Вукогуртлэн вольыт урамъёсыз (+фоторепортаж)

- Туала Вукогуртын 51 хозяйство лыдъяське, улӥсьёсыз 201 адями луо, - шуэ Ципья гурт поселенилэн исполкомезлэн кивалтӥсезлэн воштӥсез Ольга Гаврилова.

Гуртлэн таза, чебер коркаосыз бадӟым сюресысен ик синме йӧто. Озьыен, Вукогуртын но, трос мукет удмурт гуртъёсын сямен ик, ужез яратӥсь, умой улыны тыршись калык улэ. Зэм но, гуртэ пыдлогес пыремъя та малпан юнма гинэ. Чебересь-чебересь коркаос, кык этажоосыз но вань, котькуд гидкуазьын сяська мерттэмын. Синмаськымон. Гуртлэн интыез но туж ӟайлы - бадӟым сюрес дурын, Ципьялы матын. Оло, соин но, дыр, Вукогуртэз городскойёс но матын кариллям.

- Али кемалась ӧвӧл карысь 2 семья, Вукогуртын музъем басьтыса, корка лэсьтыны кутскизы, - ивортэ Ольга Евгеньевна.

Мазэ веранэз, егитъёс пӧлын гуртэ кылисьёсыз но, кошкисьёсыз но вань.

- Гуртэз матын карисьёс ӵемысь «Труд» обществоын ужало, - шуэ вордскем гуртэзлэн улон-вылонэныз тунсыкъяськыса улӥсь Евгения Михайлова.

Гурт интыын тужгес секыт югдур кылдыто, дыр, сюресъёсын но вуэн герӟаськем ужпумъёс. Вукогуртын ву ласянь бадӟым шугъяськон уг кылды, шуыны кулэ. Ву колонкаосы лыктэ. Но одӥг кулэяськонзы вань ик. Гуртазы азьло дырысен одӥг гинэ ошмессы луэм. Туннэ нуналэ со куашкам югдурын, тупатэмез кулэ каре. «Ошмесэз радъяны юрттӥсьёс уз шеде меда?» - шуо вукогуртъёс.

- Сюресъёс сярысь ке верано, Вукогуртын самообложениен валче люкам коньдонлы Заречная урамлэн 412 метръем кусыпаз, Колхозная но Молодёжная урамъёс куспысь 140 метръем сюресэ из вӧлдэмын, - шуэ Ольга Евгеньевна. Вуоно арын но та уж азинтӥськоз, сюресъёсты тупатомы шуыса оскытӥз на Ципья поселенилэн главаез Азат Нотфуллин.

Калыклы юрттэт сётӥсь объектъёсты учконо ке, Вукогуртын вань фельдшер-акушер пункт, клуб но магазин. Азьло луэм на покчиёзо школа но, ужам нылпи сад. Соосты улыса-вылыса борӟаллям. 1965-тӥ арысен кутскыса Вукогурт нылпиос Ципья шоръёзо школаын тодон-валан люкало. ФАП-сы выль ӧвӧл ке но, со таза адске. Мазэ веранэз, та гурт фельдшерлэн тыршемезлэн но бервылыз луэ, дыр. Юртъерез кузёезъя учко уга. Маргарита Петровна Васильева 22 ар ини гуртын фельдшер луыса ужа, Вукогуртысь но Вуж Ципьяысь калыклы эмъюрттэт сётэ. Гурт калык сое туж гажа, матын каре. Кузпалыз но солэн адӟем карымон. Геннадий Петрович 1979-тӥ арысен кутскыса туннэ нуналозь «Труд» хозяйствоын (азьло Сырья гуртын, бератаз Вукогуртын) ветврач луыса тырше. Васильевъёс кык нылпи будэто: пи но ныл. Нылзы банкын ужа. Пизы кузпалъяськемын ини. Кузпалэз но, ачиз но полициын ужало. Соослэн но кык нылзы вань. Туннэ нуналэ Васильевъёс шудо анай-атай, яратоно песяй-бабай луыса, калык пӧлын гажамон луыса гумыр каро.

Зэм, гурт чебер аслаз ӟеч сямо адямиосыныз но адӟем карымон семьяосыныз. Соос Вукогуртын трос. Юлия но Лев Григорьевъёс, Валентина но Валентин Никитинъёс, Элиана но Фёдор Пашкеевъёс, Елена Никитинаен Иван Черновлэн семьязы но сыӵеос пӧлысь.

Огъя вераса, Вукогуртлэн паськыт урамъёстӥз ортчыку, таӵе малпан кылдэ: гурт азинске, чеберске, егитоме. Туала удмурт гуртъёс чик но узыр бигер гуртъёслэсь кулэс ӧвӧл.