10-тӥ пӧсьтолэзе Ципьяын гурласа Гырон быдтон ортчиз

Туэ но, котьку сямен, ёрос масштабен ортчем Гырон быдтон праздникез вылӥ уровенен ортчытӥзы. Сое радъяны оскемын вал Ципья зоналы.

Школаын, нылпи садын, культура юртын, гурт поселениын ужасьёс праздникез ортчытонлы мыло-кыдо но кулэезъя дасяськиллям: Гырон быдтон праздникын жингрес кырӟанъёс, огезлэсь огез тунсыко шудонъёс но вожвылъяськонъёс нокинэ мылкыдтэм ӧз кельтэ.

Котьку сямен люкаськем калыкез но куноосты ӟечкылаз Балтась ёрослэн главаез Рамиль Нутфуллин. Со вань люкаськем калыклы котьку тупаса, ог-огзэс валаса, эшлыко улыны мылкыд кариз. Рамиль Рашитович Таукарон гожтэтъёсын пусйиз Василий Петрович Никитинэз, педагог- ветеранэз; Евгения Петровна Михайловаез, Ципья Культура юртысь устолыкъя кивалтӥсез; Наталья Леонидовна Жуковаез, «Азьлане» газетысь отделлэсь редакторзэ; Ирина Григорьевна Чупановаез, Ципья школаысь педагог-организаторез; Леонид Дмитриевич Сапожниковез, Сырья клублэсь кивалтӥсьсэ. Праздникез сӥё-дано карыса усьтыны — флагез ӝутыны — оскемын вал «Труд» обществоысь механизаторлы Юрий Петрович Григорьевлы но «Дуслык» обществоысь скал кыскисьлы Анна Сергеевна Федотовалы (Рамиль Рашитович соосты но ӟечкылаз).

Ужрадэ пыриськиз Татарстанысь удмуртъёслэн НКА-зылэн тӧроез Андрей Герасимов. Со но, Балтась удмуртъёсты праздникен ӟечкыласа, шуныт кылъёсты вераз, куд-ог улосчиосмес — Покчи Лӧзяысь Галина Денисовна Петроваез но Сырьяысь Плотников Николай Ивановичез — Таукарон гожтэтъёсын но шумпоттӥз. Кыл сётэмын вал кемалась ӧвӧл Ципья черкын ужаны кутскем вӧсьчилы, отец Владимирлы но.

Гырон быдтон мылысь-кыдысь шутэтскыны, ӵыжы-выжыосын, матысь адямиосын пумиськыны луонлык сётӥз. Удмурт-а тон, ӟуч-а, бигер-а, пор-а — пӧртэмлыкез ӧвӧл. Эшъяськон мылкыд майданын гурлам пӧртэм тунсыко шудонъёсын но, вожвылъяськонъёсын но шӧдӥськиз. Шудонъёсын та нунал узыр вал: кытчы эн учкы, котькытын шудо-вожвылъясько, арессы шоры учкытэк. Праздникын горшок пыргытӥзы, возь вылтӥ куасэн, пуйыен бызьылӥзы, ю тысь но нуллӥзы, гозыен кыстаськизы, гынсапег куязы, пу вандӥзы… Нылпиос кор вылтӥ ветлӥзы; синъёссэс кышетэн думыса, арбери вандӥзы, курегпуз бичазы. Но тросэз калык парсьпи кутон шудонэз витиз, лэся. Нылпиос пӧлын парсьпиез кутыны шуд усиз Тагашурысь Конькин Тимурлы, нош бадӟымъёс пӧлын — Пор-Кутешысь Трофимовъёслэн семьязылы.

Ужрадэз Ципья зонаысь гуртъёс радъязы ке но, вань удмурт гуртъёс (удмуртэз гинэ но ӧвӧл) праздниклэн концерт программаяз пыриськизы — кин ке эктӥз, кин ке кырӟаз, кин ке мызганэн шудӥз. Празднике люкаськем калыкез шулдыртӥзы Ижкарысь вуэм куноос но. Тодмо удмурт кырӟасьёсмы — Алёна Тимерханова, Иван Котельников, Андрей Корнилов но пичи артист Егор Маштаков — праздниклы аспӧртэмлыко удмурт шӧм пыӵатӥзы. Со сяна, калыкез шулдыртӥзы Киров улосвылысь Вятской Полянаысь вуэм «Чипчирган» ансамбль, Улисьял гуртысь ӵыжы-выжы луись пор эшъёсмы но.

Чебер сямлы пӧрмыса, арлы быдэ Гырон быдтонын мызганчиослэн парадзы но ортче. Туэяз празднике но тямыс мызганчиос пыриськизы. Соос пӧлын котьку сямен одӥг нылкышно-мызганчи но луиз — Ципьяысь Евгения Михайлова.

Огъя вераса, ортчем Гырон быдтонлэн программаез узыр но пуштросъем луиз. Та сярысь асьме ёросысь вуэм куноос гинэ ӧвӧл, Киров улосысь, Удмуртиысь вуэм куноос но веразы.

фото: Ольга Пчельникова