Визь пыртӥз!

Визь пыртӥз!

Эх, улон. Вот улон!

Песяй паймытӥз толон.

Вазь ӵукна ик вырӟыса,

Газ котыр ӵуштыр берга.

Тусьты-пуньы жингыртэ,

Кострольын марке пӧзе.

Куаралы луса вырӟи,

Ӧжыт мыр-мыр мыргетӥ.

Изьыны кема ӧз лу,

Юрттытэк амал уз лу.

— Что готовишь? —юасько.

— Мильымен шунянь пыжо.

— А что это, песянай?

— Эх, «шунянь» тон,

                                дыдыкай!

— Жаль потӥськод, нылоке.

Марзэ тодытэк, эке,

Тоӵ-тоӵ ушъяса сиёд

Чылк-чылк удмурт пӧрамме.

Но нырысь мон визь пырто,

Валамтэлы аналско.

Ӟуч сямен ваземедлы

Мон уг сёты пӧрамме.

Ӝӧк сьӧры монэ пуктӥз,

Сиён-юонэз тыриз,

Ваньзэ, мае адӟисько,

Удмурт сямен вератӥз.

Валасько мон песяйме,

Йырыз кур но туж пайме:

— Ма кызьы озьы луод,

Ас кылдэ, пе, кур карод?!

Плотникова София, Ципья шоръёзо школаысь 5 классын дышетскись, кивалтӥсез Чернова Ираида Анатольевна.

Пӧртэм кылъёсты

дышетскомы!

Удмурт кылэз яратыны,

Удмурт кылэн вераськыны,

Мон пичи дырысен ик дыши,

Анай кылме данъяны мон тырши!

Узыр удмурт дуннее

Ӧсэз усьтӥ мон анаен.

Удмурт кылъёс но кылбуръёс

Дышетскимы соин ӵошен.

Ческыт пельнянь но перепеч

Песянаен ми пӧрамы.

Чебер удмурт пужыосты

Ми апаен эскеримы.

Аръёс, толэзъёс ортчизы,

Дыр вуиз садике мыныны.

Удмурт кылэн вераськимы

Ӟучсэ кутским дышетскыны.

Бигер кылэн но тодматским,

«Исэнмесез» шуыса ӟечбуръяським.

Нырысетӥ классэ мыныкумы

Ми куинь кыллы узырмимы.

Удмурт, бигер но ӟуч но пор

Пиналъёсын ми пукиськом котыр.

Ог-огмес ми валаськомы

Ципья школаын дышетскиськомы.

Шудоен мон асме лыдъясько,

Кӧня кылэз  но мон тодӥсько.

Ваньмыныз мон тыршо вераськын,

Гажаны но тодам возьыны.

Котькуд кыл ас понназ туж чебер,

Ошмес ву кадь ик со жильыртэ.

Котькуд кыл ас понназ туж узыр,

Котькинэ ас бордаз со кыске.

Ӧтисько мон тӥлед, эшъёсы,

Уломы асьмеос огкылысь!

Ог-огмес яратом, гажалом,

Выль кылъёсты дышетском!

Кузнецова Ольга, Ципья шоръёзо школаысь 10-тӥ классысь дышетскись, кивалтӥсез Григорьева Алина Ивановна.

Уйвӧтысь букваос

Катимы нырысетӥ классэ ветлэ ини. Туннэ со дораз туж секыт мылкыдын вамыштэ, пыдзэ мырдэм кыска. Анаез паймыса учке Кати шоры:

— Ма таӵе тонэн туннэ, нылоке?

— Дышетӥсьмы туж секыт уж сётӥз туннэ: удмурт алфавитэз, пе, дышетоно!!! Ма, отын люкаськемын ук туж трос букваос!

Кати уг яраты маке дышетскыны. Со яратэ урамын эшъёсыныз ватскыса но бызьылыса шудыны, телефонысь мультфильмъёс учкыны. Апаез но анаез косӥзы Катиез алфавит дышетскыны. Нош со ялан аслэсьтыззэ вера:

— Малы кулэ со букваос? Мон тазьы но лыдӟыны быгатӥсько ни! Ӟуч алфавитэз тодэм бере уг тырмы, шат?! Малы кулэ нош удмуртсэ но дышетскыны?!

Куатаськиз анаез, вожзэ поттӥз апаез. Озьы ке но Катиез шудыны потыны ӧз лэзе, букварьзэ дораз ик кельтӥзы. Оло маке малпалоз, оло зэм но дышетскоз.

Кема пукиз Кати укно дорын азбаре учкыса. Эшшо но вожез потӥз солэн букваослы, сэрпалтӥз со букварьзэ палэнэ, выдӥз йыркурзэ вормытэк валес вылэ.

Шӧдтэк шорысь букварез ӵаштыртыны, вырыны кутскиз, бызьыса потӥзы пичи букваос но кудзы кытчы бызьыса кошкизы. Паймиз Кати таӵе пӧртмаськемлы, ӝог бызиз анаезлы но апаезлы вераны. Нош тани паймымон: анаез но, апаез но, кроватез но, ӝӧкез но висъетысьтыз ышиллям. Паймиз Кати таӵе пӧртмаськемлы но бӧрдыны кутскиз.

