Хезмәт

Вукогурт

Вукогурт туж чебер интые пуксемын, инкуазез но паймымон. Гуртлэн шораз ик кык урамез люкыса жильтыр-жильтыр, чылкыт вуэн «кырӟаса» шур бызе. Гыркес нюк но Куак нюк узы-борыен узыр, нош гурт пумын пичи гинэ нюлэс — губияса ветлӥсьёслы шумпотон.

Синмаськымон вордскем гуртэ

Вордӥськем музъеме.

Вордӥськем шаере,

Туж мусо потӥськод,

Туж шулдыр адскиськод.

Ашальчи Оки (А.Г. Векшина)

Н.Байтеряковлэн чуръёсыз тодам усё: «Песятай-а шедьтэм та шулдыр интыез, песянай-а медам синмаськем». Зэм ӧвӧл шат? Толалтэ гурт шобырске выжыкылын выллем юг-юг тӧдьы, чылкыт лымыен. Бака гурезь «улӟе», нылпиос салазкиен нискыланы пото, ымныразы «шушы пуксе», синлысъёссы гӧрто, соку соос туж мусо адӟисько. Отын но татын куас беръёс чильпало лымыез. Нош дӧдьы бервылъёс чик уг адско ни.

Тулыс шунды яркыт тылсиоссэ кисьтэ, музъем сайка, шырчикъёс пузкарзэс эскеро, пузаны дасясько, ульчаосты шулдыртыса садъёс вожекто но сяськаясько, льӧмпу но сирень сяськаос мылкыдме ӝуто-бугырто. Гурт котырын, бусыосын кизем юос вожекто. Вазь ӵукна сюло куара вӧлме, гурт кутьы ыж вӧсян нюке, гуждоре потэ, кутьычиослы нюк вылысен нюк пыдсы безьылыны тупа, пудоез узьыме но лэзьыса дораз пегӟыны лэсёно ӧвӧл.

Гужем зарни шунды ӝужаку, возь вылын ӵукна чебер лысву чиля. Ю-няньёс ӝутско, тулкымъясько. Бусы вадьсын тюрагайёс ас крезьгурзэс кисьтыса, котырез шулдырто. Шур дурын уӵыос шумпотыса чирдо. Омыре вӧлске турлы турын-куарлэн, сяськаослэн ческыт зынзы. Вазь ӵукна отын но татын атасъёслэн чоръямзы чузъяське, куспазы «ӟечъясько». Кунянъёслэн но скалъёслэн гуждоре куриськыса бӧксэмзы котыр вӧлске. Гурт калык уж борды кутске. Дышетскон йылпумъяськем бере пиналъёс песятай-песянайёссы доры гуртэ вуо, соку гурт шудо нылпи куараен гурланы кутске, нылпи куараос уг чалмыло.

Сӥзьыл гурт сьӧрысь бусыосын, тӧл вешамъя, вуэм ю-нянь шепъёссэ мыкыръя, октон-калтон дыр вуэ шуыса верамез потэ кадь. Гурт зарни куаръёсын чиля, кызьпулэн ӵужектэм куаръёсыз, вальс эктэм кадь, бергаса-бергаса музъеме васькыло. Сӥзьыл куноя пужмеръёсын кыдатэм ӵыж-горд палэзен но шуэн. Кыр ӟазегъёс уллёен-уллёен кыстӥсько лымшор пала.

