаё но луиз. Кивалтӥсьёс кылдэм юанъёссылы валэктонъёс басьтӥзы, ог-огзылы малпанъёссэс ӵектыны быгатӥзы. Трос шуныт кылъёс верамын вал ТР-ысь удмуртъёслэн НКА-зылэн тӧроезлы Андрей Герасимовлы. Со ужаны кутскем дырысен удмуртъёслэн трос выльдӥськонъёссы, азинсконъёссы вань шуыса шӧдӥськыны кутскиз. Азьпалан но со озьы ик луоз шуыса оскеммы потэ.
Статья Ольга Пчельниковалэн но Наталия Антоновалэн дасям докладэнызы пайдаяськыса гожтэмын