Ӵаштыртэм куара кылыса, Кати йырзэ ӝутӥз но паймиз. Со дорын ӟечыраса сылэ кык пыдо ӝӧк.

— Ма луиз тонэн, ӝӧк? Малы тон кык пыдо? Кин тонэ таӵе сӧриз? — паймиз Кати.

— Ма тон ик сӧрид, Кати! Удмурт алфавит кулэ ӧвӧл шуэменыд. Ӟуч кылын монэ пӧрмытӥсь буква одӥг гинэ ук! Нош удмурт алфавитын Ӝ но Ӧ букваос вань, соостэк монэ лыдӟыны но, гожтыны но уг луы! Ӝог куты та тылыез но гожты тетрадяд Ӝ но Ӧ букваосты!

Кати басьтӥз ӝӧклэсь тылызэ но гожтӥз тетрадяз Ӝ но Ӧ букваосты. Соку ик ӝӧклэн пыдъёсыз потӥзы.

Анайёссэ утчаса, азбаре потыны малпаз Кати. Нош дӥсезлэн пал суйыз кеськыса усем.

— Тонэныд нош мар луиз?

— Ма милемыз лыдӟыны луоз-а точкаосын И-тэк? Кати, басьты тылыдэ, ӝог гожты тон тетрадяд   Ӥ букваез!

Кати озьы ик кариз. Соку ик дӥсезлэн суйыз интыяз бырыктӥськиз. Ӝог дӥсяз Кати дӥськутсэ но бызьыса потӥз азбаре. Ма маар таӵе та пӧртмаськон? Ӟечыран кырыжмемын, пал бурдо ӵана тэтча дораз.

— Ма луиз тӥледын?

— Кати, ӝог куты тон тылыдэ, чаляк гожты тетрадяд Ӟ но Ӵ букваосты, сотэк кылём ми татчы огмы кырыжмыса, огмы пал бурдо!

Ӝог бызиз Кати корказ, Ӟ но Ӵ букваосты гожтӥз со тетрадяз. Соку ик ӟечыран шонермиз, нош ӵана инме лобӟиз. Ӵаналэн шумпотыса кесяськеменыз Кати куаляк луыса сайказ.

Нош мар таӵе та паймымон? Тылыез но тетрадез вӧзаз ӧвӧл. Нош книгаез озьы ик кылле куштэм интыяз. Ӝог вырӟиз Кати валесысьтыз, басьтӥз кияз книгазэ.

Табере Кати валаз: уг лу вылэм удмурт кылын лыдӟыны, ӟуч букваосты гинэ тодыса.

Чирикова Кира, Ӟаны шоръёзо школаысь 5 классын дышетскись, кивалтӥсез Чирикова Лилия Викторовна.

Кулэ-а дышетскыны удмурт кылэз?

Котькуд калыклэн вань аслаз родной кылэз, кудӥз выжыысь-выжые герӟа калыкез, солэсь кусыпъёссэ.

Мон яратӥсько аслэсьтым кылме, со – удмурт кыл. Удмурт кылэн вераське мынам семьяе, эшъёсы, ӵыжы-выжыосы, тодмоосы. Удмурт кылэз нырысьсэ мон кылӥ анай-атайлэсь. Анайлэсь дыши кырӟанъёсты, кудъёссэ со мыным кырӟалляз, монэ веттаса изьытыкуз. Анае монэ котьмалы дышетэ, лыдӟе удмурт кылын веросъёс, кылбуръёс, мадиськонъёс. Ӵош кылзӥськомы удмурт кырӟанъёсты. Апае но кырӟаны-эктыны яратэ, пӧртэм концертъёсы пыриське. Мон туж яратӥсько аслэсьтым кылме.

Удмурт кыл герӟа монэ аслам семьяеным, калыкеным, озьы ик шаереным. Мон шудо, малы ке шуоно мон тодӥсько вордскем кылме.

Дорамы ми возьмаськомы вашкала дэремъёсты, утиськомы сям-йылолъёсты. Мыным но пичиысен ик шуд усиз песянайлэн дэременыз сцена вылын кырӟаса ветлыны. Нырысьсэ мон «Мемие но вордэм» кырӟанэз быдэстӥ.

Мон малпасько, удмурт кылэз одно ик дышетсконо, палэнэ кошкыса но вунэтоно ӧвӧл. Мыным со туж мусо, чебер, жингрес кылӥське. Удмурт кыл асьмелэн анай-атай кылмы, асьмелэн азьпал улонмы. Кыл быриз ке, калык но ышоз, быроз. Утёме вордскем кылмес! Утёме калыкмес!

Апакова Лиана, Ӟаны шоръёзо школаысь 6 классын дышетскись, кивалтӥсез Петрова Римма Николаевна.