Суы ялтырый, яры калтырый (фото)

Ильнур, 23 июль 2016 - 09:29

2416

Соңгы көннәрдә кичләрен Көеккә су коенырга йөри башладык әле. Авылга кергәннән матур-матур йортлар, алар янәшәсендәге аккошлар, чәчәкләр каршы ала һәркемне.

Авыл урамының бер өлешенә таш салынып, юл ремонтланды. ФАП төзелеп килә. Гомумән, авылның киләчәге барлыгын раслаучы факторлар көеклеләрне дә уратып узмый. Су коенырга бара торган җир дә бик уңайлы итеп эшләнгән. Балалар да мәш килә анда, өлкәнрәкләр дә күңел тынычлыгын судан тапкандай суның уртасына кереп, аркаларына ятып, ял итәләр. Читтән генә күзәткән кешегә кызык та, кызыгырлыкта монда.

Ләкин әлеге плотина янындагы куаклыклар арасында чүплек хасил булган. Ул ял итәргә килүчеләрне каршы алып, озатып кала. Көннән-көн чүбе дә арта кебек. Кемгә кирәк булды икән шушындый эш эшләү, үз артыңнан чүбеңне җыештырып тиешле урынга ташлап китү авыр микәнни? Шуны күреп күңел әрни.