Хезмәт

«Коррупция – со коррозия. Кызьы кортэз сыномон быдтэ, озьы ик коррупция куашкатэ кун аппаратэз но сие калык пӧллэсь визь юнлыксэ»

Котькуд  адямилэн  ӟеч  дуннеын улэмез потэ, кытын ваньмыз умой, нокин ог-огезлы уг вожъяськы, ог-огзэ гажаса но валаса улэ, «кие сётон-басьтон» кылэз тодытэк. Но, жаляса верано, туннэ нуналъёсы ӟеч дунне кырсен тырмемын.

Кытчы гинэ эн учкы, ваньмыз уксё, кузьым  понна  быдэстӥське. Али дыре уксёед луиз ке, котьма но карыны луэ: ЕГЭ-ез но 100 баллы сётыны, уже но интыяськыны, законлэсь но пегӟыны.

Туала дыре ӵукнаысен ӝытозь асьмеос кылӥськомы коррупция сярысь вераськонъёсты. Туннэ нуналлы та ужрад тужгес но  валтӥсь луэ. Кивалтӥсьёс  но  депутатъёс секыт югдурез тупатонэн герӟаськем катъёсты ӝог кутыны тыршо.  Таӵе «сюлэм шырпулы»  Татарстан Элькунлэн Азьмуртэз Рустам Минниханов но бадӟым саклык висъя.

Мар бен со сыӵе коррупция? Мынам малпамея, коррупция – со ку одӥг адями аслэсьтыз шуг-секытъёссэ уксё тырыса, кузьмаськыса быдэстэ, нош мукетыз со уксёен яке кузьымен  узырме. Кыллюкаме учкимы ке, «коррупция» латин кылысь вуэм кыл,  кивалтӥсьёс  пӧлын  кузьмаськон учыръёс, законэз тӥяса узырмыны  турттон. Мукет кылын вераса,  коррупция – со сётъяськон: «тон – мыным, мон – тыныд». Малпаськоно ке, кузьмаськон учыръёсын кин янгыш меда: сётӥсез - а, басьтӥсез- а? Кыкез ик, малы ке шуоно соос асьсэлэсь кулэяськонзэс быдэсто, соин сэрен мукетъёсызлы изъян ваё. Озьы ке но, малпасько,  калык пӧлын умой адямиос  вань на ай шуыса, кудъёсыз кузьым, уксё уг басьто, но соос туж ӧжыт.  Туала арын, куке быдэс дунне вылэ  пандемия вӧлмиз, коррупция аслэсьтыз  выжыоссэ эшшо но мур лэзиз. Чагыр экран пыр  но пӧртэм информация потэ. Эмъяськонниосын висисьёс трос луэмен, куд-ог врачъёс висисьёслэсь коньдон басьтыса  эмъяны интыяло. Эмъюртэ сюрыса, асьмеос ик эмчилы коньдон сётӥськом. Угось эмчиослэн кисыязы асьмелэн коньдонмы пыриз ке, шорамы мукет синмын учкозы но ӝоггес бурмытозы кадь потэ. Но озьы ӧвӧл ук со!!!  Бурмыса потон дыръя  но, тросэз адямиос кузьым сётыса пото. Таӵе югдур туала улонамы огшоры, нуналысь  нуналэ лэсьтӥськись  уж кадь йӧтэ. Калыкмы дышиз ни кузьымъёслы: мылысь-кыдысь соосты басьтыны но, нокыӵе кариськытэк сётыны но. Пиналэз нылпи садэ интыяны, «престижной» интые  дышетскыны пыртыны – та ужъёс капчиен лэсьтӥськозы, кисыяды коньдонды трос ке, но сое «кулэ» муртлы сётыны быгатӥды ке. Кисы пыдэстэм: кӧня понӥд, ваньмыз тэре.

