Александр Валерьевич Антонов но «Борнакын» 2019-тӥ арысен

Агроном Раниль Ахмадуллин лыктэменымы валче Александр Валерьевичез туж ушъяса вераз. Туэ басьтэм выль техниказэс но — «К-742» тракторез но «Амазон» кизён комплексэз — солы оскиллям. «МТЗ-1221.3»-ен но азинлыко ужам механизатор, ӵапак соин выль техника но солы йӧтэм. Со сяна, механизатор «МТЗ-82» тракторен но ужа али.

Александр Валерьевич но «Борнакын» 2019-тӥ арысен. Со дырозь пӧртэм интыосын ужаса утем. Семьяеныз Турья гуртын уло бере, сопала-тапала ветлэмез потымтэен, «Борнаке» ужаны интыяське. Та сярысь воргорон уг жаля.

— Шумпотымон, обществоямы егитъёс трос ужало, гуртэ кылё. Ми но соослы быгатэммыя юрттӥськомы, соос но, кулэ луыку, кенеш сётыны быгато. Мон ачим опытэн механизатор ӧвӧл али, кӧня ке ар гинэ ужасько ук. Но туннэ нуналлы ужме кельшытӥсько, ваньмыз умой. Кивалтэт ужаммес адӟе бере, со туж умой, — вера шумпотыса механизатор, выль «К-742» тракторез пала вамыштыса.

Бен, азьло техниказэ выль трактореныз ӵошатоно ке, «МТЗ-1221» тракторез вуж вал ини, отын выляз кадь вань каньыллыкъёсыз но ӧй вал. Но, зэмзэ верано ке, Александр Валерьевич но, возёсысь мукет механизаторъёс но, котькуд техника сьӧры пуксьыса ужаны дась. Соос пальпотыса «Тӥяськем техникаез тупатомы, ветлӥсеныз ветломы» гинэ шуо.

Секыт но кылкутымон тулыс бусы ужъёс борды сыӵе мылкыдын басьтӥськем бере, туж умой ини…