Иванов Алексей Юрьевич — «Борнак» обществоысь егит ужасьёслэн одӥгез

— Казаньын лэсьтӥськисьлы дышетскыса, Кировын одӥг ар служить кари но, вордскем палъёсам улыны бертӥ. Анайме татчы огназ улыны кельтэме ӧз поты. Соин тани татчы пӧртэм ужъёсты быдэсъясь луыса ужаны интыяськи, — шуэ Алексей «Борнакын» ужаны кутскемез сярысь.

Умой тыршемысьтыз, ужаны быгатэмысьтыз, кӧня ке толэзьскын Алексеез руль сьӧры пукто. Нырысетӥ техникаез «МТЗ-80» трактор луэ, али нош егит механизатор «МТЗ-82» тракторен тырше. Трос вераськыны уг яраты ке но, ужзэ яратэмез сярысь пияш ватытэк вераз. Техникаен ветлон, бусы ужъёсы пыриськон солы матын луэ вылэм. 

— Али тракторен ужаны кутскемелы одӥг ар но луымтэ бере, ачим техникаез пыр-поч уг тодӥськы, но озьы ке но шуг-секытъёс уг кылдо. Малы ке шуоно обществоын бадӟым стажен но опытэн механизаторъёсмы трос, соос котьку кылын но, ужын но юрттыны дась. Асьме гуртысь ик воргоронъёс но, Карек-Сермаысь но, Бурнакысь но — нокин юрттыны пумит уг луы. Соиз ласянь нокыӵе шуг-секытъёс уг кылдо, — шуэ Алексей валче ужась воргоронъёсыз сярысь.