Халтуринъёс — ёросысьтымы дышетӥсьёслэн дано династизы (2-тӥ люкет)

1946-тӥ арын Фёкла Владимировна фронтысь сӧсырмыса бертэм Григорий Семёновичлы бызе. Эшъёс, огмылкыдо муртъёс, нылпиослы тодон-валан сётыны тыршись Халтуринъёс вордскем гуртысьтызы школаын ӵош ужаны кутско. Нош 1954-тӥ арын семьяез Ӟаны гуртэ дышетыны лэзё (со дыре Ӟаныын сизьым аръем школа усьтӥське, Халтуринъёслэн тодон-валанзы, опытсы луэмысь, соосты РОНО-ысен отчы келяны малпало, нош Кӧргемысь покчиёзо школае мукет дышетӥсьёсты ысто). Пал кыл но вератэк, ас ужзылэн патриотъёссы луись Халтуринъёс Ӟаные кошко — Фёкла Владимировна дышетӥсь луыса ужа, нош кузпалэз — школалэн директорез.

— Кык юртлы улыны кутскимы — Кӧргемын но Ӟаныын. Арня ӵоже Ӟаныын улӥмы, шутэтскон нуналъёсы Кӧргеме бертамы. Соку куинь нылпимы вань вал ини. Одӥг нылпимы, Тамара, анайзыен-атайзыен Кӧргеме кылиз, нош пиосмы сьӧрамы мынӥзы. Озьыен, Игорь пимы Ӟаные дышетскыны мынӥз 1-тӥ классэ, нош Славик пимы пичи вал али, кӧня ке толэзьем гинэ, — шуэ Фёкла Владимировна.

1958-тӥ арын Халтуринъёс выльысь Кӧргеме ужаны берто. Со дырысен гуртын школа ворсаськытозь, 1976-тӥ арозь, Фёкла Владимировна нылпиослы тодон-валан сётэ. Собере пенсие потэ.

— Дышетӥсьлэн ужез — капчи уж ӧвӧл со. Нылпиослы тодон-валан сётон — со ӝыны уж гинэ, соос понна пример но луыны кулэ. Котькуд кылдэ малпаса верано, астэ умой возёно, чылкыт но чебер луоно, — пичияк шутэтскемез бере, азьланьтӥз веранзэ песянай. Чылкытлык сярысь вераськон потэм бере, со дэремзэ, йырсиоссэ, кышетсэ тупатӥз, собере, «Чебер-а мон адскисько?» шуыса юам выллем, син шорам учкиз. Ас поннам малпасько: «Интеллигент кышномурт 98 аресэн но интеллигент вылэм со…» Нош малпанъёсме шара вераны уг дӥсьтӥськы.

— Туж чебер, — гинэ шуисько. — Син медаз усьы.

Пальпотэмзэ возьматыны тыршытэк, Фёкла Владимировна ӝӧк вылын сылӥсь пичи посудаысь му (чечы) басьтыса веръяз но, шуиз:

— Мыным та улонын сомында ар улыны ма юрттэ, тодӥськод-а?

— Ма? — паймемме ватытэк юасько но песянайлы ӝӧк вылын вуэн сылӥсь чаркаез сётӥсько.

— Му, — куаразэ сётэ Фёкла Владимировна. — Му туж умой маке со. Мон сое олокӧня ар сиисько ини.

Мар вераны ёрмыса пукемме шӧдыса, Фёкла Владимировна пумиськонмылэн валтӥсь темаяз берытскиз. Му сярысь номыр но ӧз вера ини. Вераськимы кузпалэз Григорий Семёнович сярысь.

Азьланьтонэз вань.