Николай Никифоровлэн «Азьлане» газетын печатласькем куд-ог кылбуръёсыз

Тон куинь кылэз шат тодӥськод?

Кыӵе умой! Вожъяськисько!

Секыт-а вал дышетскыны?

Кудзэ тужгес но гажаськод?»

«Эше, малы бен юаськод,

Куиньзэ но сюлмысь гажасько!»

«Анай!» — вази мон удмурт кылын,

Бигер гуртын вордӥськемын,

Ӟуч калыкен ӵош будэмын.

Дунне коркан

Дунне коркан,

Жин! Жингыра кырӟан.

Бадӟым юртын,

Шудо нуны сюан.

Шаерамы тулыс —

Арлэн мусо нылыз.

Кузёяське гуртын,

Гома вож-вож тылыз.

Лу тон, мусо нылаш,

Чупрес,

Ужлы — ӝабрес.

Шудо-буро но

Крезьгуро!

Тулыс тӧл

Йӧӟектэм лымыез чупалля шуныт тӧл,

Оштолэзь маялля кызьпулэсь мугорзэ.

Тулыс тӧл умъёссэ чик ук кӧл,

Чагыртэ со пурысь инбамез.

Бугырес пилемъёс лымыос кадь гылӟо,

Шунаса кадь сылмо инвисэ.

Инбамын пальыша зарниям ӵуж колӟо,

Вожектӥсь узьымлы со кузьма шунытсэ.

Ыр тӧлэд ни вуттэ тюрагай куараез.

Шуныт зор кадь сабыр жильыртэ.

Кызьпуэ биниське со бусӥр вож куарен,

Та дыре вань улос серектэ.

Гажасько мон тонэ, витисько, оштолэзь.

Сюлэмам осконлык кузьмаськод.

Сабырскем мылкыды, шат туннэ сэзь толэс?

Тӧл сьӧры кадь кельыт ворттӥсько.

Тулыс зор

Эктыса нош ортчиз гуртэтӥ тулыс зор,

Чупалляз куаръёсты, вешалляз сяськаез.

Бурдоос кырӟало азьвыллэсь, оло, зол,

Вуюись выж вылтӥ келяло ни зорез.

Та тулыс шуныт зор осконлык кузьмаса,

Котыръя шаермес, вож тылъёс ӝуатъя.

Гудыри чабемъя, ширъянэз эктыса,

Со сӥзьыл янгышсэ кадь али тупатъя.

Николай Никифоров

(6 оштолэзь, 1991 ар,38-тӥ номер)

Сюлэм

Сюлэмез, шуо, — ужась,

Ма талы-о паймонэз?

Уй нунал весь туккетэ,

Мугорлы езтыл сётэ.

Дунъяло, сое — чидась!

Вормылэ шуг-секытэз.

Кайгуэз кеся — вуштэ,

Вуко кӧ кадь пыргытэ.

Со сярысь, шуо, — кырӟа,

Калыкед усто пусъем.

Шуныт кыл солы марӟан,

Жадемлы валес выллем.

Верало на: туж, пе, сэзь.

Зэмлыклы со нюръяське.

Урод кыл пушказ уз лэзь,

Ӵушъял сямен пештырске.

Жалясько сюлэмъёсты,

Улэмъя, дыр, вуштӥсько.          

Бен, луэ, шуо, куддыр,

Яратыку пилисько.

Гужем зор

Кыӵе витизы зорез!

Еж пужым но вож узьым.

Шат инмар кылӥз вӧсьсэз?

Шуныт зор ыстэм кузьым.

Лек ужпи гырдалляса,

Ворттылэ инмын кельыт.

Тыл сюло воринъяса,

Пилемез улля сэрыт.

«Уть, зорлэн кыӵе кужым!»

Луд данъя ни куараен.

Тэль дурын гома пужым,

...Ӵашъемын гудыриен.

Тӧлӟисьтэм сяська

Егит дыр сяська тӧлӟиз ни,

Ма дыре-о ворекъяз?

Йырсие но гӧртэмын ни,

Та уе шат лымыяз?

Сяськаё гужем со вал-а?

Емышо сӥзьыл-а вал?

Веттан гур сямен жинграз но,

Ӝыт шунды кадь питыраз.

Малпасько егит дырме но,

Льӧль шунды киям лэзьске.

Ӟырт кезьыт толалтэе но,

Вӧзам тӧлӟисьтэм сяська.

Эшлык

Лудын сяськая ни кӧжы,

Мыня тӧдьы -горд сяськаен.

Эшсэ ыштыса шат куажы,

Пӧлаз кесяське ӝож гурен?

Озьы, улонын кылдэмын:

Лулдэ кадь, эштэ утёно!

Сяська но пиштоз возьёсын,

Эштэк, та дыре мӧзмоно.

Куке кылзӥсько куажыез.

Вирсэр но тыл ез кадь ӟырда.

Котьку дунъясько эшлыкез,

Эшен, кезьыт йӧ но бырда.

(29 инвожо, 1991 ар, 73-тӥ номер).

Эн кышка бурдолэсь

Ӝужыт вож кызлэн ӟечырась вай вылаз,

Кырныж вучыртэ кӧттыро куараен.

Анай дыртыса кироса ни гадяз:

«Кинлы вазиське со кайгу иворен?»

Малы кышкаськод, анае, кырныжлэсь?

Бурдо шумпотэм шундыё нуналлы.

Оло, со озьы куриське Инмарлэсь

Шудо, кузь гумыр сӥзьыны асьмелы?

Ӧвӧл сьӧлыкез та чиль сьӧд бурдолэн,

Сюлэм кырӟанзэ со усьтэ та гурен.

