Зэмос юн семья

Ӟечгес ке малпад, та улон туж юн герӟаськемын семьяен, кытын выль улон кылдэ, улон азьланьске. Ог-огдэ валаса но гажаса улондэ ке азьланьтӥд, нылпиосыныд но внукъёсыныд тупаса ке улӥд, гурт калыктэ валаны но гажаны ке быгатӥд, со ӧвӧл-а меда зэмос шуд? Кемалась ӧвӧл Вукогуртын улӥсь Егор Михайлович но Надежда Ивановна Щербаковъёс 55 ар ӵош улэмзэс пусъемын. Тае тодыса, туж шумпотӥ: улонэз яратыса но валаса, нылпиоссэс таза, визьмо будэтыны тыршизы, гурт калыкен но туж тупаса уло, одӥг кылын вераса, зэмос юн семья. Нош соин ӵош ик малпай, соослэн ӵошен улэмзы 60 арлы матэ луэ. Газетын мар сярысь гожтэмын вал, уг тодӥськы, соин ик кӧня ке аслэсьтым малпанме гожто.

Со вал 1960 ар, мон гуртамы ньылетӥ классын дышетскисько вал. Анае шуиз: «Лёгор агаед кышнояськем, ойдо, адӟыны васькомы». Со дыре кызьы выль кен ву вае, медаз кисьтаськы шуыса, яке выж ӵуже, пулъёс вискы жагез медаз кыльы шуыса, кӧня ке туганъёсыз адӟылӥзы. Ми васькыку, кӧня ке адями вань вал ини. Надя апай корказьзэ ӵуже вал. Веськрес мугоро, возьдаськись, сыӵеен со туж юн пыӵаса кылиз тодэ ваёнъёсам. Кӧня ке Егор Михайловичлэн улэмез-будэмез сярысь. Анаез, Матрон кенак, кык пи будэтӥз: Егор, солэн выныз Аркадий. Анайзы, шуыны луэ, тыршиз пиоссэ юн-таза, ужез яратӥсь, калыкез гажаны но улонэз яратыны дышетӥз. Огназ пиоссэ пыд йылазы вуттыны, оло,  секытгес но луиз, дыр, висьылыны кутскиз. Гужем каникулъёсы эшъёсыным яратӥськом вал пӧртэм колхоз ужъёсын ужаны. Соин ӵошен сюлме юн пыӵаса кылиз одӥгез учыр. Амбар дорын ужаку, Надя апай: «Мон нонтыса лыкто али», — шуиз. Одӥгез кышномурт: «Ма, пичидэ кытчы кельтӥд?» — шуыса юаз. «Кӧкые понӥсько но анайзы каллен ветта», — шуиз Надя апай. Та кылъёсты мон соин гожтӥ, со дыре нуны ваён азьын 56 нунал декрет отпуск сётозы вал, нуны ваем бере но сомында ик. Озьы тӥни кышномуртлэн улонэз, капчи-а, секыт-а ачиз ик валэктэ, луоз. Надя апай туж улонэз яратӥсь но валась адями. Азьло дыре гуртамы ӵем вуылӥськомы вал, котьку но соос Лёгор агаен тыршо вал милемыз ческыт пӧрам сиёнъёсын куно карыны. Кыӵе шумпотыса, куд-ог дыръя ас дорам кадь кожаса пыралляй. Лёгор агай но вань гурт калыклы гажамон адями, соин ик но, дыр, калыкез уже ӧтьылыкуз нокин но «уг» шуыса ӧз вазьылы. Гожтӥд ке, трос луэ улонысь учыръёсты гожтыны, нош одӥгзэ гожтыны малпай. Со арын гужем куазь туж пӧсь луиз. Милемыз Лёгор агай Сырья бусые уйинлы люцерна люканы ӧтиз, ми валэн 3-4 уробо мынӥм кадь, Кыйнюк шуиськом вал, отӥ шонерак потыса тубим, Лёгор агай но милемын ӵош ветлӥз. Нуназе люцерналэн куарез пырдэ шуизы. Ми вуыку Сырья гуртысь калык ужа ни вал. Та одӥг пример возьматэ кадь Лёгор агайлэсь калыкез гажан сямзэ.

Улытозязы кык корка ужазы. Секыт дыръёссы но луылӥзы, дыр, ини. Берло куноякумы Лёгор агаен Надя апай шумпотыса веразы выль чебер мунчо ужамзэс, кудаз липет ултӥ гинэ выж дэра вылтӥ мыноно. Мунчо азязы ӝӧк вылын самовар, куд-ог дыръя татын ик чай юиськом, шуизы соос. Кенэнызы но туж тупаса уло, кензы Сырья гуртысь. Али кадь син азям, ужаса бертӥз но ӟечъяськиз возьдаськыса кадь гинэ, со ик возьматэ кадь адямилэсь капчи мылкыдзэ. Пизы но пальпотыса гинэ каньылэн вазиз, нимзэ вунэтӥ. Гожтӥд ке, трос луэ, ваньмыз но тодэ лыктэ. Мар вераме потэ: нырысь ик сӥзисько тӥледлы юн тазалык, корка пушкады тынӥсьлык, медаз кысы сюлмысьтыды ог-огдэс валан тылгизьы, асьтэлэн нылпиостылы, внукъёстылы шонер сюрестӥ вамыштыны дышетэмдылы. Гурт калык но юн тодэ но гажа тӥледыз, озьы ик азьланяз но мед луоз, ӵуказе нуналлы оскон мылкыдды юн мед луоз. Нылпиосты шумпотыса мед вуозы анай-атай вордэм юртэ. Ваньзэ умойзэ гинэ ке малпад, оло, зэмос шуд тазьы ик кылдэ, луоз.

Юн гажан мылкыдын Башкортостан музъемын улӥсь Мария Александрова