Туж-а висъясько туала но вашкала кышномуртъёслэн дунлыкъёссы?

Ныл, нылмурт, нылкышно, песянай — кышномуртлэн валтӥсь сюресъёсыз, валтӥсь тодметъёсыз. Вашкала дырысен нылкышно воршудутись но выжы будэтӥсь луыса тодмостӥськиз. Туала нылкышноос асьсэды семьяен гинэ уг герӟало ини. Кыдёке-а кошкемын туала нылъёсмы ас анай-песянай выжыоссылэсь? Ойдолэ, ӵошен ваньзэ рос-прос эскероме.

Пӧртэм вакытъёсты ӵошатыны тунсыко гинэ ӧвӧл, со туала адямилэн улоназ трос тодон-валанъёс но валэктонъёс пыртэ. Пӧртэм кунъёсын но адямиос пӧртэм сямен уло, нош ог-огзылэсь кыдёкынгес луись вакытъёсысь адямиос сярысь веранэз ик ӧвӧл. Нош кӧня ке дырлы ортчемаз берытскид ке, кылсярысь, Совето Союз вакытъёсы, нылкышноослэн улон-вылонзы копак мукет сямен усьтӥське. 

Нылкышно — со семьялэн инъетэз но мылкыд кылдытӥсез. Малпасько, таин ваньзы соглаш луозы. Кыӵе гинэ кужмо медаз луы пиосмурт, солэн мышказ татали (мотылёк) кадь нылкышно кужым сётыса улэ. Вашкала дырысен нылкышно вылын туж трос уж луэмын: семья, нылпи, пудо, коньдон уж, арлыдоосты утён. Ваньмыз та кышномуртлэн пельпум вылаз усиз. Война вакытэ кышномуртъёс юртъер сяна, фронтэ но кулэ луись вузъёсты люканы тыршизы, керттӥзы носкиос но пӧзьёс. Сыӵе шуг вакытэ но кышномуртъёс самой валтӥсьсэ ӧз куштэ — адямилыксэс но шонерлыксэс. Туала поколенилы трослы дышетсконо на!

Пичи дырысен ик нылэз дасязы семья пушкын улыны, пӧраськыны, ки ужен вырыны. Туж данъяськылӥзы, куке бызем нылмурт кузпалэзлэн семьяяз ассэ востэм но ужасен возьматӥз. Паймонэз ӧвӧл, дыр, вашкала семьяын кышноез кузпалэзлэсь арлыдызъя бадӟымгес луэ вал, малы ке шуоно котькуд анай-атай нырысь ик семьяяз «ужась» басьтӥз, собере гинэ кен. 

Семья вашкала дыре кыӵе ке гурлась «кузьыли муӵ» кадь адскиз. Трос поколениен тырмем корка, нылпиос, ваньзылэн ас ужъёссы, бадӟым хозяйство — вань ужъёс киын быдэстӥсько, «корт» ки ӧвӧл, соин макем бадӟым семья — сокем узыр юрт. Туннэ нуналэ семьялэн узырлыкез коньдон вылэ пыкиське ке, вашкала дыре со узырлык адямиен лыдъяськиз.

Вашкала но туала нылкышноос трослы пӧртэм луо: вашкала дырысь нылкышно вань сюлэмзэ но кужымзэ семьяезлы сётӥз, туала нылкышно котькуд улон удысаз «баланс» шедьтыны тырше. Со ужаз гинэ ӧвӧл, аслыз кельшымон удысаз но вутске, нылпизэ но будэтэ, ужаз но данъяськымон ӧнерчи луэ, чемысь умой кивалтон ужез но быгатыса быдэстэ. Нылкышно аспӧртэм «батарейка» луэ семьязэ азьлань нуон шудо улон сюрес вылын. Сыӵе «батарейка» дыраз ужамысь медаз дугды шуыса, солы котьку шумпоттӥсь иворъёсын но ужъёсын «заряд» сётоно. Ведь кызьы калыкын верало, нылкышно — со эмоциос.

Ныл, нылаш

Та кышномуртлэн нырысетӥ дунне шоры учкон но семья кусыпъёсты адӟон этапез. Ныллэн шудэз вордӥське озьы ик семьяын. Макем юн яратон кусыпъёс возисько семьяын, сокем ныл но улоназ ассэ кулэен лыдъя. 
Та дыре нылашлэн дунневаланэз кылдэ. Анай-атайлы та вакытэ ныллы небыт но ненег мылкыдъёс пыӵатоно, пӧртэм удысъёсын быгатонлыкъёссэ шараяно. Пилы дыраз сэзь но кужмо луоно ке, нылаш аслаз небыт палъёсыныз висъяськыны кулэ. Азьпал улонлэн инъетэз — пинал дыр. Соин анай-атайлы котьку валано: соослэн киосазы кинлэн ке азьпал шудбурез.
Ныллэн гань-гань улонэз копак воштӥське, куке солэн дуннеяз, шудонъёс но эшъёс сяна, пырыны кутско мукет юанъёс но. Бадӟымгес юанъёсын тунсыкъяськыны кутскем ныл улон «тубатлэн» мукет лёгетаз султэ.

Нылмурт

Паймонэз ӧвӧл, Совето Союз вакытэ улӥсьёслэн нравственной палъёсыз пӧртэмгес вал. Кылсярысь, вашкала дыре гожтӥськытэк пиосмуртэн ӵошен улон — со ныл понна дандэ ыштон. Туннэ нуналэ со «гражданской брак» шуыса нимаське но калык понна огшоры улонысь тодмет луэ. Тупатэм дырлы нылмурт паспортаз штампеныз уг ушъяськы ке, со шоры кырыж уг учко но уг курлало. Нош вашкала дыре нылмуртъёс общественной малпанъёсын туж юн герӟаськемын вал. 

