«Кенешлы» выль тӧро бырйизы

Ужрадэ пыриськизы Татарстанысь удмуртъёслэн НКА-зылэн тӧроез Андрей Сергеевич Герасимов, Балтась ёросысь исполнительной комитетлэн кивалтӥсезлэн воштӥсез Ильгам Гайнутдинов но «Кенеш» НКА-лэн ёзчиосыз.

Пукетлэн валтӥсез эскероно ужпумез луиз — ёросысь удмуртъёслэн национально-культурной огазеяськонзылы выль кивалтӥсез быръён. Огкылысь луыса, пумкылъян (решение) кутэмын вал: Балтась ёросысь «Кенеш» НКА-лэн выль тӧроез луиз Покчи Лӧзя шоръёзо школаысь удмурт кылъя но литературая дышетӥсь Ольга Мироновна Пчельникова.

Ольга Пчельникова вордске 1969-тӥ арын 8-тӥ куарусёнэ Балтась ёросысь Сырья гуртын. Гуртысьтызы покчиёзо но Ципьяысь шоръёзо школаосты йылпумъяса, Ижкарысь удмурт кун университетэ удмурт кылосбуръя факультетэ дышетскыны пыре. Отын вылӥ тодон-валан басьтэмез бере, Покчи Лӧзя шоръёзо школаын удмурт кылъя но литературая дышетӥсь луыса ужаны кутске. Тӥни со дырысен 29 ар ӵоже ини со дышетон удысын мыло-кыдо тырше, нылпиослы анай кыллы гажан пыӵатон понна сюлмаське. Пусйыны кулэ, 29 арлэсь 28 арзэ директорлэн воштӥсез луыса ужа. Ольга Мироновна — гажано дышетӥсь, адӟем карымон кышномурт. Солэн котьку но удмурт кылмы, калыкмылэн лулчеберетэз но, огъя вераса, удмуртлыкез утён но азинтон понна сюлмыз висиз. Соин но та выль удысаз, «Кенешен» кивалтон ужаз, азинсконъёс, выль малпанъёс но юн мылкыд сӥзиськом солы.

Та но люкаськонын ӝутэм мукет ужпумъёс сярысь лыдӟыны быгатоды «Азьлане» газетысь.

Фото: автор