«Валтӥсез — нылпиос сӧл-таза мед луозы» (+фото)

Визьнодасьлэн ужез — туж тыршыса быдэстоно уж. Со трос саклыкез, чиданэз, яратонэз кулэ каре. Визьнодасьлы нуныясь анай но, оскымон эш но, визьмо дышетӥсь но, ужзэ валась психолог но луоно. Кӧня ке дасо нылпиослэсь куронъёссэс, сюлэмшугъяськонъёссэс, шумпотонъёссэс кылзӥськыны быгатоно. Котькудӥз визьнодась но, кулэ луись тодон-валан басьтыса, та ӧнеръя ужаны уз быгаты. Но та веран Фёдорова Светлана Александровналы, Балтасьысь 3-тӥ номеро нылпи садысь визьнодасьлы, воксё уг тупа. Школаын дышетскон дырысеныз визьнодасьлэсь ужзэ быдэстэмез бере, со та ӧнеръя тодон валан басьтыса но ужзэ азьланьтэ. Туннэ нуналэ но ужзэ яратыса быдэстэ. Та сярысь пыр-почгес кышномурт ачиз вераз — Визьнодасьёслэн ӧнер праздниксы азьын, кудӥз пусйиське 27 куарусёнэ, Светлана Александровна «Азьлане» газетлы интервью сётӥз.

— Светлана Александровна, тӥ кема аръёс ӵоже Балтасьысь 3-тӥ номеро нылпи садын визьнодась луыса ужаськоды…

— Зэмзэ верано ке, визьнодась луыса ужан сюресэ Балтасьын ӧз кутскы. 1986-тӥ арын, мыным дас кык арес луыку, бускель кышномуртмы Сания Шариповна (Сосна гуртысь нылпи садын заведующий луыса ужаз) мыным нянечка луыса ужаны чектӥз. Гужем нылпи садазы ужаны муртъёссы ӧй вал. Соку мон, 5-тӥ классэз йылпумъям нылаш, 7-тӥ классэз йылпумъям Римма апаеным ӵош, со нылпи садын нянечка луыса ужаны кутски (берлогес апай визьнодась луиз, нош мон нянечка вал, одӥг группаын ужамы). Яра ай, ӝуждаламы пичи ӧй вал (серекъя — ред.), соин ик Сания Шариповна та уже милемыз ӵектӥз ини. Туж ӧтиз, ужаны адямиосмы ӧвӧл шуыса куректӥз. Анаймылэсь разрешенизэ басьтӥмы но ужаны кутскимы. Балтась пумысен Соснае вуытозь попуткаен ветлӥмы, куддыръя пыдын мыныны но тупаз.  Малпаса уте ай, али асьсэос но нылпиос луэм кык нылъёслы пиналъёсты оскизы. Нырысетӥ ужан нуналэ бертыса бӧрдӥмы, больше ум мынэ, туж секыт, жадимы, асьсэос мед ужалозы шуыса. Заведующийлы мукет нуналаз озьы ик верамы: ми татын ум ужалэ ни. Но со милесьтым кызьы ке но мылкыдмес ӝутканы быгатӥз но ми ужаны кылимы. Со нуналысен арлы быдэ гужем кык толэзьзэ отын ужамы. Тӥни сыӵе вал мынам нырысетӥ ужам опытэ.

— Секыт ӧй вал-а дышыны? Асьтэос но нылпи луиллямды ведь соку…

— Капчи ӧй вал. 1982-тӥ арын Ярак-Чурмаысен Балтасе выжеммы бере, бигер кылэз умой тодӥськомы вал ини. Соин вераськон ласянь нокыӵе барьер ӧз кылды. Пичи дырысен бигер кылэз тодӥсько вал ини, апае но озьы. Нылпиосын тыршыса ужамы. Соос но милемыз яратӥзы, ми но соосты. Соин 1991-тӥ арын, школаез йылпумъяме бере, со ик нылпи садэ нянечка луыса ужаны интыяськи, малы ке но мыным отын туж кельшиз — коллективез но туж умой вал, нылпиос но бордазы кыскизы.

