«Клуб туж кулэ со котьку но»

Мон малпамъя, клуб – туж кулэ луымон. Азьло дырысен озьы луэм ук со. Асьмелэн анай-атайёсмы, песянай-песятайёсмы ӝытлы быдэ дыртӥллям клубе кино учкыны (бен, соку куд-ог юртын гинэ телевизор луэм). Али котькинлэн телевизорез вань ке но, клублэн кулэлыкез солэсь уг кулэсмы. Туж вите ук калык клубен ортчытъям пӧртэм праздникъёсты, концертъёсты. Егитъёсты веранэз но ӧвӧл – ӵемысь шутэтскон нуналъёсы гинэ городысь лыктэм студентъёс гуртазы бертыса клубе потыны ёрмыса пуко. Собере паймиськом, малы удмурт пиос асьме гуртъёсысь нылъёсты кышно уг пырто, бигер гуртъёсысь нылъёс доры ветло шуыса. Бигер гуртъёсын клубъёс умой, дыр…

Серекъян серекъянэн, но гуртъёсын клубъёслэн луымтэзы, егитъёс понна гинэ ӧвӧл, вань гурт калык понна но бадӟым проблема луэ вылэм. Монэным соглаш луиз Кисаль гуртысь Людмила Тихонова но. Тани мар со вераз:

- Малпаськонэз но ӧвӧл, клуб туж кулэ со котьку но, котькыӵе вакытэ но. Туала дыре егитъёс кытын шедем, отын ветло (Кисаль гуртысь егитъёс сярысь гинэ верам кылъёс ӧвӧл та – Н. Ж.). Гурт калык но кыӵе ке ужрадъя люкаськоно луиз ке, сельсоветэн огазе ураме люкаськиськом. Ужрадъёсты но клуб луымтэ бере трос ортчытыны уг луы. Выль ар дыръя радъяськом праздник, клубмы ӧвӧл ке но, - шуиз со.

Озьыен, та гуртын клублэн кулэ луэмез туж лэчыт шӧдиське. Гурт калык люкаськыса праздникъёсты урамын ортчытыны быгатэ ке но, соос понна клублэн луымтэез бадӟым проблема луэ…