Зэмос удмурт нылкышно

 Гуртысь клубъёс арысь аре асьсэлэсь кулэлыксэс уг ышто — одӥг поколение сьӧры мукетыз поколение будыса мынэ, егитъёс гинэ вошъясько — клуб котьку ужа.

Асьме ёросысьтымы культура удысын тыршисьёсты ваньзэсты ушъяса гожтыны луэ. Макем бадӟым но кылкутымон уж быдэстэмзэс соос асьсэос гинэ тодо. Но таяз учыре нимаз гожтоно каримы Вуж Кушкет гуртысь клубен кивалтӥсь Щербакова Светлана Петровна сярысь. Та гуртысь клублэн территорияз гужембыт пӧртэм чебересь сяськаос калыкез шумпотто. Толалтэ гинэ но  отчы сюрес котьку лымылэсь сузямын луэ. Та ваньмыз Светлана Петровналэн тыршемезлэн бервылыз. Мамында солэн район но республика масштабен, озьы ик Удмуртиысь бертэм наградаосыз! Туэ республика масштабен ортчем Гырон быдтон праздникын гинэ но Светлана Петровнаез Балтась ёросысь удмуртъёслэсь сям-йылолъёссэс утёнын но азинтонын мыло-кыдо ужамез но бадӟым люкет пыртэмез понна Таукарон гожтэтэн пусйизы.

— Ваньзэ грамотаосме но таукарон гожтэтъёсме огъя люкад ке, одӥг коркалэн котыр борддоръёсаз тырымон луоз, дыр, — пальпотэ ачиз нылкышно. — Милям ужмы ведь, малпад ке, сокем секыт но ӧвӧл. Но адями сьӧрын ветлонэз, соосты мар ке ужаны куронэз, концертэ яке кыӵе ке ужрадэ пыриськыны ӧтёнэз... Вот соиз самой секытэз но самой умойтэмез. Котькуд адямиен огъя кыл шедьтыны кулэ ведь, — пусйиз со вераськыны кутскеммы бере ик.

Светлана Петровна вордскем Пор- Кутеш гуртын, отын ик солэн пинал дырыз но ортчем. Казаньысь культурая государственной институтэз библиотекарь ӧнеръя йылпумъяса, со нырысь ужаны интыяське Ӟаныысь библиотекае. Отын одӥг ар ужамез бере ини Вуж Кушкетысь клубе пыре, со дырысен отын ик ужа.

— Гурт калык юрттӥз ке, ужаськод со дас ар но, кызь ар но, куамын ар но. Та уж меӵак гурт калыкен, гуртысь адямиосын герӟаськемын. Соос ке юртто — ваньмыз пӧрме. Туннэ нуналэ гуртамы куара кылзӥсьёс трос, соиз шумпотымон. Милям ведь ужмы но ӧжыт ӧвӧл. Школаосын, садикъёсын кусып возьыса валче ужаськом, со сяна клуб — со быръён участок но, соин ужъёсмы туж трос луыло, — шуэ Светапай.

Ма, ужез трос ке но, ачиз Светапай котьмазэ но карыса вутске. Клубын ужамез сяна со ини ог 5 арлы матэ гуртысьтызы начальной школаын сиён пӧзьтӥсь но утялскись луыса ужа — нышырозь сиён пӧзьтэ, арнялы кык пол утялске. «Ак Барс» страховой компаниын страховщик луыса но ужа али со!

— Бен, — паймыса юасько, — гуртын улыса кызьы вутскиськоды? Али пудоды но вань, дыр...

— Тыршисько ни. Пудо но вордӥськомы — куинь скалмы вань, ӵӧжъёс, ӟазегъёс, курегъёс... Бакчамы но вань. Ма бен, пудо но ӧд ке ворды, ма карыса кыллёд гуртын? Мон шуисько, ми валлян сямен улӥськомы, — серекъя Светлана Петровна.

Вуж Кушкет гуртысь «Чибори» ансамблез ваньмы тодӥськомы, дыр. Кылдытӥсез солэн ӵапак Светапай вылэм. Со луэм ини кыдёкысь 1991-тӥ арын. «Ансамбльын арысь аре составез воштӥське, выльдӥське, егитъёс ӧжыт ке но лыкто. Ини кытчы гинэ ӧм вуылэ — Альметьевске, Ижевске, Казане...», — шумпотонзэ ватытэк вера Светлана Петровна. 

Ансамбльлэн бадӟым вормонъёсызлы, аслаз вутскемъёсыз понна нылкышно пумтэм тау каре гурт калыкезлы. Соослэн югдуре пырыса котьку юрттыны дась луэмзы физической гинэ ӧвӧл, моральной кужым но сётэ ук. Тужгес но висъяса вера Светапай аслэсьтыз семьязэ.

— Семьялэн юрттэмезтэк та ужын нокызьы но уг луы. Кузпалы Сергей котьма ласянь но юрттэ, аслэсьтыз кенешъёссэ но ӵектэ, кылын гинэ ӧвӧл — ужен но котьку юрттэ. Гуртамы вуж клуб ужаку, отысь вӧлдэтъёссэ но со радъяз. Кыӵе ке концерт пуктоно вылэм — нылме, Юляез, юрттыны курисько (Юля кырӟаны туж усто), пиме Костяез аппаратура азе пуктӥсько, со милям техника ласянь усточи. Клублэн территорияз утялскыны но семьяе юрттэ. Тӥни озьы ик ужаськомы — ваньзэ огазе. Яра али сыӵе юрттӥсьёсы вань, — шумпотэ со.

Юрттӥсьёстэк та ужын, зэмзэ но, ужаны уг луы, дыр. Выль клубез усьтон азьын но Светапайлы кӧня ужаны тупам — пеймытозь кышномурт ачиз утялскем, ачиз ик дорысьтыз сяськаоссэ пуктыса соослы вузэ но кисьтам... Ма туннэ но со ачиз вань ужъёссэ ачиз быдэсъя — завклуб но, техничка но ачиз. Со сяна аслаз юртаз но ваньмыз утялтэмын — гидкуазяз пӧртэм чебересь сяськаос (Вконтакте вотэсбамысь шедьтыса учкиськем вал — Н. Ж.), семьязэ ческыт-ческыт пӧраськемъёсыныз но шумпоттэ Светапай.

«Гуртлэн патриотэз» шуысал мон Светлана Петровнаез. Котьмазэ карыса вутске, ужзэ яратэ, семьязэ уте... Зэмос нылкышно. Зэмос удмурт нылкышно!