Ципьяын Ымусьтонлы сӥзем концерт ортчиз

Ымусьтон — православной калыклэн одӥгез бадӟым праздникез. Со сӥземын Иисус Христослэн вордскем нуналэзлы. Вашкала дырысен котькуд шаерысь православной улонэн улӥсьёс та праздникез бадӟым карыса пусъё, оскись адямиос уйин черке ымусьтон службае мыно — вӧсясько, кулэмъёсты буре ваё, Инмарлы но Святойёслы ваньмыз понна тау каро.

Асьме ёросысьтымы черкъёсын но арлы быдэ Ымусьтон службаос ортчо, туэез ар но мукетъёсызлэсь ӧз висъяськы. Нош служба сяна, черкъёсын нылпиослэн тыршеменызы дасям ымусьтон концертъёс но ортчизы. Кылсярысь, Ципьяын. 

Арлы быдэ сямен Ципья гуртын воскресной школае ветлӥсь нылпиос, дышетӥсьёссылэн юрттэменызы, анай-атайёссэс, песянай-песятайёссэс но котькуд мылкыд карись прихожанъёсты чебер концерт программаен шумпотто. Туэ но, шонергес вераса 7-тӥ толшоре, нылпиос Ципьяысь Пресвятой Троицалэн черказ концерт возьматӥзы.

Пусйыны кулэ, Ципьяын та концертэз радъян ӟеч сямлы пӧрмиз ини. 2018-тӥ арысен Ципья черк бордын воскресной школа ужаны кутскиз, со дырысен та школаын ужасьёс концертэз арлы быдэ ортчытыны тыршо.

Туэ концерт ужрадэ пыриськем нылпиослэн лыдзы 14 вал (1-8 классъёсын дышетскись пиналъёс). Соос понна но ужрадэ пыриськем мукет нылпиос понна (соос нимысьтыз кылбуръёс дышетскыса вуизы) ческыт сиёнъёсын тырмытэм 100 пакет-кузьым дасямын вал. Та асьсэлэн черке ветлӥсь прихожанъёслэн юрттэт сётэменызы дасям пакетъёс. 

— Концертмы шулдыр пӧрмиз шуыса малпасько. Нылпиос кезьыт куазьлэсь но ӧз кышкалэ, репетициосты но ӧз кельтылэ, концертэ но дыраз вуыса учкисьёсты шумпоттӥзы. Мылкыдэз ӝутэ тани мар: азьло аръёсы нылпиос Выль ар праздниклы школае яке садике дышетскем кылбуръёсты верало ке вал, берло кӧня ке аръёсы ини нимысьтыз Ымусьтонлы сӥзем кылбуръёсты дышетско. Та понна анай-атайёслы тау шуыны кулэ. Жаляса вераны гинэ кулэ, Казане мыныны ӧм быгатэ шуыса — 7-тӥ толшоре республикамылэн шоркараз рождественской ёлка ортчытӥзы, ми отчы поселениысьтымы мобилизовать карем воргоронъёслэн нылпиосынызы мыныны кулэ вал. Билетъёсмы но вань вал ини. Но инкуазь условиосын сэрен автобуслы сюрес вылэ потыны ӧз лэзе, — шуиз ужрадэз радъясьёслэн одӥгез Ираида Жукова. — Но нылпиослэн мылкыдзы куашкамтэ вал, соос ваньзы ужрадысь пальпотыса кошкизы.

Ципья черкын али дыре вӧсьёсты ортчытӥсь протоиерей Сергий но люкаськем калыкез праздникен ӟечкылаз. Со вань нылпиослы, прихожанъёслы ӟечсэ сӥзиз, котьку огъя луыса тазьы ик праздникъёсты валче пумитаны мылкыд кариз. Вань нылпиослы отец Сергий кузьымъёсты но ачиз сётъяз.

Фото: Л. Эшмакова, О. Сидорова