Витён

Пӧйшур сямен ымзэ усьтӥз,

Чим сьӧд пеймыт, кышкыт уйшор.

Чик курдатэк азям султӥз,

Тани ӝогак вылам урдскоз,

Шӧдо солэсь лэчыт пиньзэ.

Шат черетском? Кин ке кылоз...

Сётоз мыным юрттэт кизэ.

Пыдъёс оло думылэмын?

Кужым ӧвӧл вамыштыны.

Йӧгу омыр кузё гадьын,

Сюлэм уг быгат шунтыны.

Инме кенжиз сюрло толэзь,

Уйшор-пӧйшур ӝогак ватскиз.

Вамышъямзэ адӟи ныллэсь, —

Сӧсыр сюлэм но буйгатскиз.

Меӵ ярдуртӥ ортче улон сюрес...

Меӵ ярдуртӥ ортче улон сюрес,

Пыдул изэд сямен тань питырско.

Ӟыгыртыса басьтоз шурлэн ӧрез.

Вуберганын лекос позыръясько.

Катьтэммытозь жугоз монэ тулкым,

Но синъёсы утчалозы куро.

Гадьме кынтоз кулон ымысь салкым,

Инмарелэсь лушкем юрттэт куро.

Малы шукрес таӵе тон улонэ?

Вужер сямен сьӧрам ветлэ эзель.

Котьку эш вал зэмос эшъяськонэн,

Юрттэтсылэн быдӟалазы — чельы!

Со юрттэтлы пумтэм шумпотӥсько,

Сютэм пуны, куштэм лылы сямен,

Вань эшъёсме визь пуж пыр поттӥсько,

Табань пыжон чабей пызен музэн.

Мед кылёзы, сюэз пӧлысь — дасэз.

Вуысь мӧзмон куро луоз киям.

Меӵ ярдурысь кӧчоз улон сюрес,

Ӟечлы оскон юн пыӵалоз гадям.

(9 куартолэзь, 1992 ар, 39-тӥ номер).

Нылпиослы сӥзем кылбуръёсыз

Тамаша

Паймымон та учыр. Тамаша!

Ас гуртаз йыромиз Наташа.

Шудыса шат кошкиз кыдёке?

Табере ас понназ утчаське.

Выль корка пуктӥзы кылем ар,

Бакчаяз кызьпуын шырчик кар.

Тодмасал асьсэлэсь пунызэс,

Ма кытын-о калге Лусьтроез?

Урамтӥ вамышъя кышкаса,

Бӧрдыны чик уг дырт Наташа.

Со чакла выль ӝутэм коркаез,

Бакчаысь юг тӧдьы кызьпуэз.

Гуртазы трос вылез коркаос.

Лыдъянтэм шильыртӥсь кызьпуос.

Соослэн кадь котькуд укноын.

Чебересь сяськаос мерттэмын.

Уть таяз укноысь кышномурт,

Ма сыӵе-о меда дауртэ?

Нылашез ӧтьыса пальыша,

Серектӥз пумитаз Наташа.

Укнотӥ сак учке анаез,

Ӝог потӥз пумитаз пуныез.

Сю вамыш палэнскиз азбарысь,

Йыромиз ни кожаз вал нырысь.

Тау кариз

Горд тусэз уг ярат ош,

Ӟеч тодэ сое Олёш,

Вылаз ӧвӧл горд дӥсез...

Нош гома ук йырсиез!

Нянь туриж кияз кутӥз,

Капказэ вӧлак усьтӥз.

Кышканэз ук вормоно,

Кутьыысь пумитано.

Саламзэ ошпи басьтӥз,

Пилэсь йырзэ нюлыштӥз.

Оло, озьы тау кариз?

Горд куаръёс

— Лена, малы куаръёстэ,

Ваньзэ гордэн буяськод?

Нылаш мусо пальпотэ:

— Куаръёсты кисьматӥсько.

Ыжпи вож куарме сиёз,

Пиньёсыз ук долкалоз?!

Мултэс куар

— Ма дауртӥд, кечпие?

Кытӥ пырад бакчае?

— Эн тышкаськы, вис шедьтӥ,

Лушкемен пырай отӥ.

«Кубиста дӥсь сю полэс», —

Кылэме вань верамдэс.

Лыдъяно кари куарзэ,

Сии... одӥг мултэссэ.

Тыршись ӵӧж

Убое кизи кӧжы,

Ӟеч лэзиз будос выжы.

Горд-тӧдьыё сяськаез,

Дыр ортчемъя пуртэсаз.

Уж борды ӝог кутсконо,

Арано но кутсано.

Эшъёсме ӧтё ӝоген,

Шулдыргес луоз дэмен.

Эх, укыргес дыртӥськем,

Бакча ыбес пась кылем.

Ӵӧж пырем,

Сюлмысь тыршем:

Кӧжыме усто арам,

Ю тысьсэ ӟечос кутсам.

(27 апрель, 1991  ар, 48-тӥ номер).

Чорыгасьёс

Бертӥськом чорыгамысь,

Куспамы вераськыса,

Пумитэ лыкто эшъёс,

Юанэн вазё соос:

— Кытын кутэм чорыгды,

Оло, чик уг зыгаты?

— Чорыгез ми жалямы,

Берен вуэ лэзимы...

Милемыз мыскыл каро

Ваньзы огымысь горо.

Верано ке нош зэмзэ,

Чик ӧвӧл ук серемез!

Лёшалэн ышиз венез,

Мон чигтӥ визнан ныдэз.

Сашалэн но вань мугез —

Дораз вунэм нумырез...

(26 пӧсьтолэзь, 1997 ар, 57-тӥ номер)