Выльдӥськонъёс пайдаё мед луозы

Элькунмылэн гурт улосвылъёсты котыр ласянь чебертон но юнматон программаезъя но ёрос кивалтэтлэн тыршеменыз Вуж Кушкет гуртэ эмтодос удысысь выльдӥськонъёс вуизы — выль фельдшер-акушер пункт лэсьтӥськиз.

Туннэ нуналэ социальной юртъёс гурт калыклэн улоназ нимысьтыз инты басьто. Нимаз ик ФАП валтӥсь интыын луэ. Татын адями эмъюрттэт но басьтэ, мылкыдзэ но буйгатэ. 

1 куарусёнэ ӵукнаысен ик гуртын шулдыр но капчи мылкыд вӧлмиз, инкуазь но шумпотӥз кадь: шунды тылсиос яркыт пиштыса шунтӥзы, ыркыт тӧл каллен пельтӥз. Гуртын удмурт кырӟанъёс вӧлмемен валамон луиз: гуртын туннэ бадӟым ужрад ортчоз. Яркыт буёло пельтэм шаръёсын чебермам выль ФАП гажаса пумитаз котькуд лыктэм куноез. Вань гурт калык выль юртэз учкыны лыктӥз. Шумпотымон, котькудӥз тау карыса аслэсьтыз мылкыдзэ шараяз, мыло-кыдо ужрадэ пыриськиз. 

Бурдъяськем мылкыдын, кичабонъёсын пумитаз гурт калык ФАП-эз усьтон ужрадэ пыриськем куноосты: ТР-ысь Кун Кенешысь депутатэз, Балтась ёрослэсь кураторзэ Камиль Нугаевез, ТР-ысь тазалыкез утёнъя министрлэсь воштӥсьсэ Альмир Абашевез, Балтась муниципал ёрослэсь главазэ Рамиль Нутфуллинэз, Балтась муниципал ёросысь быдэсъясь комитетлэсь кивалтӥсьсэ Айдар Хайрутдиновез, ёросысь центральной больницалэсь валтӥсь врачсэ Газинур Давлиевез, «Яна тормыш» возёслэсь кивалтӥсьсэ Магсумзян Сайфутдиновез, Янгул гурт поселенилэсь главазэ Раниль Габдрахмановез но Янгул гуртысь эмъян амбулаторилэсь кивалтӥсьсэ, гуртомес Любовь Улановаез. Гуртысь «Чибори» ансамбль, куноосты пумитаса, чебер удмурт эктонзэ кузьмаз. 

Котькуд лыктэм куно понна та нунал нимысьтыз луиз. Ваньзы ик асьсэлэсь мылкыдъёссэс веразы.

«Гуртты пичи ке но, луонлыкъёсты бадӟымесь. Пичи гуртъёсын пӧртэм программаосы пыриськыны шуг ке но, ёростылэн кивалтӥсез тырше котькуд гуртэ выльдӥськонъёс пыртыны. Зэмзэ ик, выль юрт шумпотонъёс гинэ мед ваёз. Висёнъёсын эн лыктэ, вераськыны гинэ, секыто нылкышноос гинэ мед лыктозы татчы», — ӟечкылаз вань лыктэмъёсты Камиль Асгатович.

Альмир Рашидович но шумпотонъёссэ вераз: «Та юртэ лыктыны висёнъёсын медаз кылды, профилактика амалэн гинэ. Гуртады нылпиос мед вордӥськозы, арлыдоос мылкыдъёссэс, шумпотонъёссэс вераны мед лыктозы. Егит ӧнерчидэс гажалэ, дунъялэ, ӝоже эн уськытэ».

Вуж Кушкет гуртын улӥсьёс понна та кыкетӥ шумпотон луиз (нырысетӥез — 2017 арын лэсьтэм клуб). Та дырозь гурт фельдшерлэсь ужзэ Алина Филипова быдэстӥз. Шаплы, дӥсьтӥсь егит нылкышнолэн ужез гуртоосызлы но, ёросын улӥсьёслы но тодмо луиз. Тыршись адями котьку вань ужзэ пумаз-йылаз вуттыны сюлмаськиз. Одӥгез гинэ ӝожомытэ вал: ФАП-лэн вылтусыз но луонлыкъёсыз. Ёросысь кивалтэтлэн тыршеменыз, вакчи дыр куспын Вуж Кушкет гуртын туала дырлы тупась выль туж кулэ луись юрт пуксиз. Алина туннэ нуналэ Янгул гуртысь эмчи амбулаториын тырше ини. Солэн капчи киосыз адямиосты либато, ассэ зӥбыт возьыса, куалектонлы уг сётскы, вань ужзэ рос-прос лэсьтэ. Юнме Алинаез выль уже ӧз медэ, вылды: калык понна тыршемез но ужан мылкыдыз котькинлы тодмо, котькин сое ушъя, ас ужзэ валасен лыдъя. 

Нош выль ФАП-ын фельдшерлэсь ужзэ быдэстоз егит ӧнерчи Екатерина Тихонова. Вуж Кушкет гуртын со инвожо толэзьысен ужа ини, выль юртсэ нуныез сямен адямилы возьматымон чеберъяз: котырзэ утялтӥз, сюлэмзэ сётыса ужез борды басьтӥськиз. Оскиськом, чебер ужан интыяз егит ӧнерчи но калыкез утёнын ассэ жалятэк, капчи мылкыдын ужаны тыршоз шуыса. 

Ачим Вуж Кушкет гуртын вордӥськемын но будэмын бере, шумпотӥсько гуртлэсь воштӥськемъёссэ но выльдӥськемъёссэ адӟыны. Нош уж борды егитъёс басьтӥсько ке, татын эшшо но бурдъяськиськод. Егитъёслэн ужазы кутэм пӧртэм туала но аспӧртэмлыко амалъёссы улонэз выльдо, озьы улон но воштӥське.

Котькуд ӧнерын адямилы мылкыд ӝутон кулэ. Нимысьтыз егитъёс понна со ужан тӥрлыкъёс, луонлыкъёс. Оскиськом, кушкетъёслы но пайдаё луозы выльдӥськонъёс. Соос гурт калыкез но, бертэм куноосты но данъяськымон сюресэ вуттозы. Азьланяз но гуртлы азинсконъёс, гуртын улӥсь адямиослы тазалык сӥзиськом, нош выль ӧнерчилы ужаны капчи мылкыд, ужан сюресаз секыт учыръёсын пумиськоно медаз луы!