Вӧй праздник

Юмшан кутске покчиарняе. Ӵукна ик нянь, табань, мильым пыжылӥзы. Нуназе егитъёс шудылӥзы, кырӟаса ульча кузя валэн ворттылӥзы. Валъёссэс чебермаллязы: букое пужыятэм ӵушкон, гырлы ошылӥзы, валзэс шобретэн шобыртылӥзы. ӝытазе пересьёс юмшаллязы, кырӟаллязы, нош егит муртъёс, соослэсь эктэмзэс-кырӟамзэс учкыса, сьӧразы ветлӥзы.

Егитъёс куасэн нискылазы, пичи дӧдьыосын, вал дӧдьыосын, юри тупатэм скамьяосын, черсон кубо вылын. Егит пиос, гурт пумысь нялмыт, ӝужыт гурезь бырйыса, лымызэ лёгало вал, собере гурезь кузяна вольыт пуӵ тырылӥзы, нош куд-ог дыръя ӵошкыт интызэ но йӧвалег карылӥзы. Сое «вӧй пуӵ» шуылӥзы, чебермам валэн, гырлыен юри нюлэскысь вайылӥзы. Со пуӵ вылтӥ егит пиен но нылэн яке ныл нылэн, ваче ки кутскыса, кырӟаса нискылаллязы.

Юмшанлэн самой шулдыр дырыз луэ вал ӟучарня. Та нуналлы мӧйыос нимысьтыз дасяськылӥзы: брага но сур пуктылӥзы, картошка, мильым вӧяллязы, кык-куинь пӧртэм шыд пӧзьтылӥзы. Вӧй келянэ мӧйы кышноос люкаськылӥзы но уйбыт коркась корка ветлӥзы. Кышноос вылазы куать но солэсь трос кильымо шортдэремзэс дӥсяллязы. «Зӧкомем» кышномуртъёслэн сыӵе йӧспӧртэм горд дэремъёссы вуоно тулыс-гужемлэсь дэлето но ваньбуро луэмзэ, адямилэсь вордон-пиян быгатонлыксэ возьматэм выллем луэ. Шундылэсь буёлзэ, кужымзэ сӥлы каремзы но адӟиське та йылолын.

Вӧй тулыс лыктонэн герӟаськемын. Пыдазы кут кутчаллязы. Кут кутчамзэс сапегъёссэс жалямен валэкто ке но, солэн мугез, ми валамъя, сокем огшоры вылымтэ. Кут вашкала пыдкутчан бере, сое пыдэ понэм вашкала йылолэз утем выллем луэ.

Егитъёс ӝытазе ӧз шулдыръяськылэ ни, пересьёс гинэ эктылӥзы но кырӟаллязы, нош егитъёс учкыса ветлӥзы. Озьы Вӧй келянзы югыт луытозь кыстӥськылӥз.

Редакцилэсь: гажано эшъёс, туэ Вӧй арня тупа 24 февраль - 2 март нуналъёслы.