Толэз келязы, тулыслы сюрес усьтӥзы

Котькуд аре сямен Вӧй арнялэн берпуметӥ нуналаз шулдыръяськон ортчем Покчи Лӧзя гуртын но. Лулчеберетъя юртысь устолыкъя кивалтӥсь Галина Петрова но солэн юрттӥсьёсыз котьку сямен люкаськем калыкез шумпоттӥллям шулдыр крезьгурен, тунсыко шудонъёсын, аспӧртэмлыко вожвылъяськонъёсын, ческыт табанен но пӧсь чаен. Вожвылъяськонъёсы пыриськем адямиос ваньзы кузьымъёсын пусйиськиллям. Бератаз улонмылэсь тынӥсь, арлэсь ӟеч луэмзэ, удалтэм урожаен шумпоттэмзэ курыса-сӥзьыса, Вӧйлэсь валтӥсь тодметсэ — куро мунёез — ӝуатӥллям. Огъя вераса, праздник вань люкаськем адямиослэн сюлэмъёсазы сайкыт но вунонтэм тодэ ваёнъёс кельтэм.
— Гурт калык но, праздникез радъясьёс но керӟегъяськись куазьлэсь ӧз кышкалэ, ваньзы шумпотыса шулдыръяськизы та нуналэ. Туж трос вал пиналъёс, соос понна шудонъёс но уно ортчытӥськизы. Табань, чай, кырӟанъёс-эктонъёс, пӧртэм тунсыко конкурсъёс но шудонъёс — ваньмыз та адямиослэсь мылкыдзэс ӝутӥз, тулыс мылкыд кузьмаз, — шулдыръяськонэз радъясьёслы таукаронзэ вуттыса вера Покчи Лӧзя гуртысь Лариса Михайлова.
Тӥни озьы шулдыр келяллям толэз лӧзяос, кема витем тулыслы сюрес усьтыса.