Варклед-Бодьяын Гырон быдтон ортчиз

3-тӥ пӧсьтолэзе Агрыз ёросысь Варклед-Бодья гуртын Татарстанысь удмуртъёслэн яратоно шулдыръяськонзы — Гырон быдтон праздник — ортчиз.

Ужрадэ республикалэн пӧртэм сэрегъёсаз улӥсь калык люкаськиз. Со сяна, пыриськизы на Удмуртиысь, Киров но Перм улосвылъёсысь куноос но. Асьме ёросысь творческой коллективъёс но (Покчи Лӧзяысь «Вуюись» ансамбль, Шор Кушкетысь «Шулдыр ӝыт» ансамбль) республика масштабен ортчись празднике шумпотыса пыриськизы, Балтась ёрослэсь данзэ утизы.

— Праздник кельшиз. Агрыз ёросэ пырон дорын ик районзылэн главаез Азат Валеев ачиз бадӟым карыса, шуныт кылъёсын куноосты пумитаз, — шуэ ужрадэ пыриськем Алевтина Иванова, Шор Кушкет клублэн кивалтӥсез.

Зэм, праздникез кельшытӥзы ваньзы люкаськем куноос. Ческыт удмурт пыжиськемъёслэн зынэныз тырмем возь вылын чузъяськизы удмурт гуръёс, усточиос киужъёссэс вузазы. Сцена вылысен люкаськем калыклы умой мылкыд кузьмазы калык кырӟанъя но эктонъя «Айкай» удмурт кун театр, самодеятельной ансамбльёс. Шулдыр крезьгур улсын пӧртэм тунсыко шудонъёс, вожвылъяськонъёс радъяськизы. Кылсярысь, ужазы «Кужым мертан», «Шудон корка», «Усточи», «Кылбугор», «Куно азбар» но мукет площадкаос. Котькуд мылкыд карись адями со шудонъёсы пыриськыны быгатӥз. Та нуналэ ик Татарстанысь удмурт егитъёс пӧлысь Чеберинаез но Батырез бырйизы. Шумпотымон, Балтась ёросысь Алина Калинина «Чеберина-2021» луиз (конкурсэ пыриськемез сярысь Алиналэсь «Азьланелы» сётэм интервьюзэ улӥын лыдӟе — ред.), нош «Батыр-2021» нимен Агрыз ёросысь Роман Матвеев пусйиськиз.

— «Чеберина» конкурс понна туж сюлмаськи, малы ке шуоно Алинаез ачим дасяй. Дасяськем бере, мед вормысал шуыса малпай. Солы бадӟым осконмы вал. Юнме сюлмаськиськем вылэм: Алина возьытэ ӧз уськыты, нырысетӥ инты басьтӥз, — шуэ Покчи Лӧзя Культура юртысь устолыкъя кивалтӥсь Галина Петрова.

Алиналэн вормемез, зэмзэ но, асьме понна шумпотымон. Со сяна, туэез Гырон быдтон асьме понна нош одӥг шумпотон вайиз: аспалмес, Сырья клубен кивалтӥсез Леонид Сапожниковез, ТР-ысь Культурая министерстволэн данъян грамотаеныз пусйизы.

Ужрадэ, пӧртэм интыосысь вуэм ансамбльёс сяна, «БиГерд» форумысь егитъёс но пыриськизы. Огъя вераса, Гырон быдтон туэ но, арлы быдэ кадь ик, туж шулдыр ортчиз.

Агрыз ёрос, Гырон быдтонэз вылӥ уровеньын ортчытыса, эстафетаез Бавлы ёрослы сётӥз — вуоно арын яратоно удмурт праздник республика масштабен отын ортчоз.

Фото: Галина Петрова, Алевтина Иванова.