Вормонэ ӵошен кужым поныса гинэ вутскыны луэ

Тулыс но гужем лыдӟисьёсмес бусы ужъёслэн мынэменызы, усто механизаторъёсын тросгес тодматыны тыршиськомы. Таяз учыре редакциысьтымы коллегаенымы «Сурнай» обществолэн ужасьёсынызы пумиськимы.

«Сурнай» обществоысь машина-трактор паркын монэ тракторной бригадалэн бригадирез Николай Анатольевич Медведев пумитаз. Кема аръёс ӵоже гурт удысын тыршись воргоронлэн ужан дырыз вал ке но, со, пал кыл но вератэк, ужзэ кельтыса, вераськыны соглаш луиз.

— Покчи Лӧзяысь тракторной паркын 25 единица техника лыдъяське. Соос пӧлын вань пудо сиён люкан комбайнъёс, тракторъёс, прицепной техника. Коллективын тросэз ужасьёс удмуртъёс, Покчи Лӧзяысь но матысь гуртъёсысь адямиос ужаны ветло. Тросэз соос пӧлысь татын туж кема ужало ини. Вордскем дырысеным татын, лэся, ини мон ачим но, — серекъяса вера Николай Анатольевич ачиз сярысь. — Огшоры механизаторысен ужан сюресме кутски, туннэ нуналэ тани бригадир луисько.

1975-тӥ арысен обществоын ужась Николай Анатольевич кема аръёс ӵоже механизатор луыса тыршем, нош 20 ар ортчыса, 1995-тӥ арын, гаражен кивалтыны кутскем. Со ужзэ ньыль ар ӵоже быдэстэм. 1999-тӥ арысен туннэ нуналозь Николай Анатольевич бригадирлэсь ужзэ быдэстэ ини. Ӵукна наряд сёто, со но та юанъёс кылдыку, соосты решать каре, ужез радъян, контроль улсын возён но со вылын…

 — Гуртын вордскем но будэм пиос тросэз бадӟым классъёсын дышетскыкузы гужемзэ бусые ужаны пото вал ук. Мон но озьы ик ужаны ветлӥ, комбайнёрлэн юрттӥсез луи. Соин механизатор луыса ужаны кутскеме бере, мон та ужлэсь чыры-пырыоссэ тодӥсько вал ини, со опытэ мыным юрттӥз. Бригадир луэме бере, механизатор луэме юрттӥз, — шуэ Николай Анатольевич.

Механизаторлэсь ужзэ туж умой тодэ бере, бригадирлэн ужасьёсыныз но кылыз тупа, ог-огенызы кенешыса, валче ужаны быгато вылэм соос.

— Коллективен кусыпъёсмы умой. Жаляса верано, егитъёслэн гинэ ужаны лыктэмзы уг поты. Азьло практикае но трос ветло вал, туэ тани кык пиос гинэ луизы. Кытын капчи, отчы кыстӥсько егитъёс. Нош милям ужмы капчи ӧвӧл. Соин коллективын тросэз аресэн ужасьёс, пенсионеръёс но ӧжыт ӧвӧл. Мон ачим но пенсиын ини. Но ужасьёс, арессы шоры учкытэк, егит ужасьёслэсь уг кылё, асьсэлэсь ужзэс рос-прос быдэсто, — шуэ Николай Анатольевич. — Тӥ соосын вераськыса, тае валалоды.