Көрәш сезонын Арборда башладык (фото)

Озын-озак каникулларыбыз тәмам. Ниһаять, барыбызның көтеп алынган мизгелләребезгә аяк бастык. Елдагы традициябезгә тугры калып, Арбор җирлегендә 23нче мәртәбә көрәш сезонын ачып җибәрергә насыйп булды. Шуңа "насыйп булды" дип әйтүем, ярышларга чакыру җибәрүгә , атказанган тренерыбыз Дамир Гобәйдуллин башка еллардагы кебек 30-40 кеше килсә, ярышларның киләчәге турында уйламый булмас дигән фикер әйткән иде. Аллага шөкер, сагынып көтеп алганнар булып чыкты көрәшебезне. Ярышларга 87 көрәшче килеп куймасынмы? Аннары балаларны бераз көрәш серләренә төшендерү максатыннан, физкультура укытучылары Кече Лызи, Урта Көшкәт мәктәпләреннән удмурт егетләрен җыеп алып килгәннәр иде. Хәтта көрәшче егетләребез күп булу сәбәпле, 3 үлчәү авырлыгында ярышларның беренче әйләнешен "олимпия" системасында уздырырга туры килде.

Гадәттәгечә, ярышлар тантаналы ачылудан башланып китте. Бер-бер артлы сүз алып, чыгыш ясаучылар балаларны яңа сезонга аяк басу белән котладылар, келәмнәрдә аларга уңышлар теләделәр. Ярышлар алдыннан гына районыбызда эш визиты белән Россиянең татар көрәше федерациясе рәисе Җәүдәт Миннәхмәтов булып киткән иде. Шушы вакытта ул район көрәш федерациясе рәисе, РСФСРның спорт остасы Фәрит Әхмәдиев белән очрашырга вакыт тапты, районыбызда татар көрәшенең бүгенге халәте белән кызыксынды. Үзенең бүләкләрен дә калдырды. Район көрәш федерациясе рәисе шул бүләкләрнед берсен август аенда 60 яшен тутырган район көрәш федерациясенең баш секретаре Нурзада Сәмигуллинга тапшырды. Моннан тыш, аның бүләкләренә яшь көрәшчеләребез Нормадан Эмиль Гарифуллин, Смәелдән Илназ Якуповлар да лаек булды. Рәхмәт, олы кунагыбыга. ел да баларыбызны сөендерп торучы"Арбор" җәмгятеяте җитәкчелегенә. Аларның тырышлыгы белән 33 көрәшчебез акчалата бүләкләр, дәрәҗәле медальләр белән кайтып киттеләр. Аллага шөкер, көрәшләребез дә бернинди травмасыз, матур гына узып китте. Җиңү яулаган балаларыбыз җиңүләренә куанса, җиңелгәннәренә җиңелү ачысы татырга туры килде. Нишлисең инде, шуның өчен ярышлар инде ул. Аннары ярышларның тагын бер яхшы ягы бар, тренерларыбызның ничек эшләвенә үзе бер нәтиҗә дә ул. "Бүгенге көндә тренировкага бер Смәел авылыннан гына 33 бала йөри"дип сөенә, тренерлары Альберт Миннеханов. Тырыш хезмәте дә күренеп тора. Әлеге ярышта да алар чепьялылардан гына калышып, икенче урынга лаек булдылар. Өченче урынга исә, яңгуллылар чыкты. Бөрбаш, Салавыч авылларыннан көрәшче егетләребезнең призлы урыннарга керүләре дә күңелләребезгә рәхәтлек бирде.

Ә инде чемпионнарыбызга килсәк, менә алар - Нияз Әскәров /Арбор-32 кг./, Кәрим Ногманов /Чепья/40 кг/, Илгизәр Галимуллин /Смәел-46 кг/, Руфил Хәбибуллин /Яңгул-55 кг/, Ислам Галимов /Арбор-60 кг/, Фәнис Кәбиров/Арбор-65 кг/, Илназ Минмуллин /Чепья-70 кг/, Илнар Муллахмәтов /Яңгул-75 кг/, Илсаф Рәфыйков /Яңгул-80 кг/, Диншат Гарифуллин /Куныр-90 кг/, Дилүс Сабиров /Салавыч-авыр үлчәүдә/.