Вукогуртын бадӟым уж быдэстӥськиз (+фоторепортаж)

19-тӥ инвожое ёросамы трос шулдыр ужрадъёс луизы. Кӧня ке гуртъёсын Гуртлэсь нуналзэ ортчытӥзы, Сырьяын Бельгы вал, Покчи Лӧзяын — «Берёзка» праздник.

Кутскон понэмын

Одӥгез сыӵе тунсыко но калыклы туж кельшымон ужрад Вукогуртын луиз, отын нырысетӥзэ ортчытӥзы Гуртлэсь нуналзэ. Пичиез но бадӟымез, удмуртэз но ӟучез, тодмоосыз но тодмотэмъёсыз — ваньзы «Мусо гуртмес яратыса» ним улын ортчись Гуртлэн нуналаз люкаськизы.

Вукогуртлэн историысьтыз

Ужрадэз радъясьёс пыр-поч дасяськиллям калык азьын вераськыны но. Сценарийзыя, соос куноосты Вукогуртлэн кылдэменыз но тодматӥзы. Вукогуртлэн вашкала нимыз — Юбек гурт. Гурт кылдэмын ог 1722-1740 аръёсы. Юбек нимзэ герӟаны луэ, дыр, удмурт пиосмуртлэн нимыныз, яке «юбек» — «сюбег» (ӟуч кылэ берыктыса, «узкий»). Вашкалаослэн верамзыя, гуртын сизьым вуко луэм. Вуко луэм бере, гуртын узыр адямиос улӥллям. Гуртэз котыртыса возиллям, уйинлы ворсаллям, лушкаськисьёс медаз пыре шуыса. Удмурт калык язычник луэмен, гуртын трос вӧсян нюкъёс вылӥллям. Юбек — выль кылдэм гурт. Эскерымтэ источникъёсъя, отчы Вуж Турья гуртысь но Ӟаныысь яна потӥллям шуо. Озьы ке, Вукогуртын уло Турья, Чола но Пӧшъя выжыысь удмуртъёс. 1741-тӥ арын гуртын улӥллям 53 крашине пырымтэ удмурт пиосмуртъёс, нылкышноослэн лыдзы лыдъямын ӧвӧл. 1761-1767-тӥ аръёсы гуртысь калыкез крашинэ пырто. 1782-тӥ арысен Юбек нимлы ватсало «меленка» ним. Ӟуч кылысь «меленка» берыктӥське «вуко» шуыса.

Нырысьсэ колхоз Вукогуртын кылдытэмын 1930-тӥ арын. Со «Выль гурт» («Новая деревня») шуыса нимаськем. Нырысетӥез председатель — Лобанов Иван Павлович. Колхозлэн правлениез интыяськемын луэм солэн юртаз, кыкетӥ этажаз. 1937-тӥ арын колхозлы выль ним сёто — «Заря». Председательёс — Григорий Нуриев, Николай Андреев. Быдӟым Атыкай ож дыръя председательёс луо Павел Михайлов, Василий Яковлев, Трофим Фёдоров. 1950-тӥ арын «Заря» колхоз «Труд» колхозлэн составаз пыре. Туннэ нуналэ Вукогуртын 55 хозяйство вань, 163 адями улэ.

Нокинэ ӟечкыланы ӧз вунэтэ

Праздниклэн одӥг люкетаз ас дыразы Ципья школаын дышетыса дано шутэтсконэ потэм Вукогуртысь тодмо но гажамон дышетӥсьёсты данъязы, ушъязы. Зоя Туктаровалэн, Геннадий Григорьевлэн, Екатерина Раковалэн интызы тӧршорын луиз. Кыл сётӥзы Вукогуртысь самой гажамон адямилы но, кудӥз Вукогуртын вордскиз, будӥз, семья кылдытыса вить нылпиосты пыд йылазы султытӥз, гумыраз колхозын ужаз — Гурьян Перемечевлы. Сцена вылэ ӧтьыса пусйизы Вукогуртысь ФАП-ын ужам но ужась кышномуртъёсты но — Маргарита Васильеваез но Тагзима Саляхиеваез. Туэ котырес лыдпусъёссэс  (50, 55, 60, 65, 75, 80, 85 ар тырмонзэс) пусйись гуртооссэс озьы ик бадӟым карыса ӟечкылазы. Трос нылпиё анайёс но (Юлия Заболотских, Алина Парманова, Ольга Яковлева) сцена вылэ тубизы. Озьы ик пусйизы гуртысь самой арлыдо (Тихон Андреев, 86 арес) но самой покчи (Злата Филиппова, одӥг толэзьлы матэ) муртъёсты но. Вераны ӧз вунэтэ арми радъёсын служить карись пиос сярысь но: Сергей Перемечев, Владимир Кузнецов, Роман Степанов, Станислав Туктаров туннэ нуналэ асьмелэсь каньыл улонмес утё. Пӧсь точкаосын служить карем муртъёс но палэнэ ӧз кыле. Сценае ӟечкыланы ӧтизы Николай Раковез (Афганистан), Александр Туктаровез (Чечня), Яков Андреевез (Чечня), Алексей Яковлевез (Чечня).

