Ципьяысь постын тыршись воргоронъёс ужало

Солэн средне-технической образованиез. Киров улосвылын тодон-валан басьтэм. «Коллективмы умой. Ужасьёс тросэз егит ке но, тыршыса, ужзэс кулэезъя быдэстыса ужало. Егитъёсын мыным ужаны кельше. Но таӵе ужын ужан понна физической сяна, психологической дасьлык но кулэ. Сотэк уг луы. Сомында ар ужаса дыши ини, нормативъёсты сдавать кариськомы. Ужмы капчи ӧвӧл ке но, кельше. Мон самой трос ужасьёслэн одӥгез.  Азьло дырен ӵошатыса, али ужаны капчигес ини. Куинь сутка шутэтскисько но одӥг сутка ужасько», — шуэ со ужамез сярысь.

Василий Копаров но татын ёзэтлэн кылдэмезлэн нырысетӥ нуналысеныз ужа, 1-тӥ январе 12 ар луэ. Солэн средней образованиез. Водитель луыса ужаны кутскем, али но со должностьын ик тырше. Со суббота но воскресенье нуналэ шутэтске. Мукет водительёс отпуске потыку, кин ке больничнойын луыку, сменае заступать каре. «Графикъя ужаськомы. Конспектъёс гожъяськом — кагаз ужъёсмы трос. Занятиос, отработкаос луо. Тӥни отчы могӟетъёсын полоса (полоса препятствий — Н.Ж.) лэсьтӥмы, — шуэ Василий Валериевич,  укно пыр кемалась ӧвӧл лэсьтэм полосазэс возьматыса. — Арес но вань бере, мукет уж сярысь малпанъёс ӧвӧл ини, татын ужаны но каньыл шуысал». Вераськонамы кабинетын милемын ӵош пукись водитель итӥськиз — Александр Михайлов. «Пӧртэм сямен луэ ни. Сутка ӵоже «на нервах» пукиськомы. Телефон жингыртӥз ке, сразу сюлэм йыгаськыны кутске ни. Куинь нунал шутэтсконэз вань, соиз умой, — шуэ Александр. Со ачиз но Ципьяысь нимаз постын 2009-тӥ арысен ужа вылэм ини.

Экскурсиен ветлӥсьёс но луо вылэм…

Пӧртэм конкурсъёсты пырисько шуыса гожтӥ ини. Кылсярысь, ужасьёслэн нылпиоссы суредъёсты суреданъя конкурсъёсы но пырисько. «Самой усто водитель», «Самой усто тылпу кысӥсь», «Самой усто командир», «Самой усто кивалтӥсь» выллем конкурсъёслэсь но палэнэ уг кылё. Со сяна, татчы садикысь нылпиос, школьникъёс экскурсиен но ветло вылэм. Али, жаляса верано,  коронавирусэн сэрен экскурсиосты ортчытыны уг яра. «Возьматӥськом, кызьы ужаськомы, режим сярысь мадиськомы,  машинаосты поттыса возьматӥськом нылпиослы. Синъёссэс басьтытэк, тунсыкъяськыса ваньзэ учко нылпиос. Озьы ик НАЗ санаторийын шутэтскисьёс но вуыло, — шуэ Дмитрий.

Огъя вераса, мӧзмыны но ужтэк пукыны та воргоронъёслэн дырзы ӧвӧл. Ваньзэсын пыр-поч тодматскыны ӧз луы ке но, вуонояз соосын но вераськыны быгато шуыса оскисько. Нырысетӥзэ гинэ татчы лыктӥ ук али…

Учырен пайдаяськыса, Дмитрий Щербаков вераськеммылы йылпумъян лэсьтыса, вераз:

— Ваньдэсты кышкыттэмлыкъя куронъёсты быдэсъяны куриськомы. Та юан шоры ваньмы кылкутымон учкимы ке, улонмы каньылгес луоз. Озьы ик аслэсьтым коллегаосме но ваньзэсты, кин спасательёслэн нуналэнызы герӟаськем, матынъяськись ӧнер праздникен но Выль арен ӟечкыласько. Шудбур, тазалык, каньыл улон сӥзисько ваньдылы.