Ужпуммы — эшшо но вылӥ вормонъёсы вутскон

Вукогуртысь ферма «Труд» обществолэн валтӥсь пудо вордон комплексэз луэ. Татын нырысь ик территориысь радлык, пудо гидъёсын каньыллыкъёс синме йӧтӥзы. Кивалтӥсь звенолэн ас ужзэ сюлмысь быдэстэмез, коллективлэн эшлыко луэмез но синмаськытӥз.

Ми лыктыку, пудо утисьёс, ӵук ужъёссэс йылпумъяса, доразы кошкемын вал.

— Ужан киосын шонер пайдаяськон понна ми дорын уж сменаен радъямтэ. Ӵукна ужъёсты йылпумъяса, шутэтскыны дугдыло. Кӧня ке ортчыса, нош ик ужан часъёссы кутско, — часэз шоры учкыса вераз ини тямыс ар фермаен кивалтӥсь Олег Николаевич Андреев.

9.30 час ӵукна. Ӵук шутэтсконзы бере нырысетӥосын луыса скал кыскисьёс лыкто вылэм. Соосын ӵош гидъёсы вамыштӥськом. Апайёслэсь лыктэмзэс витьыса гинэ выллем, пудоос черекъяны кутско. Кардае потон дырзы вуэмын вылэм.

— Ми дорын нылкышноос гинэ ӧвӧл, пиосмуртъёс но скал кыско. Тыршыса ужало, показательёссы умоесь, — вераськонэ итӥське «Труд» обществоысь зоотехник Василий Кумаев.

Ужзы уно луиз ке но, воргорон скал кыскисьёс, Юрий Щербаков но Антон Никитин, вераськыны дыр шедьтӥзы. Юрий трос ар скал кыске вылэм ини. Елена Никитинаен ӵош соос тупаса ужало. Нош Юрийлэн кузпалыз Любовь кунян ваён люкетын тырше. Со Алина Пармановаен одӥг группаын ужа.

Антон Никитин, школаез йылпумъяса, Ижевскын сиён пӧрасьлы дышетскем. Дышетсконзэ быдтыса, одӥг ар городын ужам. «Городысь кызьы гуртэ бертоно карид?» — юасько мон солэсь. «Сюлмы гуртэ кылем, соин бертӥ. Мон гуртэз яратӥсько», — валэктон сётэ со та юанлы. Гуртэ бертыса, Антон фермае ужаны лыктэ. Нырысь кунянъёслэн группаязы ужа, но тани сизьым арзэ ини скал кыске. Туннэ нуналэ пиосмуртлэн чакламез улсын 56 йыр скал. Суткалы кыскем йӧлэз 770 килограмм луэ. Светлана Фоминаен, Лариса Сидороваен, Римма Абдрафиковаен одӥг гидын ужась Антон Никитин, скал кыскисьёс куспын ортчись ӵошатсконъёсын но умоесь йылпумъянъёсы вутске шуыса веразы татын.

Скал кыскисьёслэн Антонида Никитиналэн, Ольга Яковлевалэн, Марина Раимовалэн, Тамара Сердюковалэн, кунян утись Галина Лобановалэн, Светлана Копаровалэн, Ольга Степановалэн, валы ветылъёслэн группаязы ужась Галина Захаровалэн ужамзы сярысь но умоесь кылъёс гинэ кылӥмы. Ялан ушъямонъёслэн радъёсазы ветлӥсь Галина Лобановаен но тани аслым тодматскыны тупаз. Соос  ӵош ужасеныз Светлана Копароваен ньыль толэзёзь 150 йыр кунянэз утё вылэм. Светлана та дырозь амбарын ужам. Сергей кузпалыз но колхозын тырше. Копаровъёс вить пи будэто. Станиславзы но Вадимзы Казаньын, Дмитрий, Кирилл но Данил пиоссы вӧзазы.

— Нуналмы ужаса ортче. Кыкнамы но колхозын бере, дорысь ужъёсын пиосмы но юртто ини, — шуэ Светлана.

Осеменаторез Римма Кузнецоваез нимысьтыз пусъеме потэ. Азьло со скал кыскем. Собере осеменатор, со дыре ик лаборант луыса но ужаны кутскем. Тыршись, пуктэм ужпуме вутскись, ас ужезлэн усточиез шуыса верало со сярысь. «Кунян тросгес вордске бере, та нырысь ик Риммалэн каньылэз тодытэк, тыршыса ужамез луэ шуыса верано», — валэктэ фермаен кивалтӥсь. Семья улонэз но адӟем карымон, выжы юртазы анай-атаенызы тупаса уло. Кӧня ке ар талэсь азьло «Арлэн нылкышноез» конкурсэ но пыриськем.

Ветфельдшер Владимир Никитин но ушъямонъёс пӧлысь. Егит ӧнерчи луыса но, оскон сётэ шуыса веразы со сярысь. Анаез Елена Никитина но коллективын ушъямон ужась. Азьмынӥсь скал кыскись 52 йыр скаллэсь огназ 1,200 тонна йӧл кыске. Нош Еленалэн кузпалыз Иван Чернов «МТЗ-82» тракторен ужа, пудолы сиён пыртылэ.

Вукогуртысь ферма «Труд» обществолэн валтӥсь пудо вордон комплексэз луэ. Татчы пырыку нырысь ик территориысь радлык, пудо гидъёсын каньыллыкъёс синме йӧтӥзы. Кивалтӥсь звенолэн ас ужзэ сюлмысь быдэстэмез, коллективлэн эшлыко луэмез но синмаськытӥз милемыз.

— Гидъёсын арлы быдэ ремонт ортче. Пудо понна но, пудо утисьёс понна но каньыллыкъёс кылдытӥсько. Улэмъя умойгес луиськом. Нош вуоноын, луэмез вылын дугдытэк, эшшо но вылӥ вормонъёсы вутскыны ужпум пуктӥськом, — шуиз люкиськыкумы фермаен кивалтӥсь Олег Андреев.

Озьы мед луоз. Ужан бервылъёс умоесь ке луизы, ужасьёслы но, кивалтӥсьёслы но шумпотон со.