Улын Ушмаысь ныл «Чеберина — 2021» луиз

Агрыз ёросын ортчем республиканской Гырон быдтонэз Алина Калинина кема уз вунэты али.

Малы ке шуоно со, нырысетӥзэ «Чеберина» конкурсэ пыриськыса, нырысетӥ инты басьтыны быгатӥз. Кин солы та конкурсэ пыриськыны ӵектӥз, кин солы юрттӥз — та сярысь Алинаен вакчияк интервьюез лыдӟыса тодыны быгатоды.

— Алина, тонэ школаын дышетскыкуд ик тодӥсьёс трос вал ини, газетэ но гожъяммы вань — удмурт кылъя но литературая олимпиадаосын ёрос, республика этапъёсын вормисе потылӥд. Нош «Чеберина» конкурсэ кин тыныд пыриськыны ӵектӥз?

— Конкурс сярысь мыным Покчи Лӧзя Культура юртысь устолыкъя кивалтӥсь Галина Денисовна Петрова вераз. Со ик мыным асме утьыны ӵектӥз. Мон ӧжыт малпаськи но соглаш луи. Сценаез мон яратӥсько, соин асме утьыны малпай.

— Тон та конкурсэ нырысетӥзэ пыриськид шуыса тодӥсько. Маиз тыныд тужгес секыт йӧтӥз?

— Тужгес секыт вал сцена вылэ потыны, мукет сямен вераса, учкисьёс-кылзӥсьёс азьын вераськыны, эктыны. Школаын дышетскыкум, ӵемысь сценаын выступать кари, нош вылӥ дышетскон юртэ пыреме дырысен сценаын выступать кареме ӧй вал ини.

— Котькуд конкурс пыр-поч дасяськемез кулэ каре. Тросаз учыре юрттӥсьёстэк но уг луы. Тыныд но та ужрадэ дасяськыны юрттӥсьёс луизы, дыр?

— Озьы. Кыӵе гинэ конкурсэ эн дасяськы, юрттӥсьёстэк уг луы. Гырон быдтонозь куинь нуналэз быдэсак конкурслы дасяськонэн ортчизы. Со дырозь вераны кыл, визитка дасяй. Галина Денисовна ваньмыз ласянь юрттӥз, кенеш сётӥз, озьы ик юрттӥз Наталия Львовна Антонова. Пусъеме потэ аслэсьтым юлтошме Лиана Галиахметоваез но. Со визиткаме дасяны юрттӥз. Та муртъёслы бадӟым тау шуэме потэ. Ӵошен дасяськыса гинэ, ог-огедлы юрттыса гинэ вормонэ вутскыны луэ.

— Секыт вал-а ваньзэсты нылъёсты вормыны но нырысетӥ интые потыны?

— Зэмзэ верано ке, вормон туж капчиен ӧз сётскы. Ваньзы нылъёс (огъя ми вить ӵошен луимы) быгатӥсесь, устоесь вал. Асьсэос кырӟало, асьсэос экто, асьсэос ик крезьгуро инструментъёсын но шудо. Мынам туж сценае потэме потӥз, соин ик вормиськем, дыр. Мон зэмзэ но конкурсэ пыриськемелы, сцена вылэ потэмелы шумпотӥсько, мыным туж кельшиз.   

— «Чеберинае» яке со выллем конкурсэ нош ик пыриськыны ӵектӥзы ке, пыриськод-а?

— Кызьы мон верай ини, ужрад мыным туж кельшиз. Соин нош ик та выллем ужрадэ пыриськыны луонлык кылдӥз ке, пырисько шуыса малпасько. Бадӟым тау ваньзылы, кин мыным юрттӥз, кин мыным оскиз. Соослэн юрттэменызы но оскеменызы мон вормыны быгатӥ.

— Алина, конкурсын вормеменыд сюлмысен ӟечкыласькомы! Котьку но таӵе ик чебер, визьмо но ас кылдэ, ас калыктэ гажась нылаш луы.