Семык, Гуртлэн нуналэз, Берёзка…

Нырысь ик, кызьы тодӥськом, туэ 11-12 инвожое православие осконэн улӥсьёслэн Семык праздниксы тупа. Озьы ик та нуналъёсы гуртъёсын но Балтась каргуртын Сабантуйёс ортчозы.Чебер сямлы пӧрме ини Семык шумотэ удмурт гуртъёсын Гуртлэсь нуналзэ пусъён но. Кылсярысь, туэ 11 инвожое нырысетӥзэ сыӵе шулдыръяськон ортчоз Сырья гуртын. Кутскоз 17.00 часэн. Праздникез Удмуртиысь куноос («Вить Сергейёс») шулдыртозы шуыса витиське. Озьы ик 11 инвожое (18.00 часэн) таӵе шулдыръяськон радъяны малпаллям Карек-Серма гуртын улӥсьёс но. Вераны кулэ, та соослэн нырысетӥ опытсы ӧвӧл, кӧня ке ар талэсь азьло соос Гуртлэсь нуналзэ ортчытӥзы вал ини. Туэ Карек-Серма гуртлэсь праздниксэ, тунсыко вожвылъяськонъёс но шудонъёс, ческыт ӝӧк но шулдыр крезьгуръёс сяна, Удмуртиысь вуэм кунооос — Алёна Тимерханова, Иван Котельников, Андрей Корнилов но Ури-бери Орина — чебертозы. 11 инвожое ик 18.00 часэн Покчи Лӧзя гуртын но сяме пырем «Берёзка» праздник ортчытыны малпало. Озьыен, шутэтскон нуналъёс шулдыр ортчыны кулэ.