— Сосна нылпи садын ужаса басьтэм опытты тросэзлы дышетӥз, умой практика луиз, дыр.

— Озьы. Нылпиосын огъя кыл шедьтыны быгатыны туж юрттӥз. Нылпи дунне — со воксё мукет дунне ук. Нылпиослы дышемысь, улонме но та ӧрен герӟаме потӥз — Соснаын одӥг ар ужаме бере, Арча педучилищеын кык ар ӵоже визьнодасьлы дышетски (нялтас вераса, берлогес Казаньысь Лулчеберетъя институтын дышетскыса вылӥ тодон-валан но басьтӥ). Собере выльысь Сосна нылпи садэ берытски. Кык ар ужай. Озьыен, отын пинал, егит дыре ортчиз. Отын мон визьнодась луи.  Берлогес штатъёсты кулэстыны кутскизы но мон Балтасе ужаны выжи. Озьы тӥни 1996-тӥ арысен мон Балтасьысь нылпи садын тыршисько.

— Нянечка луыса-а, визьнодасен-а кутскиды ужан сюрестэс Балтасьысь нылпи садын?

— Визьнодась луыса. Нырысь суреданъя, лепкая занятиосты нуи, аппликациос, киужъёс лэсьтонъёсын выримы. Аслам группае ӧй вал, вань нылпиосын ужай. Кема аръёс ӵоже озьы тырши. Аръёс ортчыса, физкультурая визьнодась луи. Ушъяськыса уг вераськы, но физкультураен дышетыкум, нылпиос ӵошатсконъёсын нырысетӥ луо вал, малы ке шуоно мон соосын кулэ карыса, тунсыкъяськыса ужай. Нош группаен укмысэтӥ арзэ ужасько.

— Котьма ке но, собыдӟа опытэн визьнодась луыса, тӥ котькуд нылпиен — бадӟыменыз но, пичиеныз но — капчиен огъя кыл шедьтыны быгатӥськоды, дыр.

— Тыршисько. Котькуд нылпилы подход шедьтыны быгатыны кулэ. Шонер уз луы вераны, пичигес нылпиосын яке бадӟымъёсыныз капчигес ужаны шуыса. Ӧвӧл, со озьы ӧвӧл. Ясли группаын нылпиос вӧзын пыдесъяськыса ветлыны но тупа, соосты сюдоно-вордоно, ваньмызлы дышетоно. Подготовительной группаын но аслаз секытъёсыз вань. Отын нылпиос бадӟымгес бере ини, соосын бадӟымъёсын сямен вераськоно. Доразы луэм учыръёссэс, сюлмаськонъёссэс милемлы верало, нош ми соослэсь мылкыдъёссэс ӝутыны тыршиськомы.

— Визьнодась гинэ ӧвӧл, тӥ киужъёслы но усточи, физкультураен но вырись ӧнерчи, психолог но вылэм.  

— Крезьгуро инструментъёсын шудыны уг быгатӥськы али (серекъя — ред.). Шонерзэ верано ке, уждэ ке яратӥськод, кулэ ке кариськод, олокыӵе ӧнерлы но дышетскод. Нылпиосты мон туж яратӥсько, сотэк садикын ужаны ӧй быгатысал, дыр. «Кызьы тон сомында нылпиосты яратыны быгатӥськод» шуыса юасьёсыз но вань. Мон паймисько: кызьы уд быгаты? Мон соосты ваньзэсты туж яратӥсько. Туннэ нуналэ группаям 32 нылпи вань, мон соосыз ваньзэсты огкадь яратӥсько, ваньзы шоры одӥг синмын учкисько. Эшшо та мынам нырысетӥ выпуске но луоз. Паймоно кадь, но сомында аръёс ӵоже ужаса, одӥг группаез но та дырозь поттӥськымтэ вал, но подготовительной группаысь пиналъёсын трос ужай, соосты выпускать кари.

— Анай-атайёсын кусыпъёсты умой-а?

