Трокова Анна Павловна

Анна — семьяяз самой покчиез нылпи луэ, укмысэтӥез. Но Григорьевъёслэн витез нылпиоссы кулӥллям. Анна Павловна пичи дыръёссэ тодаз вайыса, малпанъёсызлы сётскыса, куалекъясь куараеныз шуэ: «Атай жугиськонысь ӧз берты ни... Агаймес но жугиськон дыръя басьтӥзы. Мон апай сьӧрын сисьмем картофка бичай. Поттурын сиыса будӥмы, соиз но луиз ке, сюриз ке гинэ. Турын сиимы. Нокыӵе ӧнер басьтон сярысь малпанъёс но ӧз луэ ни. Кыӵе дышетскон? Шумпотӥсько, 8 классэз ке но йылпумъяны быгатӥ шуыса — ньылетӥ классозь гуртын, Киськемын, дышетски, витетӥ классэз Кӧргемын йылпумъяй, нош тямысэтӥ классэз ини Ципьяын быдтӥ».

Пичи дырысеныз Анна Павловна апаеныз ӵош «Активист» колхозын скал кыскем (ӵапак отын ужамез сярысь вылӥын со тодаз вайиз). Но та обществоын со кема ужамтэ — кык ар ӵоже гинэ. Ӝоген нылэз Сизнер гуртысь Николай Прокопьевич Троков синйылтэ но сое кышнолы пыртэ.

Картлы кошкемез бере Анна апай колхозэ (али «Смаиль» общество) пӧртэм ужъёсты ужаны интыяське. Колхозын, фермаын ужаны вутске. Кузпалыз Николай Прокопьевич разнорабочей луыса тырше. Ципья гуртысь йӧл-вӧй поттон заводын ужа, пекарняын но тырше. Кема аръёс ӵоже Ципьяын кочегар луыса но тырше — 35 ар ӵоже. Со ужан интыысеныз дано шутэтсконэ но потэ. «Гуртын вордскем, будэм но улэм адямиос котькыӵе ужын ужаны дась ини со», — серекъяса вера Анна Павловна. Зэм но, жугиськон дыръя но жугиськон бере вордскем нылпиос пичи дырысенызы улонлэсь шуг-секытъёссэ ас вылазы шӧдӥзы, жугиськонын матысь адямиоссэс ыштӥзы, жугиськон бере но али шудо нылпи улонэз ӧз адӟе — ялан ужазы но ужазы, сютэм улонлэсь тэльмыризы. Соин аслэсьтыз пичи дыръёссэ тодаз вайыса, Анна апай шуэ: «Али улон ракат. Туж ракат. Милям анайёсмы кыӵе тэльмырыса улӥзы, улонысь ӟечсэ адӟыса но ӧз вуэ. Милемлы но капчи ӧз луы. Пиосмурт ужъёсты пичиысен ужаны быгатыса будыны тупаз. Пу кораны, нуллыны туж устоесь вал ини. Ма, усто уд луы — кытчы пырод... Уг вераськы ини, ужан сяна дышетскыны но вутсконо вал. Школае но пыдын ветлоно — матын сюрес ӧвӧл. Ваньзэ вераса быдтонтэм. Соин туала дыре шумпотыса улымон кадь».

Троковъёслэн вить нылпиоссы вордско — одӥг пизы но ньыль нылъёссы. Туннэ нуналэ соослэн ваньзылэн ас семьяоссы, нылпиоссы вань. Анна Павловналэн туннэ нуналэ дас кык внукез но укмыс правнукез вань ини. 25 октябре 80 аресъем юбилейзэ пусйыкуз нылпиосыз, внукъёсыз, матысь ӵыжы-выжыосыз Анна апаез ӟечкыланы вуиллям. «Корка пачыл люкаськизы, — шумпотэмзэ ватытэк вера Анна апай. — Ма, вордскем нуналы дыръя гинэ ӧвӧл, арнялы быдэ берто внукъёсы куное. Мусо карыса «песяе» шуыса вазё. «Улы али» шуыса верало. Ма кулэмед потоз-а? Внукъёсы озьы верало бере, туала улон сыӵе каньыл но шулдыр бере? Али ведь ваньмыз вань: гур эстэмын, пу понна сюлмаськоно ӧвӧл. Куноын кадь улӥськомы, зэмзэ но».

Анна апай 1990-тӥ арысен пенсиын ини. Со дырысен уг ужа. Али нуналэ кузпалэнызы кыкназы Сизнер гуртын уло.

— Пенсиын шуыса, ужтэк ум пукиське, — шуэ Анна Павловна. — Ѓазегъёсмы, бройлеръёсмы вань. Соосын вырыса нунал но ортче. Гуртын уж уг быры ук со. Гужемзэ бакча котырын ветлӥськом. Али кузпалы кунян но уте. Луыкуз ужано али ваньзэ — мон озьы малпасько. Ужен вырыса, улон ортче».
Ужен вырыса, улон ортче... Кӧня арлыдоосын вераськыса статьяосты гожъяй ини, котькудӥз одно ик та кылъёсты вера. Ноку но соослэсь ӝожтӥськон кылъёсты уд кылы, «Инмарлы тау» шуыса котькуд ортчем нуналзылы шумпотыса улыны быгато. Задор, чырткем луэменызы паймыто ик соос. Соин, дыр, арлыдоослэсь интервью басьтыны тужгес яратӥсько.