Чиданмы ӧз тырмы дорамы бертытэк

Куддыръя ӵош мыныны тупаськомы вал. Люба визьмо нылпи, умой дышетскиз, чебер нылаш котьку ӝикыт, ӟеч дӥсяськиз. Улон-вылон сое вуттӥз Вукогуртэ, Фёдоровъёслы кен луиз. Егит ныл, шуг-секытлэсь кышкатэк, фермае ужаны пыриз, «Труд» колхозын пенсие потытозяз скал кыскиз. Солэн вань «Заслуженный работник Сельского хозяйства Татарстана» дано нимыз, тыршыса ужамез туж трос сӥё-дано Таукаронъёсын пусъемын.
Котьма ужлы быгатӥсь Пашкалэн но сюлмо, лад-лад Любалэн синмаськымонэсь куать нылпиоссы. Ваньзы ушъямонэсь, ӟеч мылкыдоесь, анай-атайзылы юрттӥськыса будӥзы. Пичиысен ужлы дышетыса, шонер куронъёс пуктыса нылпиоссэс будэтӥзы Фёдоровъёс. Косоно ӧй вал, асьсэос тодӥзы-валазы дорысь кыӵе ужез быдэстоно, ку мыноно фермае анайзылы юрттыны. Табере асьсэлэн семьяоссы вань, нылпиоссэс будэто, зӥбыт юртъёссэс быгатыса возё. Юрттэт курисьёслы та семьяысь мӧйыосыз но, егитъёсыз но, котьку юрттыны дась.
Анайлэн нуналэзлы сӥзьыса, нылпиосыз, анайзэс данъяса, Вукогурт клубын сиё-дано ужрад радъязы. Анаенызы данъяськыса, пушсы тырыса, синкыли пыр сокем шуныт кылъёс веразы Любалы нылпиосыз. Чузъяськизы кылбуръёс но кырӟанъёс. Соку залын пукись анайёслэн котькудзылэн Любалэн интыяз луэмзы потӥз, луоз, мон но умой мылкыдын туж вожъяськыса учки со шоры.
Любаен пумиськыку мылысь-кыдысь эшлыко вераськиськом. Дышетскон дырмес, ӵош дышетскем эшъёсмес тодамы вайиськом. Тани солэн Ӟаны школаын дышетскон дыръяз луэм тодэ ваёнъёсыз но одӥг учырез.
«Восьмилетней школае ветлӥ Ӟаны школае, эшъёсыным дышетским интернатын улыса. Ӵем дыръя гуртамы бертылӥмы, чиданмы ӧз тырмылы быдэс арня ӵоже бертытэк. Ӵукна ньыль часэн султыса, школае пыдын дыртӥмы, нокыӵе куазь шоры учкытэк, уроке бере кыльытэк вуоно вал. Велосипедзы луэм пиос куддыр велосипедазы пуктыса но нуллӥзы. Семьяын кык-куинь дышетскисьёс луэм бере, ваньзылы ик велосипед ӧз шедьы. Будӥсь пичиослы ӵемгес сиыны кулэ, соин столовойын гинэ сиськыса ӧз тырмылы, куддыр Балтачысь нянь но вайыса ӧз вуттылэ. Дышетӥсьмы яке кин ке одӥг нянь вайиз ке, син куспын сиыса быдтылӥм, интернатын ми трос кузя вал уго. Соин дорысь пӧрам сиёнлэсь сокем мӧзмылӥм, эшшо мынам анае магазинын ужаз, дорын котьку ческыт сиёнъёс луо вал.
Одӥг пол пиос лӧпкатӥзы школаысь пеганы. Куасъёсмес киосамы кутӥмы но (оло кулэ луозы) Кушкет гурт пала дыртӥмы. Та гурттӥ Турья фермае валэн фураж нулло вал, милемыз но дӧдьыязы пуктозы, дыр, малпамы. Эх ма, воз нуллӥсьёс асьсэос но, валлы секыт луэ шуыса, дӧдьы беразы пыдын мыно вылэм. Куасъёсмес ке но басьтэ шуыса сюлворимы. Туж жадеммы бере гинэ дӧдьыосазы интыяським ик. Гуртэ вуыса абдраса ыммес ик усьтӥмы: гурт пумын школалэн директорез Иван Васильевич сылэ! «Ӝегатскытэк дорады пыре, ӝогак сиське но школае берытскоды», — шуиз. Сокем жадьыса вуимы ке но, нош ик кузь сюрес вылэ потӥмы. Нылпиос кынмыса бырыны шедёзы шуыса сюлмаськем Ермаков И. В., нюлэстӥ Починка гурт пыр шонтэм Турьяе. Школае вуыса отысь но татысь кылӥськиз: «Ах, Михайлова! Эх, Михайлова!» Дышетӥсьёслэсь но эшъёслэсь возьдаськыса, классэ пырем бере парта улэ пегӟи, бадӟым йыруж лэсьтэм кадь потӥ. Ӵош дышетскем эшъёсын пумиськон дыръя, кема аръёс ортчем бере гинэ пиос янгышсэс тодытӥзы, зэмзэ веразы, малы соку нылъёсты пеганы ӝутказы, нош асьсэос ӧз пегӟе».
Вера Лобанова,
Вукогурт