Та кышномуртлэн самой сяськаяськись но самой инъясь дырез. Нылмурт дышетске, улонэз «шӧмъя», эшъяське, пумиське яратонэн но люкиськонэн, шумпотонъёсын но куректонъёсын, адями кусыпъёс вылын тодон-валанъёс басьтэ, адямилэн малпанъёсыз эскериське. Татын кутске «бадӟым сюрес» улон. Ачид бырйиськод, ачид малпаськод, ачид кыл кутӥськод. Ваньзэ ачид лэсьтӥськод! 

Вашкала но туала нылмуртъёс озьы ик пӧртэм луо асьсэ сямъёсынызы но быръёнъёсынызы. Вашкала нылмуртлы востэм но шыпыт луоно вал ке, туала нылмурт аслэсьтыз малпанъёссэ шара вера ини. Та вакытэ макем вылӥ дунъет пуктэ со аслыз, сокем юн сямо адямиос вӧзаз сылозы. Нылъёс уг кышкало ни асьсэ куронъёссэс пуктыны, соос уг герӟасько общественной малпанэн, соос уло асьсэ каньыл но кельшымон улонэнызы.

Туала нылмурт огназ кыльыны уг кышка ни

Кызьы верамын вал ини, вашкала но туала нылмуртъёс вискын шӧдскымон аспӧртэмлыкъёс пусйисько: табере нылмурт огназ улыны уг кышка ни. «Старая дева» но «старородящая» шуэм кылъёс каллен берлань радъёсы кылё. Туала улонысь моральёслэн гожъёссы паськытатэмын гинэ ӧвӧл, соос копак ӵушиськемын кадь: нылмурт кызьы бызьытэк, озьы ик пиосмуртэн кусыпъёсты возьытэк но улыны быгатэ. 

Тунсыко факт: Совето Союз дыре нимысьтыз нылпитэм улӥсьёслы выт но тыро вал. Солэсь кӧня луэмзэ лыдъясь кат «О налоге на холостяков, одиноких и бездетных граждан СССР» шуыса нимаськиз. Та аспӧртэмлыко вытэз тыризы семья статус шоры учкытэк нылпитэм пиосмуртъёс но, 20-ысен 45 аресозь бызем кышномуртъёс но. Семьяослы ӵемысь капчиятонъёсын (льготаосын) кунмы но юрттӥз. 20 аресозь кузпалъяськем семьяос егит шуыса лыдъяськизы, туала егит семья 35 аресозь пусъемын. 

Совето Союзысь нылкышноос ас арлыдзылэсь мӧйыгес адско

Улон но ужан луонлыкъёс трослы пӧртэм луизы ке, вашкала кышномуртлэн улонэз секытгес луэ. Нимысьтыз та война бере дыръёсы шӧдӥське. Кунмылэн экономика ласянь секыт вакытаз кышномуртъёслэн ымныръёсазы шуг улонлэн бервылъёсыз печатласькизы.

Ымныр утялтон но буяськон тусчеберъянъёслэн (косметикалэн) трос пӧртэмлыкез ӧй вал, озьы ик ӟечлыкез но лябгес луиз. Туннэ нуналэ тусчеберъянлэн узырлыкез паймытэ, составазы пӧртэм егит ымнырез утялтӥсь элементъёсыз но трос.

Война бере дыръёс советской нылкышноос понна шуген сётскизы. Соин кышномуртъёс асьсэ сярысь малпанъёссэс палэнэ кельтӥзы: азьпал радын котьку кузпалэз но нылпиосыз сылӥзы. Нош асьсэ сярысь малпаськыны яке дырзы, яке кужымзы ӧй вал. 

Туала кышномурт ачиз сярысь чик но уг вунэты. Гуртысь кышномурт озьы ик трос дырзэ семьяезлы висъя ке но, городысь кышномурт ассэ пиосмуртэн оградэ пуктэ.

Туж-а висъясько туала но вашкала поколениысь кышномуртъёс? Малпасько, дыр аслэсьтыз кылзэ одно ик пыртэ. Макем золгес асьмеос бызиськом, сокем ӝог дырмы но «пегӟе». Вашкала кышномуртъёс трослы узыргес адӟисько асьсэ лул малпанъёсынызы, ужъёсынызы, нош туала кышномуртлы палэнысь юнматон (одобрение) кулэ. Котькуд вакытысь кышномурт — со нырысь ик нуныян. Соин, кыӵе гинэ вакытысь кышномуртэз ум басьтӥське — со яратон ватос, кудӥз котьку пачылмемын небыт но либатӥсь кылъёсын.

Котькуд ныл, нылмурт, кышномурт, песянай дуннелэн бадӟым узырлыкез но ӝужась сяськаез. Со — шур кадь бызе но ваньзэ шонеръя, ваньзэ быдэстэ но ваньзэ радызъя лэсьтэ. Солэн мылкыдэз — семьялэн шудбурез, солэн тыршемез но ужамез — семьялэн шунытэз но тыр улонэз! Ма быдӟа тынад кужмыд, нылкышно?! Ма быдӟа тон кузьым, зэмос кышномурт!

Туспуктэм: Денис Корнилов