— Умой. Котькин аслаз нылпиезлы ӟечсэ гинэ сӥзе, соосты дышетэмез-визьнодамез потэ, соин та ласянь шуг-секытъёс кылдо шуыса ӧй верасал. Анай-атайёсын огъя кыл шедьтыса ужаськомы. Валче ужано эшъёсынымы но озьы ик. Коллективмы эшлыко, ог-огмылы юрттыны тыршиськомы ваньмыз ласянь. Шуг-секытъёс кылдо ке но, огъя малпаськомы, мар карыны луэ.  

— Шуг-секытъёс сярысь вераськон потэм бере, юатэк кельтэме уг луы: ужады тӥ понна маиз самой секытэз?

— Кылкутон туж бадӟым. Котькуд нуналэ «туннэ но нылпиосты садикын сӧл-тазаен пумитаса анай-атайёссылы сӧл-тазаен берыктыны мед луысал» шуыса малпанъёсын ужаны мынӥсько. Сыӵе учыръёс но луо, куке кудӥзлэн ке нылпилэн мылкыдыз ӧвӧл. Соосын вераськыны кулэ, мылкыдзэс ӝутыны. Та милям ужмылэн одӥг люкетэз. Со сяна, котькуд нылпилэсь выль басьтэм дӥськутсэ, пыдкутчанзэ, йырсиысьтыз резинкаоссэ гинэ но адӟыны быгатыны кулэ. Кыӵе соос шумпото, куке тон сое синйылтӥськод но солы саклык висъяськод. Огъя вераса, одӥг чыры-пырыез но кельтоно ӧвӧл.

— Котьку уг луы, дыр, ваньзэ синйылтыса вуттыны…

— Куке тон вӧзын 30-лэсь тросгес нылпиос, луэ. Потэ-а тынад вунэтэмед, уг-а — вунэтӥськод аслэсьтыд мукет малпанъёстэ но, проблемаостэ но. Ӝӧк сьӧрын кагазъёс пӧлын ужаса пукысал ке, оло, асламез сярысь малпаса пукысал. Но татын сомында нылпиез котькуд минутэ шудытыны, шулдыртыны кулэ.   

— Конкурсъёсы пыриськыны дырды кыле-а?

— Физкультураен воспитатель луыса ужакум, «Использование нестандартного оборудования на занятиях по физической культуре» шуыса нимаськись гожтэм авторской уже но вань. Соин тросэз тунсыкъяськизы. Со ужен выступать карылӥ, сое аслам ужам кутылӥ. «Арлэн воспитателез» конкурсъёсы пыриськыса, 2012 но 2017 аръёсы, ёросын кыкетӥ инты басьтӥ. Яратӥсько пӧртэм киужъёсты лэсьтыны, нылпи садын но та ужен вырисько, дыр луыку. Нылпиосын ӵош куддыръя ужаськомы. Мон но соосты дышетӥсько, соос но монэ.

— Туж шонер верады: визьнодась нылпиосты гинэ уг дышеты, нылпиос но визьнодасьёсты малы ке но дышето.

— Нырысь ик соос чиданлы, саклыклы дышето, ӟеч луыны дышето. Соос мукет, чылкыт дуннеын уло ведь. Котькуд чыры-пырылы шумпотыны быгато, ваньмызлэсь умойзэ шедьтыны, инкуазь чеберез адӟыны быгато. Ӵапак талы милемыз но дышето. Асьмеос ведь, бадӟымъёс, тае ӵемысь вунэтӥськомы, нош пиналъёс вӧзын ваньзэ тодамы уськытӥськомы.  

— Светлана Александровна, учырен пайдаяськыса, тӥледыз ӧнер праздникеныды — Визьнодасьёслэн нуналэнызы — ӟечкыласько! Секыт ужады азинсконъёс, выль вормонъёс, чидан сӥзисько. Нылпиосын но, анай-атайёсын но котьку тупаса, валче но сӧл-таза луыса кема-кема аръёс ӵоже ужаны мед кылдоз.