«Телогрейкаен ужаны кутскиськом, шортикен йылпумъяськом»

Ас ужзэ ӟеч тодӥсь, пыр-поч быдэстӥсь механизатор со. Сыӵеен сое кивалтэтэз адӟе. 

Иван Владимирович вордскемезъя Бадӟым Лӧзя 1-тӥ люкет гуртысь луэ. Пичи дырысеныз техника борды кыстӥськем бере, школазэ йылпумъяса, Иван Нурмаысь СПТУ-э дышетскыны пыре. Дышетскон юртсэ йылпумъяменыз валче егит ӧнерчи асьсэ колхозазы комбайнэн ужаны кутске. Вить ар ӵоже ужамез бере, ужан удыссэ воштэ, Кукмор пала ветлыса ужа.

— 2013-тӥ аръёсы нош ик татчы ужаны интыяськыны малпай. Сопала-тапала ветлоно ӧвӧл, уж вань, улон интые вань — ас поннам озьы малпаськи. Вылаз ик уж но ят ӧвӧл. Озьы тӥни «Сурнай» обществоын механизатор луыса ужаны кутски, — маде Иван Владимирович.

Егит механизаторез «Сурнайын» шумпотыса пумиталлям: ӧнер басьтэм, быгатӥсь но опытэн механизаторлэн ужаны лыктэмезлы кызьы уд шумпоты? Школа аръёсысеныз комбайнёрлэн юрттӥсез луыса ужам Иван туннэ нуналэ техникаез туж умой вала, солэсь вань «секретъёссэ» тодэ ини.

— Техникаен «тон» шуыса вераськисько шуыны луэ ини, — вера механизатор. — Мукет сямен уг но луы — арлэн пӧртэм вакытаз трос пӧртэм ужъёсты быдэстӥськомы ук. Кылсярысь, мон тулыс парен герӟам сеялкаен кизён ужъёсы пыриськи. 18-тӥ оштолэзе потӥмы, соку кезьыт вал, али кадь тодӥсько. Ӵукнаысен ӝытозь бусыын вал. Ужъёсты йылпумъякумы, ини пӧсь куазьёс луизы. Озьы тӥни — телогрейкаен ужаны кутскиськом, шортикен йылпумъяськом. Веранэз ӧвӧл, бусыын тулыс, гужем уж трос. Сӥзьыл но ужлы ум ёрмиське. Нош толалтэзэ фермаын ужаны тупа ини. Отын пӧртэм ужъёсты быдэсъяськомы, тракторен ужаны но тупа. Нялтас вераса, техникамес но асьмеос ик ремонт кариськомы, со понна кыл кутӥськомы, — валэктэ мыным механизатор.

Кукурузаез обработать карон, прессэн ужан, турын, куро бордын ужан — нокыӵе ужлэсь но палэнэ уг кыльы Иван Владимирович. Ми машина-трактор парке мынон нуналэ механизатор 2 СЗП-36 агрегатэн, культиваторен, прессэн но ужа вал.

— Ужан интыме кельшытӥсько, — шуэ Иван Кузьмин. — Ми татын ваньмы одӥг бадӟым семья кадь. Та огшоры чебер верам кылъёс гинэ ӧвӧл, ми понна со зэмзэ но озьы. Татын ваньзы «асьмелэнъёс», кенеш сётыны, юрттыны котькин котькинлы дась. Серекъяса но вераськыны быгатӥськомы, огъя вераса, эшлыко улӥськомы. Кивалтэтлы но ӝожтӥськымон ӧвӧл. Тросаз колхозъёсын кадь ик, татын но ужасьёссылы турын, ю но мукетъёссэ сётъяло. Сыӵе юрттэт гуртын улӥсьёс понна шӧдскымон луэ, тужгес но тросэн пудо утисьёсыз понна.

Иван Владимирович пудо сярысь вераськонзэ юнме мытымтэ вылэм. Солэн дораз но хозяйствоез бадӟым. Гуртын улыса пудо вордытэк кызьы улод, пе. Котьма ке но, семьязэ сюдоно-вордоно. Нош семьяез солэн пичи ӧвӧл. Туннэ нуналэ соос куать ӵошен уло — Иванлэн анаез Люба апай, кышноез Наталья но куинь нылпиоссы.

— Станислав пимы 2-тӥ классэз йылпумъяз, София нылмы туэ 1-тӥ классэ мыноз, Анна нылмы али кылем толэзе гинэ, ӵапак кизён дыре вордскиз. Пӧсь, чебер, шундыё куазе. Улонэз но сыӵе ик мед луоз, — пальпотыса вера механизатор.

Вераськыса конторысь ураме потӥмы. Ужтэк пукыны яратӥсьтэм механизаторлэн кема вераськыны сюлмыз но уз чида, дырыз но уз луы шуыса, техникаез пала вамыштӥмы.

— Тани мынам сюдӥсе, — рулонной пресс-подборщик шоры возьматыса вера Иван Владимирович. — Соин ужасько, ремонт каронэ вань али. Ӵапак со уж борды ик басьтӥсько.

Нош ми бригадирен мукет механизаторен вераськыны кошкимы.