Ушъяськымон аспалмы

Дышетон удысын ужасьёслэн йӧскалык дышетонлы сӥзем республиканской семинар-кенешонзы тунсыко но пайдаё ортчиз. Ӝыны нунал ӵоже кыстӥськем ужрадын малпаськытӥсь дыръёсыз но вань вал, шумпоттытӥсь дыръёсыз но луизы. Но самой шумпотымонэз луиз, дыр, семинарлэн ӟечкылан люкетэз. Сцена вылэ тубем аспалъёсмы пӧлын Покчи Лӧзя школаысь удмурт кылъя но литературая дышетӥсь Наталия Антонова но луиз: ТР-ысь дышетонъя но наукая министр Ильсур Хадиуллин сое «Дышетон удысысь вормонъёсыз понна» гадьпусэн пусйиз.

Наталия Львовнаез ёросамы но, солэн палэназ но тодӥсьёс трос. Со Балтась ёросысь удмурт кылъя но литературая дышетӥсьёслэн методической огазеяськонзылэн кивалтӥсьсы, НКА Кенешлэн кивалтӥсезлэн юрттӥсез но луэ. Таӵе вылӥ вормонэ вуэмез сярысь со тани мар вера:

— Гадьпус басьтонлэн инъетэз, мазэ веранэз, кыдёкысен потэ ини. Ужаны кутскем бордысен луэ шуи ке но, уг янгыша, дыр. Нырысетӥен, удмуртлыкез пыӵатон бордын Ольга Мироновна Пчельниковалэн бадӟым инъетэз. Анай кылъя дышетӥсез яратӥд ке, предметсэ но яратӥськод, дыр. Озьы тупаз, Ольга Мироновналэн но, мынам но вордскем нуналъёсмы одӥг нуналэ — 8-тӥ сентябре. Со вордскиз 1969-тӥ арын, нош мон — 1979-тӥ арын. Та лыдпусъёс но огшоры ӧвӧл, дыр?! Вылӥысен ик мар ке милемды огазея кадь… Ми, дышетскисьёс, Ольга Мироновналэсь урокъёссэ туж яратӥськомы вал. Со школаямы удмурт кылэз дышетонъя нырысетӥез вылӥ образованиен специалист луыса вуиз, соин мон но школаын дышетскыку ик малпаськисько вал, 11-тӥ классме йылпумъяса, одно ик УдГУ-э дышетскыны пыро шуыса. Озьы, 11-тӥ классэз йылпумъяме бере, аслым кыл сётӥ, мон УдГУ-ын дышетскыны быгато шуыса. Малы ке шуоно со малпан мынам сюлмам пыӵамын вал ини. Дышетскыны пыри заочно. Балтась районын кыӵе гинэ школаосын ӧй дышеты: Турьяын но, Ярак-Чурмаын но, одӥг дыре Кукмор ёросысь Лельвиж школаын но ужай. Но берлогес аслам школаям ужаны бертӥ. Бадӟым тау шуэме потэ нылпиослы, анай-атайёслы, дышетӥсьёслы, кивалтэтлы, огъя вераса, ваньзылы, кин та дырозь монэным ӵош вамышъяз, кин пыкет луиз секыт дыръёсы. Валтӥсез — ми нылпиосын ужаськомы, нылпиос но анай-атайёс милемлы оско. Соин бадӟым таукарон кылъёсты вераме потэ удмурт анай-атайёслы но. Соос милемыз ӧз куштэ, ӧз кельтэ. Милемлы оско, нылпиоссылы шонер сюрес возьмато. Оскисько, азьпалан но ӵошен азинлыко ужаломы шуыса. Анай-атае сярысь но вераме потэ: соос но быгатэмзыя мыным улонам шонер сюрес бырйыны юрттӥзы, котьку поддерживать каризы. Нялтас вераса, анай-атай колхозын ужазы ке но, «Кенеш» журналэз, «Азьлане» газетэз ноку басьтэмысь ӧз дугдэ. Али но, соосты сяна, «Ӟечбур» газетэз, «Вордскем кыл», «Кизили» журналъёсты басьтӥськомы. Анае удмуртлык понна сюлмаськись адями луэ. «Азьлане» газетэз гурысь пӧсь пирогез сямен возьма. Йылпумъяса, тани мае вераме потэ:  вормонэ матысьёсылэн, нылпиослэн, анай-атайёслэн но коллективелэн юрттэменызы вутски. Ваньзылы бадӟым тау!

Наталия Львовнаез сюлмысен ӟечкыласькомы но азьпалан эшшо но бадӟымгес вормонъёсы вутскыны сӥзиськомы. 

Фото: Наталия Антонова.