Конкурсъёс трос пӧртэм вал

Праздникез туж  чебер каризы ужрадэ лыктэм нылъёслэн но апайёслэн удмурт дэремъёссы, чилясь камалиоссы, жингрес куараоссы. Вукогуртъёс куноосты ческыт ӝукен, табанен сюдӥзы, самоварын ческыт чай пӧзьтӥзы, шашлыксы но вань вал. Удмурт гуртлэсь праздниксэ удмурт кырӟанъёстэк, эктонъёстэк но юмшанъёстэк син азе пуктыны но уг луы. Татын но ваньмыз вань вал: апай сямен эктон но, пиос сямен эктон но, туала кырӟан-эктонъёс сярысь но вунэтымтэзы. Трос тунсыко вожвылъяськонъёсты но дасяллям вал вукогуртъёс. Кыӵеез гинэ ӧй вал: пу вандылон, мултэс пукон, Велосипедъёслэн парадзы,  горшок пыргытон, пуйыосын бызьылон, куасэн бызьылон, сапег куян, гозыен кыстаськон, «Пӧсь картошка» шудон, атасэз кутон… Вань кадь та шудонъёсы калык мыло-кыдо пыриськыса мылкыдъёссэ ӝутӥз, кузьым но утыны быгатӥз. 

Кинлы тау шуоно?

Валамон, Гуртлэсь нуналзэ ортчытон — со туж шулдыр праздник. Нош кӧня кужым но дыр кулэ со праздникез дасян но ортчытон понна, асьсэос организаторъёс но ужез радъяны юрттӥсьёс гинэ тодо. Тужгес но секыт, куке ужрадэз нырысетӥзэ ортчытӥськод, куке кызьы но мар карыны пыр-поч уг тодӥськыд. Та сярысь праздникез нуисьёс тани ма веразы:

— Одӥг толэзь азьло гурт клубамы гуртоосын ог 15 ӵошен люкаськимы, вераськимы гуртмылэсь нуналзэ пусйыны.

Соку со милемлы туж секыт но вормонтэм уж кадь потӥз. Озьы ке но, ваньмы тыршыса, мар вал малпамын, сое ортчытыны тыршимы. Праздникез нырысетӥзэ ортчытӥмы, соин ик, ӟуч кылын вераса, «строго не судите». Вань сюлмысен тау шуэммы потэ Вукогурт калыклы. Ваньзы мылысь-кыдысь пыриськизы дасяськон ужрадэ. 

Праздникез калык ас кужыменыз но спонсоръёслэн юрттэменызы ортчытӥз. Тани соос — «Труд» обществолэн кивалтӥсез Рашид Хадиев, ужбергатӥсьёс Мансур Хабибуллин, Руслан Хадиев, Константин Петров, Сергей Григорьев, Николай Григорьев. Сое радъянэ нимысьтыз люкет пыртӥзы трос гуртысь адямиос но. Зэмзэ вераны кулэ, вукогуртъёс ужрадэз «витьлы» ортчытӥзы. Котькуд чыры-пыры ужез санэ басьтыса, вылӥ уровенен ужрад ортчытыны быгатӥзы. Соин соосты пусъеммы потэ.

Сценариез малпазы Марина Залкеева, Анжелика Кузнецова, Алексей Степанов. Нылпиослэсь концертсэс дасяз Анна Григорьева. Артистъёс — Римма Кузнецова, Елена Никитина, Лариса Сидорова, Алина Фёдорова, Наталья Никитина, Людмила Лобанова, Ирина Пашкеева, Ольга Петрова, Анна Усманова, Николай Фёдоров. Территориез радъязы, шудонъёсты ортчытъязы но сиён-юонъёсты дасязы Антонида Перемечева, Алина Григорьева, Елена Раимова, Любовь Фёдорова, Зоя Яковлева, Алевтина Григорьева, Юрий Степанов, Василий Степанов, Алексей Яковлев, Александр Щербаков, Николай Григорьев, Владимир Никитин, Валерий Андреев, Юрий Никитин, Василий Николаев, Михаил Щербаков, Фёдор Пашкеев, Семён Яковлев, Юрий Лобанов, Николай Андреев, Альберт Фомин, Артём Степанов, Пётр Тимофеев, Юрий Кузнецов.   

Та адямиослэн тыршеменызы зэмос праздник пӧрмиз. Гуртсы пичи ке но, клубзы вуж ке но (нялтас вераса, клубын йӧно, ярамон аппаратура но ӧвӧл вылэм) данъяськымон, ушъяськыса верамон ужрад ортчытыны быгатӥзы. Тау ваньзылы но! Гурт калык но, татчы лыктэм куноос но, праздникез радъясьёслы бадӟым тау каремзэс вераса, ӝутскем мылкыдын, азьпалан но таӵе пумиськонъёслы оскыса таркаськиз.

Материал ужрадэз нуисьёслэн юрттэменызы но сценариен пайдаяськыса дасямын

Вера Лобанова, Вукогурт:

— Вукогуртмылэн кема витем шулдыръяськоназ матысь но кыдёкысь вуэмъёс чеберъям арка пыр пыризы. Та арка тодэ вайытӥз азьвыл Бусы капкаез, кудӥз вылэм котькуд гуртлэн пырон сюресаз. Гуртэ пырон-потон, пумиськылонъёс, келяськонъёс Бусы капка дорын ортчиллям. 

Гуртлы сӥзем праздникын лыктэмъёс тодматскизы гуртлэн историеныз, дано гуртоосынызы. Тодӥзы спонсоръёслэсь нимъёссэс. Учкимы пиналъёслэсь быгатыса эктэм-кырӟамзэс, гуртэз данъяса чебер кылбуръёс лыдӟемзэс. Собере учкимы гуртысьтымы бадӟымъёслэсь зэмос артистъёс выллем выступленизэс. Туж тунсыко но серемес вожмаськонъёс, ӵошатсконъёс ортчытӥзы та праздникез радъясьёсмы. Тани кужымзэс мертало гозы кыскаса, маин ке тырмытэм пуйыен ог-огзэсты тышкало, дӥсьтӥсьёс пуйыосын бызьыло. Кутскиз гын сапегез лэзьян, кин тужгес кыдёке зиртоз. Черод вуиз таизлы апайлы сапегез лэзьыны, со туж зол дасяськиз: улласянь-а чачыртоно яке вылласянь, юалляськиз-тодӥз, мертаськиз но сэрпалтӥз ке сэрпалтӥз! Сапегез ӧз кылзӥськы — берлань лобӟиз! Таизлэн вогоронлэн сапегез сцена вылын эктӥсь-кырӟасьёс пӧлы вуиз, мукетызлэн — кинлэн ке берпалаз. Ортчиз оломарлы но пӧрмытэм чеберъям велосипедъёслэн парадзы. Пичи Стасик гинэ шудон корка выллем лэсьтэм велосипедаз пуксьыны пумит луиз, тамында вожмаськисьёслэсь кышкаса, лэся, бӧрдыны кутскиз, нош берло атаеныз ӵош, дӥсьтӥсь кариськиз но «коркаяз» пырыса учкисьёс азьтӥ котырскиз. Ой, кӧня шулдыръяськонъёс малпаллям вылэм, кӧня кузьымъёс сётъязы! Вакчи дыр куспын та бадӟым праздникез радъяны быгатӥзы Анна Григорьева, Марина Залкеева, Юра Степанов. Туж быгатыса та ӝытэз нуизы Анжелика Кузнецова но Алексей Степанов.

Тыршизы пенсионеръёсмы Юрий Лобанов, Семён Яковлев, Валерий Андреев, озьы ик Юрий Кузнецов, Алексей Яковлев, Михаил Щербаков но егит пиосмы.  Таос инты дасянэ пыриськизы, сцена, пукон интыос, ӝӧкъёс лэсьтыса вуттӥзы, самоваръёсын йӧнатӥсь турынъёсын чай но ческыт, сӥлё ӝук пӧзьтӥзы. Котькин быгатӥз кунояськыны буй-буй пыжем табанен, губилэсь перепечен, турлы емышъёсын. Лулысь-сюлмысь пыриськизы та ужрадэз ортчытонэ гуртысьтымы котькудӥз мыло-кыдо семьяос.

«Дуно гуртоос, лыктэм куноос! Ойдолэ котьку ог-огмес гажаса, ог-огмы доры куное ветлыса, ог-огмылы юрттыса уломе. Азьпалан улонмы каньыл мед луоз, кизем юосмы мед удалтозы, вань кадь умой малпанъёсмы мед быдэсмозы. Ми вал, Ми вань, Инмар юрттӥз ке, Ми луомы!» Таӵе шуныт кылъёс чузъяськыса ӝытмы йылпумъяськиз.

Гуртоосмылэн но куноослэн нимынызы сюлмысь тау карисько праздникез дасясьёслы, асьсэлэсь дырзэс жалятэк та ӝытэз калыклы кельшымон радъямзы понна, мылкыдзы эшшо но мед бурдъяськоз пӧртэм ужрадъёс ортчытыны. Трос аръёс ӵоже тодытэк улӥськеммы кӧня вылэм милям Вукогуртамы усто но юрттӥськыны дась луись калыкмы.

Фото: Наталья Жукова, Ольга Аскарова