Гуртлэн чеберлыкез инкуазь бордын гинэ ӧвӧл, татын улӥсь гурт калыкен но. Арысь аре гурт бадӟыма, будэ, тып-тып юнэсь коркаос ӝутско. Гурт калык тыршись, ужась, вашкала йылол-сямъёсыз утись. Туж трос егит семьяос  анай-атайёсын, песяй-бабайёсын огазе, бадӟым хозяйство нуыса, туж тупаса уло. Кузь гумыро мӧйыос ужез рос-прос тодо, валало, кенеш сётыны быгато, внукъёссэс но мусо кылъёсын быгатыса утё, визьмоесь луыны дышето, соослэн шуныт сюлэмзы ваньзылы но тырме. Нылпиос пичиысен анай-атай урдсын ужез валаса будо. Вукогурт пиос, кузпал утчаса, кыдёкысь гуртъёсы шудыса ветлымтэзы, тодӥллям, кыӵе гуртысь кузпал ваёно — семья кылдытоно: Турьяысь, Починкаысь, Кутэшысь, Ӟаныысь но Кисальысь... «Та гуртъёсын анай-атайёс, азьланяз, бурдъяськем, дорысь кошкем бере улон сюрессы капчи мед луоз шуыса нылъёссэс мылысь-кыдысь ужез яратыса, лякыт но кибашлы, мӧйыосыз гажаса, нылпиосыз яратыса улыны дышетӥллям. Турлы гуртэн герӟаськем семьяос гуртамы трос. Кылсярысь, та вылӥ верамъёсме юнматэме потэ гуртысь кӧня ке семья вылын: Фёдоров Павеллэн семьяез юн герӟаськемын Турья гуртэн. Сюрес усьтэ Николайзы, со Шишкина Любаез «лушка», семья кылдытэ. Пашка агай со сьӧрысь уг кыльы, 1974-тӥ арын Михайлова Любаен кышнояське, соослэн нылзы, Ирина, Турья пиен, Филиппов Анатолиен улонзэ герӟа, нош пизы, Леонид, Турьяысь ик Алина Кокроваен юн семья кылдыто. Нош Яковлев Викторлэн семьяез юн герӟаськемын Кутэш, Турья, Починка но Кисаль гуртъёсын. Витя агай улонзэ Кутэшысь Романова Зояен герӟа. Соослэн нырысетӥ нылзы Людмила — Турья пиен, Макаров Владимирен, кыкетӥ нылзы, Екатерина, Починка пиен, Павлов Виталиен семья кылдыто, нош Алексей пизы Кисальысь Игнатьева Ольгаен кышнояське, юн семья кылдытэ. Таӵе примеръёс трос вераны луэ. Та возьматэ Вукогуртлэсь мукет гуртъёсын юн герӟаськемзэ, кусып воземзэ, ӵыжы-выжы луэмзэ.

Гуртын мӧйыос тэк уг пуко. Тани сопал урамысен Зоя, Нина, Марина апайёс ӵошен вамышто магазинэ, соос сьӧры Зоя Фёдоровна но каллен кыстӥське. Нянь ваён дыре уллапалась песянайёс но вуо магазинэ, огазе люкасько, ог-огзылы выль иворъёс вутто, нышырлы семьязылы выль пыжем нянь вуттыны тыршо. Магазинын ужась Светлана Андреева но гуртоослэсь куронъёссэ быдэсъяны тырше, сюлмысен ужа.

†апак магазин доры ноябрь толэзе паймымон ФАП усьтӥзы. Фельдшерез гуртоос матын карыса Тагзима шуо, зэм ик, со доры вазиськемъёсыз туж сак эскере, буйгатэ, шуныт кыл кузьма.

Праздникъёс, собраниос дыръя гурт калык клубе люкаське. Тани Выль ар но йыгаське ини. Егитъёс но мӧйыос клубе дыртозы. Синмаськымон тыршыса ужаса улӥсьёслы вуж клубмы уг ни кельшы кадь, со пичи но мӧзмыт, мынам валамея, культура юрт югыт, мылкыдэз ӝутӥсь луыны кулэ кадь. Озьы ке но, клубен кивалтӥсьмы Тоня Перемечева тыршыса ужа, коткыӵе праздникъёс но конкурсъёс ортчытыны сюлмаське, мӧйыосыз но клубе люкаса мылкыдзэс ӝутэ. Соос пинал дырзэс буре ваё, улонысьтыз турлы тумошо учыръёссэс верало, экто, кырӟало, дырзэс умой ортчыто.

Улон интыяз уг сылы, азьлань вамыштэ, вужез уг вуны, вылез оскытэ. Оскисько, гуртмы азьпалан эшшо но чеберскоз, будоз, кусып возён юнмалоз. Будӥсь поколение анай-атайёсызлэсь адӟем карыса, мӧйыосыз гажаса, ӟеч дышетскыса но ужаса, гуртэз данъялоз.

Екатерина Ракова

Вукогурт

Реклама
Нравится
Поделиться:
Реклама
Комментарии (0)
Осталось символов: