Выльысь берыктысал пичи дырме

Та кылъёсты ке кылӥсько, нырысь ик песянайлэн но анайлэн мусояса верамзы тодам лыктэ: «мусое, чебере, нуныкае, шушые, улмопуысь сяськае…». Тросэз удмурт сямен мусоян кылъёс вунэмын ини, кылсярысь: «пичи ыкы (ротик), кикы (ручки), бубы (ножки), чими (глазки), йыгы (головка), беки (попка) но мукетъёс. Собере школаын дышетскем аръёсы син азям пуксё. Школа…  Кинлы кызьы, дыр, нош мыным — со шудо пичи дыр, матысь эшъёсы, тодон-валан, чырткемъя но йырвизья ӵошатскон, анай-атай вӧзын чик но сюлмаськытэк улон.

Кемалась ӧвӧл Ӟаны школаез йылпумъясьёслы пумиськон луиз. Чылкыт но шуныт школаын, пальпотыса капчи мылкыдын куноосты пумитазы. Та пумиськонэ ӧтемын вал 1973-тӥ арысен кутскыса вить ар кусып тупатыса 2018-тӥ арозь дышетскемъёс. Школаез пӧртэм аръёсы йылпумъямъёс ог-огзэс адӟемзы потыса лыктӥллям, луоз: серекъяло но паймо, куд-огзэ уг тодмало. Трос ӵошен люкаськыса тодазы вайизы дышетскон аръёссэс, яратоно дышетӥсьёссылы шуныт кылъёс но веразы, кузьымъёс сетӥзы, школалы но пичи ке но юрттэт карыны ӧз вунэтэ. Али дыре дышетскисьёс но паймымон: умой дышетско, спортын но вормыло, усто кырӟало-экто, кылбур но лыдӟо — соослэн ваньмыз азьпалан! Туж шумпотымон: Ӟаны школаын ке но, удмурт директор вань на (огдыре соос куинь вал: Иван Васильевич Ермаков Ӟаныын, Василий Фёдорович Трофимов Ципьяын, Пётр Васильевич Байтуганов Покчи Лӧзяын). Константин Викторович, азьпалан юн тазалык но выль азинсконъёс тӥледлы!   Шӧдӥське: школаын удмуртлыкез утён бордын ужало, дышетӥсьёс сцена вылысен чылкыт асьме кылын вераны быгато, паймымон чыртыкышъёс лэсьтӥллям нылкышно дышетӥсьёс, синмаськымон, туж кельышлы!

Экранын вакчияк школалэсь историзэ возьматӥзы. Одӥгез лыктэм куно тазьы шуиз: «Сюлэм бугырске… Дышетскон аръёсмес син азямы пуктӥмы. Вуж школамес тусын ке но адӟимы, сыӵе бадӟым но умой потэ вал со милемлы. Кузь коридортӥ «тӧл пери» кадь бызьылэм дыръёс, куасэн ӵошатсконъёс, шашки но шахмат, волейбол но футбол, хорын но ансамбльын кырӟан но эктон, пионер слётъёс — ваньзэ вераса но быдтонтэм. Кӧня гажано дышетӥсьёсмес адӟимы туспуктэмъёсысь! Жаль, улон аслэсьтыззэ басьтэ: пересьмон ворме, тодмо дышетӥсьёсмылэн школае лыктыны кужымзы ӧвӧл ни. Гажано дышетӥсьёсмы, тӥледлы тау кареммес вераськом, юн тазалык ваньдылы сӥзиськом».

Пумиськон азьланьтӥськиз нимаз дасям кабинетъёсын. Отын куноос дышетскем дырзэс тодазы вайизы. Шокчытэк сямен ог-огзэс кылзӥзы, серекъязы но кырӟазы:

Ой, шудо егит дыр!

Пуксьы вал на вӧзам

Ну монэ ас дорад,

Паймымон шаерад!

Трос аръёс ортчемын ке но, школаез йылпумъямъёс пиналмизы кадь. Нош ик дышетскисьёс сямен парта сьӧры пуксизы. Бордгазет суреданзэс, пиос нылъёслэсь зундэс таламзэс, гуртъёс кузя концертэн потамзэс, экскурсие ветлэмзэс тодазы вайыса серекъязы.  Мызганчизы но одӥг гинэ ӧвӧл вылэм. Вылын но, улын но зол юмшазы, уйшорозь чузъяськизы кырӟан но эктон гуръёс. Эшъёсын люкиськон секыт луиз, школалэн кивалтӥсезлы, дышетӥсьёслы но отын ужасьёслы бадӟым тау каремзэс вераса, азьпалан пумиськыны нош ик вераськизы. Вуоно пумиськытозь, школа!

Нина Андреева,

Нолинск кар