Удмурт писательёсмылэн сӥё-дано юбилейёссы пусйиськозы

Литература — адямилэн улоназ котьку бадӟым инты басьтӥсь сӧзнэт луиз. Туннэ нуналэ но книгалэн кужымез бадӟым, валтӥсь луэ. Книга магазинъёсысь пӧртэм пуштросо литератураен тодматскыны быгатӥськом: кельшисьсэ котькуд адями ас мылкыд каремезъя быръе.

Тупало-а туала гожъямъёс вашкала дыръёсысь малпанъёсын? Мар валтӥсез но огкадез луэ туала но вашкала адями понна? Та юанъёслы валэктыны тыршомы кык юбиляръёслэн произведениоссы но улон сюресъёссы пыр — Михаил Антонович Можгин (105 ар) но Николай Егорович Белоногов (85 ар).

Туала писательёслэн пӧртэм амалэн материал сётэмзы куддыр паймытэ но малпаськытэ. Но азьло дырысь писательёсмылэн калык борды юн басьтӥськемзы трослы малпаськонъёсы уськытэ: мар вал соослэн сюлмазы, кызьы соос шонертэмен нюръяськыны кужым шедьтӥзы? 

Туала югдуръёсты сазь йырын учкид ке, тросэз валамон: азьло вакытысь ужпумъёс туала улонлы тупаны кутскизы. Адямиослэн вожъяськонэз, лыдӟиськымтэез, визьнодамтэ луэмез, вылаз кылкутон басьтымтэез — ваньмыз туала поколениез возьытэ уськытэ, кайгырон мылкыдэ вуттэ. Соин но, дыр, азьло дырысь трос визьмо «йыръёс» асьсэлэн калыкез ӝутӥсь кужыменызы, шонер сюресэ поттон веранъёсынызы юнме луизы: репрессиосы шедьыса, пыраклы пайдаё ужъёссылэсь куштӥськоно луизы. Улонзэс сётыса, калык понна тыршизы, адямиез валаны но гажаны дышетӥзы. 

Михаил Антонович Можгин — дано удмурт писатель, кылысь кылэ берыктӥсь. Туэ солэн вордӥськемез дырысен 105 ар луэ. Вордӥськиз 18 толсуре 1918 арын Бавлы ёросысь Потапово-Тумбарла гуртын крестьян семьяын.
Пинал дырысеныз ик удмурт но ӟуч кылъёсты сяна, умой тодӥз чуваш, башкир, бигер кылъёсты (Потапово-Тумбарла гуртын бигеръёс но ӟучъёс уло), озьы ик егит дыръёсаз дышетӥз на украин но немец кылъёсты. Кин меда быгатоз туннэ нуналлы сыӵе трос кылъёсты тодэменыз данъяськыны? 

Ас мылкыд каремезъя, юн тыршеменыз тодон-валанъёссэ узыртыны тыршиз.
Быдӟым Атыкай ож кутскон вакытэ Казаньысь университетын рабфакез йылпумъяз. Нош ож йылпумъяськем бере Москваысь лулчеберетъя институтын заочно тодон-валан басьтӥз.

Горд Армиын службазэ ортчемезлэсь азьло, Удмурт Элькунысь книжной издательствоын редактор луыса ужаз, армиысь бертэм бераз УАССР-ысь лулчеберетъя министерствоын методист луыса тыршиз. Котькуд ужаз ассэ кылкутӥсь ужасен возьматӥз, огшоры калык понна тыршыса, ужъёсыз пайдаё луизы.

Быдӟым Атыкай ож но гожъясез палэнтӥ ӧз ортчы. Самой ӟырдыт шораз, 1941-тӥ арын, Тирасполь карын ожгар службазэ ортчиз. Вормон нуналэз пумитаз Германиын. Солэн юнлыкез но батырлыкез 2-тӥ степенё Отечественной война но Горд Кизили орденъёсын пусъемын, озьы ик трос мукет пӧртэм медальёсын но. 

Удмурт кылэ берыктылӥз ӟуч но кунгож, советской писательёслэсь произведениоссэс. Соос элькун изданиосын потӥзы. Тужгес но усто берыктэмез луиз чуваш литератураысь К. В. Ивановлэн «Нарспи» поэмаез. Ож вакытысь огазеям бичетъёсын фашистъёслы пумит пуштросъем кылбуръёсыз, веросъёсыз, очеркъёсыз печатласькизы.

М. Г. Можгин — удмурт литератураез кутскисьёс пӧлысь одӥгез, Михаил Антоновичлэн дядяез луэ. Михаил Григорьевич сярысь материалъёсты Михаил Антонович война бере гинэ утчаны кутскиз на. И. М. Даниловен валче нырысетӥ телевизионной художественной «Дышетӥсь» фильмлы сценарий но сыӵе нимен ик исторической драма гожтӥз.

Гожтосъёсаз туж паськыт усьтэмын ож вакыт. Ас вылаз вуэм секытъёс котькуд чуръёсаз шӧдӥсько. Кылсярысь, Михаил Антоновичлэн кылбурез «Азьлань, эше!»: 
Бугрес война — шаер вылэ
Сьӧд ӵын, сурым но вир вале.
Кышкыт война дунне вылын
Ӟеч шудбурез ӵушка тылын!
Данэн кужмо дурись сюлэм,
Ӝоггес! Азьлань, ӟырдыт оже!
Фашист гижы татчы мертчем,
Чигтом сое! Азьлань, эше!

Гожтэмын та чуръёс 1941 арын, шаермы понна шимес вакыт. Ожлудысь кышкытъёсын пумиськымтэ адямилэн йыраз та кылъёс нокыӵе мылкыдъёс уз бугыртэ, но туала улонлы нош ик тупась чуръёс луэмын. Кышкыт-а со? Малпаськид ке, туж секыт йылпумъянэ вуиськод: синкылиен дурем вормонмылы 80 арлэсь трос тырмыса, шаермы нош ик «сьӧсь» дуннее выйиз. 

Пенсие потэм бераз но Михаил Антонович шутэтскыны ӧз дырты: Ижкарысь Октябрьской ёросысь прокуратураын ужаз.

Кулӥз Ижкарын 1976 арлэн шуркынмоназ.