Безнең урамда бәйрәм!

Балтач үзәгеннән ерак булмаган тар гына Каюм Насыйри урамына юка гына асфальт моннан егерме елдан артык элек түшәлгән иде, шуннан соң бер генә тапкыр да, сүз чынлыгы өчен дә, ремонт үткәрелмәде. Әле җитмәсә, элегрәк елларда су торбалары үткәргәндә, җир казып элемтә чыбыклары сузганда юклы-барлы асфальтка да зур зыян китерделәр, урамыбыз яңгырлы көннәрдә үтеп булмаслык чокыр-чакырга әверелде. Шулай да түздек, янәшәдәге төзек урамнарга кызыгып яшәдек. Аннары гел болай булмас инде дип, урам халкы исеменнән гариза белән район башкарма комитеты рәисе Рамил Шакировка мөрәҗәгать иттек. Ул бюджетта акча мәсьәләсенә бәйле рәвештә тиз генә эшләп булмаячагын нигезле итеп аңлатты һәм берәр елдан эшне планга кертеп, җәй көне сезгә дә асфальт булачак дип ышандырды.

Узган атналарда, көннәр ачылып киткәч, урамны чистартып-тигезләп, таш түши башладылар. Эшне төзекләндерү оешмасы җитәкчесе Рәшит Ильясов үз контроленә алды, һәм барлыгы бер атна эчендә аның ышанычлы осталары бөтен кеше канәгать булырлык сыйфатлы асфальт юл түшәп киттеләр.

Көндәлек бик мөһим бурычлар хәл итеп тә, безнең гозеребезгә игътибарлы булган, вәгъдәсендә торган, иң игелекле хезмәт оештырып, коллектив эшенең тизлеген генә түгел, сыйфатын да кайгырткан конкрет фикерле, төгәл һәм эшлекле җитәкчеләребезгә Балтач бистәсе урамнарының төзеклеге, матурлыгы өчен җан атып йөргән Илдар Габдрахмановка урам халкы исеменнән олы рәхмәтебезне җиткерәбез.

Фәридә ШАКИРОВА