Вордскем гуртме яратыса…

Озьы кылдэм нылъёслы, вордскем юртысь тылобурдо сямен «лобӟыны» тупа. Кыдёкын ке но улӥсько, Семыке вож нуныен но, куд-ог дыръя мотоциклэн, тракторен, грузовой машинаен, вал уробоын, пыдын но бертэме вань. Нош таяз аре кин ке, ас вылаз сьӧлык басьтыса, Данька Нина апай Семыке уз берты шуыса верам. Ма кызьы уг берты пыдъёсы ветлон дыръя! Вукогурт — со мынам пичи гинэ мусо гуртэ, кытын улӥзы но ужазы ӵыжы-выжыосы, песянае но песятае, анае но атае. Гуртэ ке бертӥсько, сюлэм бурдъяське: татын ортчиз шудо пичи дыры, монэ яратӥсь анае но атае, ас улонзэс, кужымзэс сётыса, ужаса чебер гинэ юртъер лэсьтӥзы. Аслам пичи нунокъёсылы но гурт чеберез пыӵатыны тыршисько, табере ини «чипыен-куреген» бертылӥськом, яратоно Бадӟым агаймес но сьӧрамы ӧтиськом.

Кыӵе мусо потэ мыным пичи гинэ нюлэсмы, Куак возьёс, Ыжвӧсян нюкмы, кытын пичи дырья пудо возьмаса будӥмы. Соин, дыр, пинал дыръям ик таӵе кылбурен кырӟан гожтӥ.       Гуртмы сярысь кырӟан!

Кылъёсыз но крезьгурез

Нина Лобановалэн

Кин вуылӥз Вукогуртэ,

Уз вунэты та палъёсты!

Куакын уӵы уйбыт чирдэ,

Дёльмен шурмы дыртэ-бызе,

Дёльмен, Дёльмен пичи шурмы,

Шулдыр, чебер Вукогуртмы.

Тыршись калык улэ отын,

Будэ, выльме вордскем гуртмы.

Нылпи куара ульчаосын,

Гурт котырын нюлэсъёсмы.

Паськыт, вӧлмыт бусыосмы,

Шулдыр, чебер Вукогуртмы.

Учке али тӥ нылъёсмес,

Жингыр! каро куараоссы.

Нош учке тӥ, ой пиосмес,

Кыӵе капчи мылкыдъёссы!

Ум вунэтэ пинал дырмес,

Ум вунэтэ вордскем гуртмес!

Гуртысь пиналъёс «Дёльмен» кылэз уг тодо луоз, нош ми дырын улӥсь песянайёсмы гурт шортӥ кошкись шурез «Дёльмен» кылын нимало вал. Тӥледлы ке кельшиз, гажано гурт калыке, Вукогурт кырӟанэз гимн карыса кельтыны луоз.

Гуртлэн нуналыз сярысь корреспондент гожтэм вал ини, мынам но кӧня ке ас мылкыдме вераме потэ на. Гуртлэн нуналаз люкаськонэз кызь арлэсь но уно малпаса улӥ, ойдо ортчытом шуыса ӧтчаса но ветлӥ, Семык ӝытэ урамын  юмшан сямез но ыштонтэм вылысь огазеяськыса тыршим. Кылем арын тол вискын сценарий дасяса Вова пиеным ортчытыны малпамы, со мыным аппаратураен но юртто шуиз. Нош ӧз пӧрмы: кытысь ӧвӧл пандемия вуиз! Озьы ке но, Семык дыръя шай вылэ анай-атайёсмы доры бертытэк ӧм кыле. Нош таяз аре кылдэм вылэм Гурт нуналмес ортчытыны сюлмам улэм малпанъёсы быдэсмизы! Гуртамы будэм воргоронъёс, лыктэм кенъёс, будӥсь нылъёс но пиос, агайёс но апайёс, ӵужмуртъёс но ӵужкенакъёс, ӵужатайёс но ӵужанайёс, кудо-туклячиос, песянайёс но песятайёс, кенакъёс но кырсьыос — ваньзы ик клуб дорамы люкаськизы.

Чебер ӝыт, шуныт куазь, ӝӧк тыр сиён-юон, кырӟан но эктон, шудон но серекъян, пумиськон, ӵошатскон — ваньмыз вӧй вылтӥ кадь ортчиз, «нырысетӥ табань» пӧрмиз! Ачим гуртын улымтэ бере, вань кадь гурт калыкез нимтулэн уг тодӥськы, соин ик ваньдылы — праздникез дасясьёслы — бадӟым тау кылме вераме потэ. Тужгес ик гуртамы лыктэм кенъёслы, ас гурт карыса, яратыса, трос гинэ нылпиос будэтыса тазалыкен улэ. Та быдӟа ужрадэз оген ортчытыны уг луы, клуб ужась огназ гинэ ма кароз? Ӟуч кылын вераса, «один в поле не воин». Гурт калык огазеяськыса, мур малпаськыса, дэмен шулдыр ӝыт пӧрмиз.

Гуртамы котьку но трос вал ужась, тыршись, визьмо, кибашлы адямиос, кырӟась-эктӥсьёс, мызган шудӥсьёс. Шумпотыса, данъяськыса вераме потэ: гуртамы будӥсь нылпиос но туж мусоесь, чырткемесь, котькуд ласянь устолыксэс возьматыны быгатӥзы.

Туж данъяськи аслам песятаеным, со гуртамы ас юртаз нырысетӥ школа усьтэм, предколхоз луыса но ужам. Нош вӧзам пукись вить аресъем пичи нуноке шуэ: «А ведь Лобанов Иван Павлович на войне погиб…». Та бордысен валаны луэ: сценаысен верам кылъёс тӧлъя-буръя ӧз кошке, гуртлэсь историзэ туж тунсыко кылзыса пукимы.

Бадӟым агае — Данька Вова — гуртмес туж яратэ, дор палам вуыку, пе, Нунэгерысен ик сюлэмы йыгаськыны кутске. Гурт нунал праздниклы сӥзьыса, Киров карысь бабылес бадьпу ваем, сое мерттӥз ӵыпетмы доры.

Ортчиз-кошкиз Семыкед! Гуртлэн нуналаз чузъяськем кырӟанъёс но крезьгуръёс али но пель сьӧрам кылӥсько, сётэм кузьымдэс анайлэн кадь потыса кутӥсько! Гажано гуртоосы, азьпалан тӥледлы тазалык, гужем ужъёсты азьланё но пайдаё мед луозы, гуртмы нылпи куараен котьку но мед жингыртоз!

Нина Лобанова

Киров улос

Фото: Наталья Жукова