Паймоно та улонын: макем мур выжыяськемын  коррупция?! Малы меда кузьым басьясьёс шоры полиция но, прокуратура но чиньы пыр учке? Та юанлы ответ но ӝог гинэ  шедьтыны уг луы…

Коррупциен нюръяськоно ӧвӧл шат? Кызьы тӥ малпаськиськоды? Мон малпасько, коррупциез быдтон вылысь  калыклы кужмо кариськоно, пумит мыноно.  Коррупциез басьтӥсь  муртъёс гинэ ӧвӧл, сётисьёс но кылдыто. Тросэз асьсэлэсь ужзэс быдэстон понна, нырысь ик конверт дасяло. Бен, озьы капчигес но, дыр…   Калыкен ӵош черодын сылӥд ке, ужед ар куспын но уз быдэсмы. Озьы ке но, котькудӥз уг дырты кисыысьтыз коньдонзэ поттыны. Мон малпасько, сыӵе адямиос шонер лэсьто. Эскеронъёслэн возьматэмзыя, куамын процент улосчиос ӧз выре,  уг выро, уз но выре «сётон-басьтон» ужъёсын. Соин но, ужез кутсконо ас бордысен. Таӵе ужпумен одно ик нюръяськоно.  Коньдонэд ӧвӧл ке, коррупционерлы берпуметӥ уксёдэ кисыяз эн донгы, ачид но уксёлы ёрмид ке но, огпол но эн басьты! Сыӵе учыре сюримы ке, асьмеос быгатӥськомы куриськонэн тупасьрадо ёзэсъёсы вазиськыны. Озьыен, «коньдон люкасьёс» но, «коньдон сётӥсьёс» но уголовной уж улэ шедё. Эшшо ке выль катъя, табере ужсётӥсь мурт ачиз ивортыны кулэ, солы кузьым сётыны туртто ке. Но улонын озьы луоз шат?

Калык шуэ: «Вань уксёез ужаса уд быдты!» Бен, ваньмызлы коньдон кулэ, туннэ  нуналэ сотэк улыны уг луы. Ӵем пумиськиськомы сыӵе учырен: трос коньдон ужан понна, адями ужаз «улыны» кулэ. Нош капчиен коньдон поттон понна яке лушкаськоно, яке асэстоно. Озьыен, вань на улонамы ма сярысь малпаськыны.

Сётон-басьтон ужпумез Библия но, Коран но умойтэмен яке сьӧлыкен лыдъяло. «Кузьымъёс эн басья, угось кузьым адӟисез но синтэм каре». «Эн асэсты  муртлэсь ваньбурзэ, валаса вылысь но судьяосыз эн «басьты».

Тросэз кивалтӥсьёс сокем сётон-басьтонлы дышизы ни – улонысь номыр воштэмзы уг ни пот.

Кемалась ӧвӧл анекдот лыдӟи: «Тушмондэ вормыны уд быгатӥськы ке, луы солы кивалтӥсь!» Адӟиське улонын коррупциен нюръяськонын та принципъя ужало тросэз чиновникъёс. Зэмзэ но валантэм. Но туж шонер! Взятка басьто адямиос, кудъёсыз Родиналы присяга сётӥзы, кудъёсыз мукетъёссэ умоезлы дышето! Ма луиз асьмемын?! Малы ваньмыз гынмемын?! Кытчы пыризы адямилык но сьӧлыклэсь кышкан?! Кытчы асьмеос гылӟиськом!

Россия, мусо шаере, сайка, султы пыд йылад! Шат верамед уг луы вань элькунлы: «Коррупция, дугды! Эн люкеты гадь тыр шокаса улыны, эн сисьты улонмес!»

Оскем потэ, кема ик дыр ортчытэк, коррупция быроз. Нош али со вань бере, ми, егитъёс, соин пумозяз нюръяськыны кулэ. Соин но мон школаме йылпумъяса, вылӥ дышетскон юртын тодон-валан басьтыса,  коррупцилы пумит султо!

Анастасия Артемьева,

Покчи Лӧзя шоръёзо школаысь 11-тӥ классын дышетскись

Фото: https://pixabay.com/ru/

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: